ރައީސް ނަޝީދުގެ ވެރިކަން ބަދަލުވި ދުވަހު މާރިޔާ އަށް ހަމަލާދިން މީހަކު 200ރ އިން ޖޫރިމަނާ ކޮށްފި
22 މެއި 2017 | ހޯމަ 16:41ކުށް ސާބިތުވި މީހާ 200ރ އިން ޖޫރިމަނާ ކޮށްފައިވަނީ ކުރީގެ ގާނޫނުލް އުގޫބާތުގެ ދަށުން
މާރިޔާ އަހުމަދު ދީދީ ޖޭޕީގެ ލީޑަރު ގާސިމްގެ އަރިހުގައި
ކުރީގެ ރައީސް މުހައްމަދު ނަޝީދުގެ ވަރިކަން ބަދަލުވި ދުވަހު ޖުމްހޫރީ މައިދާނަށް އެއްވި މީހުގެ ތެރެއިން މީހަކު ރައްޔިތުންގެ މަޖިލީހުގެ މައްޗަންގޯޅީ އުތުރު ދާއިރާގެ މެމްބަރު މާރިޔާ އަގުމަދު ދީދީ އަށް ހަމަލާދިނުމުގެ ކުށް ސާބިތުވެ 200ރ އިން ޖޫރިމަނާ ކޮށްފިއެވެ.
ރައީސް ނަޝދުގެ ވަރިކަން ބަދަލުވި 7 ފެބްރުއަރީ 2012 ވަނަ ދުވަހު މާރިޔާ އަށް ހަމަލާ ދިން ކަމުގެ ކުށް ސާބިތުވެފައި ވަނީ އއ ރަސްދޫ ނަންރީތިގޭ ހަސަން ރާޝިދުގެ މައްޗަށެވެ. އޭނާގެ މައްޗަށް ދައުލަތުން އުފުލާފައި ވަނީ މާރާމާރީ ހިންގުމުގެ ދައުވާއެވެ.
މި ދައުވާއާ ގުޅިގެން ކްރިމިނަލް ކޯޓުން އާދީއްތަ ދުވަހު ކުރި ހުކުމުގައި ބުނެފައި ވަނީ 7 ފެބްރުއަރީ 2012 ވަނަ ދުވަހުގެ ހެނދުނުގެ ވަގުތެއްގައި ޖުމްހޫރީ މައިދާން ސަރަހައްދުގައި ހުންނެވި މއ.ކޮމްރެޑްވިލާ މާރިޔާ އަޙްމަދުދީދީ އާމެދު މާރާމާރީ ހިންގާފައިވާކަން ދައުލަތު ހުށަހެޅި ހެކިންގެ ހެކިބަނުންނާއި، ލިބިފައިވާ ގަރީނާއިން ހަސަން ރަޝީދުގެ މައްޗަށް ސާބިތުވާ ކަމަށެވެ.
ހުކުމުގައި ބުނެފައި ވަނީ ކުށުގެ އުގޫބާތެއްގެ ގޮތުން ހަސަން ރަޝީދު 200ރ އިން ޖޫރިމާ ކޮށް އެ ފައިސާ މި މަހަގެ 21 ވަނަ ދުވަހުން ފެށިގެން 10 ދުވަސް ތެރޭގައި ކްރިމިނަލް ކޯޓަށް ދެއްކުމަށް އަމުރުކުރާކަމަށެވެ.
މާރާމާރީ ހިންގުމުގެ ކުށް ހަސަން ރަޝީދުގެ މައްޗަށް ސާބިތުވެފައި ވަނީ ކުރިން އަމަލު ކުރަމުން ދިޔަ ގާނޫލް އުގޫބާތުގެ 126 ވަނަ މާއްދާގެ ދަށުންނެވެ. އެ މާއްދާގައި ބުނެފައިވާ ގޮތިގައި މާމާމާރީގެ ކުށް ސާބިތުވާ މީހަކަށް ދެވޭނެ އަދަބަކީ އެންމެ ބޮޑުވެގެން 200ރ އިން ޖޫރިމަނާ ކުރުން ނުވަތަ ހަ މަހަށް ވުރެ ދިގު ނޫން މުއްދަތަކަށް ޖަލަށްލުން، ނުވަތަ ގޭގައި ބަންދު ކުރުން ނުވަތަ އަރުވާލުމެވެ.
އެހެން ކަމުން ހަސަން ރަޝީދު 200ރ އިން ޖޫރިމަނާ ކޮށްފައިވަނީ އޭރުގެ ގާނޫނުލް އުގޫބާތު އޮތްގޮތުންނެވެ. އަދި ހަސަން ރަޝީދުގެ މައްޗަށް އޭރުގެ ގާނޫނުލް އުގާބާތުގެ ދަށުން އެ ދައުވާ ކޮށްފައި ވަނީ މިހާރު އަމަލު ކުރަމުންދާ ގާނޫނުލް އުގޫބާތު ރައްޔިތުންގެ މަޖިޅިހުން ފާސްކޮށްފައި ނުވާތީއެވެ.
