ޤައުމީ ޓީމް ގޮވައިގެން އެ ފްލައިޓް ޖެއްސުމުން ރައްޔިތުން އުފާވާނެ
ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ރަންވޭ
ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ރަންވޭގައި އެއްމިލިއަން ޑޮލަރު ހަރަދުކޮށްފައި އިއްތިހާދު އެއަރވޭސްގެ ޗާޓާރ ފްލައިޓް ޖެއްސުމުގެ ބަދަލުގައި ޤައުމީ ޓީމް ގޮވައިގެން އެ ފްލައިޓް ޖެއްސުމަށް ރައްޔިތުންގެ މަޖިލީހު ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ގޮވާލައްވައިފިއެވެ.
އާދިއްތަ ދުވަހުގެ ރޭ މަހްލޫފް ކުރެއްވި ޓުވީޓެއްގައި ވިދާޅުވީ އައު ރަންވޭގައި ހުސް ފްލައިޓް ނުޖައްސާ ޤައުމީ ޓީމް ގޮވައިގެން އެ ފްލައިޓް ޖެއްސުމުން ރައްޔިތުން އުފާވާނެ ކަމަށެވެ.
ސާފް ސުޒުކީ ނުވަތަ ސާފް ޗެމްޕިއަންޝިޕްގެ ޗެމްޕިއަންކަން އިންޑިއާ ބަލިކޮށް ރާއްޖެ ހޯދައިފައިވަނީ 10 އަހަރަށް ފަހުއެވެ. ޤައުމީ ޓީމް އެނބުރި ރާއްޖެއަށް ސެޕްޓެމްބަރު 18 ވަނަ ދުވަހު ރާއްޖެ އަންނަ ހަމަޖެހިފައިވާއިރު ސަރުކާރުން ވަނީ އެ ދުވަހަކީ ބަންދު ދުވަހެއްގެ ގޮތުގައި ކަނޑައަޅާފައެވެ.
އައު ރަންވޭގައި ދުނިޔޭގެ އެންމެ ބޮޑު ފަސިންޖަރުން އުފުލާ މަތިންދާ ބޯޓު ކަމަށްވާ އެއަރބަސް އޭ 380 މަރުކާގެ ބޯޓު ޖެއްސުމަށް ހަމަޖެހިފައިވަނީ ވެސް ސެޕްޓެމްބަރު 18 ވަނަ ދުވަހުއެވެ.
