ތާރީޚީ ބަދަލުތަކެއް ގެނައުމުގެ ވައުދާއެކު އިބޫގެ ކުޅިވަރުގެ ސިޔާސަތު ހާމަކުރައްވައިފި
މޫދުކުޅިވަރުތައް ތައާރަފު ކުރައްވާނެ ކަމަށް ވިދާޅުވި
މިއަދު އިބޫ މާޅޮހަށް ވަޑައިގެން ސަޕޯޓަރުންނާ ސަލާމް ކުރައްވަނީ:-ކުޅިވަރު ސިޔާސަތު މިރޭ ވަނީ އާންމުކޮށްފައި
ކުޅިވަރުގެ ދާއިރާއަށް ތާރީޚީ ބަދަލުތަކެއް ގެނައުމުގެ ވައުދާއެކު ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހްގެ ކުޅިވަރުގެ ސިޔާސަތު ހާމަ ކުރައްވައިފި އެވެ.
ޅ. ނައިފަރުގައި ބޭއްވި ޖަލްސާގައި ގުޅިފައިވާ ޕާޓީތަކުގެ ކުޅިވަރުގެ ސިޔާސަތު ހާމަ ކޮށްދެއްވަމުން އިބޫ ވިދާޅުވީ މާލެއަކީ ރާއްޖޭގެ އެންމެ ބޮޑު އާބާދީ އޮތް ތަނަކަށްވާއިރު ބައިނަލްއަގުވާމީ ކުޅިވަރު މުބާރާތްތަކުގެ ތަމްރީން ހެދެމުންދާ ތަން ދެކިވަޑައިގަންނަވަން ބޭނުންފުޅުވާ ކަމަށެވެ.
"އަޅުގަނޑު މި ގަބޫލު ކުރަނީ ކުޅިވަރުގެ ވަސީލަތްތައް އެކަށީގެންވާ ވަރަކަށް ހުންނަން ޖެހޭނެ ކަމަށް. އެގޮތުން ގައުމީ ހުރިހާ ކުޅިވަރެއް ކުޅެވޭނެ އެކަށީގެންވާ ތަނެއް ހަދާދޭނަން. ބައިނަލްއަގުވާމީ އިތުރު ދަނޑެއް ތަރައްގީކޮށް ސަރައްދީ ފުޓުބޯޅަ އާއި ބައިނަލްއަގުވާމީ މުބާރާތްތައް ރާއްޖޭގައި ބޭއްވޭނެ އިންތިޒާމް ހަމަ ޖެހިގެންދާނެ،" އިބޫ ވިދާޅުވި އެވެ.
ފުޓްބޯޅައަކީ ރާއްޖޭގެ އެންމެ ގިނަ މީހުން ޝައުގުވެރިވާ ކުޅިވަރެއްކަން ފާހަގަ ކުރައްވައި އިބޫ ވިދާޅުވީ ރާއްޖޭގައި ފުޓްބޯޅަ ކުރިއެރުވުމަށް ގިނަ ކަންތައްތަކެއް ކުޅިވަރުގެ ސިޔާސަތުގައި ހިމަނާފައިވާނެ ކަމަށެވެ. އަދި ވިދާޅުވީ ފުޓުބޯޅައިގެ ވާދަވެރިކަން އިތުރުކުރުމަށްޓަކައި ކޮންމެ ރަށެއްގައި ރަށު ޓީމެއް ހަދައި، ލީގެއް ފަށާނެ ކަމަށެވެ. ކަސްރަތަށް އަހްލުވެރިކޮށް ކުޅިވަރުގައި އެހީތެރިވުމަށް ސްޕޯޓް ކައުންސިލަރުން ކޮންމެ ރަށެއްގައި ވެސް ބައިތިއްބަވާނެކަމަށް ވިދާޅުވެފައި އެވެ.
"ކޮންމެ ރަށެއްގައި ކަސްރަތު ކުރެވޭނެ ވަސީލަތްތައް ގާއިމު ކޮށްދޭނަން. އަޅުގަނޑުމެންގެ ސަރުކާރުގެ ތިން މަސްދުވަސް ތެރޭގައި ރާއްޖޭގައި ހުރި ކުޅިވަރު ސާމާނުތަކުގެ އޮޑިޓެއް ހަދައި އެއަށް ގެންނަން ޖެހޭ ބަދަލެއް ގެންނާނަން،" އިބޫ ވިދާޅުވި އެވެ. މޫދު ކުޅިވަރުތައް އިތުރަށް ކުރިއެރުވުމަށް ރާއްޖޭގައި ތަފާތު މޫދުކުޅިވަރުތައް ކުޅެވޭނެ އިންތިޒާމް ހަމަޖައްސައި ދިނުމުގެ އިތުރަށް ރާއްޖެއަކީ މޫދުކުޅިވަރުތަކުގެ އިންޓަނޭޝަނަލް މުބާރާތްތައް ބާއްވާ ތަނެއްގެ ގޮތުގައި ޕްރޮމޯޓް ކުރެވިގެންދާނެ ކަމަށްވެސް ވިދާޅުވި އެވެ.
ގައުމީ ޓީމުގައި އުޅުމަށްފަހު ރިޓަޔާ ކުރެވޭ މީހުނަށް މާލީ އެހީތެރިކަން ދޭނެ ކަމަށް ވެސް އިބޫ ވިދާޅިވި އެވެ. އަދި ވިދާޅުވީ ގައުމީ ޓީމުތަކުގެ އަންނެހެން އަދި ފިރިހެން ކުޅުންތެރިންނަށް މުސާރައިގެ ހަމަހަމަކަން ގެނެސްދޭނެ ކަމަށެވެ.
ކުޅިވަރު ކުރިއެރުމަށް އޮތް އެންމެ ބޮޑު ހުރަހަކީ އެކަމާ ގުޅޭ އެސޯސިއޭޝަން ސިޔާސީ ވުން ކަމަށާއި އެމަނިކުފާނުގެ ވެރިކަމުގައި އެންމެހައި ސިޔާސީ ނުފޫޒުން އެތަންތަން މިނިވަން ކުރެވޭނެ ކަމަށްވެސް ވިދާޅުވެއެވެ.
