އީސީގެ ވެރިންނަށް ﷲއަށް ބިރުވެތިވުމަށް ގޮވާލާ އަދުލުވެރި ވާން ޖެހޭނެ ކަމަށް ވެސް ވިދާޅުވެފައިވޭ
ޝެއިޚް އަލީ ޒައިދު
ވޯޓު އޮޅުވާލާ ކަމަށް ތުހުމަތުވާ އެއްވެސް ކަމެއް ކުރެވިގެން ނުވާނެ ކަމަށް ދީނީ އިލްމުވެރިޔާ ޝެއިހް އަލީ ޒައިދު ވިދާޅުވެއްޖެއެވެ.
ޝެއިހު ޒައިދު ކުރެއްވި ޓްވީޓެއްގައި ވިދާޅުވީ އެފަދަ އެއްވެސް ކަމެއް ކުރެވިގެން ނުވާނެ ކަމަށާއި ވޯޓު ގުނުމަށްފަހު އެންމެ ފުރަތަމަ ކުރަން ޖެހޭނެ ކަމަކީ ވޯޓުގެ ވަގުތީ ނަތީޖާ އިއުލާން ކުރުން ކަމަށެވެ. އަދި ނަތީޖާ އެއްވެސް އެއްޗަކަށް އެންޓަރ ކުރެވޭނީ އެއަށްފަހު ކަމަށް ޝެއިހު ޒައިދު ވަނީ ވިދާޅުވެފައެވެ. އޭނާ ވަނީ އީސީގެ ވެރިންނަށް ﷲއަށް ބިރުވެތިވުމަށް ގޮވާލާ އަދުލުވެރި ވާން ޖެހޭނެ ކަމަށް ވެސް ވިދާޅުވެފައެވެ. ހަމައެހެންމެ ރައްޔިތުން އެދެނީ ދެ ފުށް ފެންނަ އިންތިހާބެއް ކަމަށް ޝެއިހު ޒައިދު ވަނީ ވިދާޅުވެފައެވެ.
ރާއްޖޭގެ ނަން މަޝްހޫރު ޝެއިހަކު މިހެން ވިދާޅުވެފައިވަނީ އަންނަ އާދީއްތަ ދުވަހު ބާއްވާ ރިޔާސީ އިންތިހާބުގައި ވޯޓު ލާ މަރުކަޒުތަކުން ނަތީޖާ އިއުލާން ކުރުމުގެ ކުރިން، ޓެބްލެޓަށް ނަތީޖާ އެންޓަރ ކުރާ ކަމަށް މީޑިއާތަކުގައި އަޑުތައް ފެތުރިފައިވާ ދަނޑިވަޅެއްގައެވެ. ނަމަވެސް އިލެކްޝަންސް ކޮމިޝަނުން ވަނީ އެކަން ދޮގުކޮށްފައެވެ. އެހެން ނަމަވެސް އަނެއްކާ ވެސް އެ ވާހަކަ ފެންމަތިވެފައި ވަނީ ވޯޓު ގުނުމަށް ފަހު، ނަތީޖާ ފުރަތަމަ ޓެބްލެޓަށް އެންޓާ ކުރަންޖެހޭ ގޮތަށް ވޯޓު ފޮށީގެ އޮފިޝަލުން ތަމްރީނު ކުރި ކަމަށް ދެކެވޭ ވާހަކަތަކާ ގުޅިގެންނެވެ.
