އެމްއެންޔޫއިން ސުވާލާއި ޖަވާބު ކަމަށް ބުނެ ބޭއްވި ބަހުސްއަކީ ރައީސް ޔާމީންގެ ކޮރަޕްޝަނާއި، އަނިޔާވެރިކަމުގެ ތީސިސް ދިފާއުކުރުމަށް ބޭއްވި ބަހުސްއެއް
މިސަރުކާރުގެ ފުރަތަމަ ނާއިބު ރައީސް ޑރ. މުހައްމަދު ޖަމީލް އަހުމަދު
ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އިން އެތަނުގެ އަގު "ޗަކަވަޅަކަށް" ވައްޓާލާފައިވާ ކަމަށް މިސަރުކާރުގެ ފުރަތަމަ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
އެމްއެންޔޫ އިން ބޭއްވި ރިޔާސީ ބަހުސްއާ ބެހޭ ގޮތުން ޑރ. ޖަމީލު ކުރެއްވި ޓްވީޓެއްގައި ވިދާޅުވީ އެމްއެންޔޫއިން އެ މީހުންގެ އަބުރާއި އިއްޒަތް ވެއްޔާ މޮޑެލުމުން ވަރަށް ބޮޑަށް ދެރަ އިހުސާސް ކުރެވިފައިވާ ކަމަށެވެ.
ޑރ. ޖަމީލު ވިދާޅުވީ އެމްއެންޔޫ އިން ސުވާލާއި ޖަވާބު ކަމަށް ބުނެ ބޭއްވި ބަހުސްއަކީ ރައީސް ޔާމީންގެ ކޮރަޕްޝަނާއި، އަނިޔާވެރިކަމުގެ ތީސިސް ދިފާއުކުރުމަށް ބޭއްވި ބަހުސްއެއް ކަމަށެވެ. އަދި ބަހުސް ކިޔުމުގެ ބަދަލުގައި ރައީސް ޔާމިންގެ ކޮރަޕްޝަނާއި، އަނިޔާވެރިކަން ދިފާއުކުރުން ކިޔުން މާރަނގަޅުވާނެ ކަމަށެވެ.
ރައީސް ޔާމީން އެކަނި ހުންނަވާ ކުރިއަށް ގެންދިޔަ މި ބަހުސްއަކީ ދުނިޔޭގައި ވެސް މިފަދަ ގޮތަކަށް ބޭއްވި ފުރަތަމަ ބަހުސްކަން ފާހަގަކުރައްވައި ޑރ. ޖަމީލު ވިދާޅުވީ އެމްއެންޔޫއިން ކުރިއަށް ގެންދިޔަ ރިޔާސީ ބަހުސްގެ ސަބަބުން އެޔުނިވާސިޓީގެ އަގު "ޗަކަވަޅަކަށް" ވެއްޓިފައިވާ ކަމަށެވެ. މިބަހުސްގެ ސަބަބުން އެމްއެންޔޫގެ އަގު ވެއްޓިފައިވާ ކަމަށް ވެސް ޑރ. ޖަމީލު ވިދާޅުވިއެވެ.
އެހެންކަމުން ބަހުސްގެ މާނަ ޔުނިވާސިޓީން ދަސްކޮށްދޭންޖެހޭ ކަމަށާއި، މި ބަހުސްގެ ހަގީގަތް ހާމަކޮށްދިނުމަށް ޑރ. ޖަމީލު ވަނީ ގޮވާލައްވާފައެވެ.
