ޕީޕީއެމުން ހިންގާ ހަރަކާތާ ހުރެ، މަސްވެރިން ރުޅިގަދަވެ ހަމަނުޖެހުން ނުހިނގީ ކިރިޔާ!
އެ ހަރަކާތް ހިންގާތާ މިއަދަނީ ތިން ވަނަ ދުވަސް
ޕީޕީއެމްގެ އެކްޓިވިސްޓަކާއި މަސްވެރިޔަކާ މެދު ބަހުގެ ހަމަލާތަކެއް: ބަހުގެ ހަމަލާތަކެއް ރައްދުކޮށް، މާރާމާރީއަށް މަގުފަހި ނުވީ ކިރިޔާ-- ފޮޓޯ/ ޙުސައިން ޙަސަން
ތާއިދު ހޯދުމަށް ޕީޕީއެމުން މަސްމާރުކޭޓު ކުރިމަތީގައި ހޯމަ ދުވަހު ވެސް ހިންގި ހަރަކާތާ ގުޅިގެން މަސްވެރިން ރުޅިގަދަވެ، ބަހުގެ ހޫނު ހަމަލާތަކެއް ރައްދުކޮށް، ހަމަނުޖެހުމަށް މަގުފަހި ވެއްޖެއެވެ.
މިދިޔަ ހޮނިހިރު ދުވަހުން ފެށިގެން ޕީޕީއެމުން ގެންދަނީ ބާޒާރުމަތީގައި ކޮންމެ ދުވަހަކު ކެމްޕެއިން ހަރަކާތްތައް ހިންގަމުންނެވެ. އެގޮތުން ހޯމަ ދުވަހުގެ ހަވީރު ވެސް ރައީސް އަބްދުﷲ ޔާމީނަށް ތާއިދު ހޯދުމަށް މަސްމާރުކޭޓް ކުރިމަތީގައި ޕީޕީއެމުން ހިންގި ހަރަކާތާ ގުޅިގެން މަސްވެރިން ވަނީ ރައީސް ޔާމީނަށް ތާއިދު ނުކުރާކަން ހާމަކޮށްފައެވެ.
ބެޔަސް ނުބެޔަސް ނުލިބޭތީ ޕޯސްޓަރު ހިފައިގެން މަސްވެރިން: ޕީޕީއެމަށް ތާއިދު ނެތް ކަމަށް ބުނެ އަޑު އުފުލާފައިވޭ-- ފޮޓޯ/ ޙުސައިން ޙަސަން
ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ (މުއާ) އިސްވެ ހުންނަވައި ހިންގަވާ އެ ހަރަކާތުގައި ރައީސް ޔާމީންގެ ކެންޑިޑޭޓު ނަމްބަރު، އަތުގެ އިޝާރާތުން ދެއްކުމުން، މާރުކޭޓުގައި ތިބި މަސްވެރިންނާއި އާންމުން ވަނީ ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)އަށް އޮތް ތާއިދު ދައްކާލާފައެވެ. އެގޮތުން އިބޫގެ ކެންޑިޑޭޓް ނަމްބަރު އިނގިލީގެ އިޝާރާތުން ދައްކައި، ގުޅިފައިވާ ޕާޓީތަކަށް ތާއިދު ކުރާ ކަން ހާމަކޮށްފައިވެއެވެ.
ޕީޕީއެމުން ކޮންމެ ދުވަހަކު ހިންގާ އެ ހަރަކާތާ ގުޅިގެން، މަސްވެރިން ވަނީ ކަންބޮޑުވުން ފާޅުކޮށް ބަހުގެ ހަމަލާތައް ޕީޕީއެމްގެ އެކްޓިވިސްޓުންނަށް ރައްދުކޮށްފައެވެ. އެގޮތުން ސަރުކާރުން މަސްވެރިންނަށް ވައުދުވި ބެޔަސް ނުބެޔަސް ނުލިބޭތީ، އެކަން ދެއްކުމުގެ ގޮތުން ޕޯސްޓަރުތަކެއް ހަދައި، ދައްކާލާފައިވެއެވެ.
ޕީޕީއެމަށް ތާއިދު ނެތް ކަމަށް ބުނެ، އާންމުން އަޑުއުފުލަނީ-- ފޮޓޯ/ ޙުސައިން ޙަސަން
މާރުކޭޓު ކުރިމަތީގައި ޕީޕީއެމުން ކޮންމެ ދުވަހު ހިންގާ ހަރަކާތާ ގުޅިގެން މަސްވެރިން ރުޅިގަދަވެ، އެ މީހުންގެ ވިޔަފާރިއަށް ހުރަސް އެޅޭ ކަމަށް ބައެއް މަސްވެރިން ވަނީ ބުނެފައެވެ. އަދި ޕީޕީއެމަށް އޮތް ތާއިދު ގެއްލި، ސަރުކާރަށް އޮތް ނުރުހުން އިތުރަށް ބޮޑުވެގެންދާ ކަމަށް ބައެއް މަސްވެރިން ވަނީ ބުނެފައިވެއެވެ.
ބަހުގެ ހަމަލާތަކެއް ރައްދުކޮށް، ހަމަނުޖެހުމަށް މަގުފަހިވާގޮތަށް މަސްމާރުކޭޓު ސަރަހައްދުގައި ކަންތައްތަކެއް ހިނގައިދިޔައިރު، ދެ ފުލުހަކު އަމަން ބެލެހެއްޓުމަށްޓަކައި އެތަނުގައި ތިއްބެވެ. ނަމަވެސް އެކަން ހުއްޓުވުމުގެ ގޮތުން ފުލުހުން އެއްވެސް ކަމެއް ކޮށްފައެއް ނުވެއެވެ.
