ރާއްޖެ މިހާރު މިއޮތީ މިމަހުގެ 23 ގައި ބާއްވާ އިންތިޚާބުގައި "އަތު ނުވިއްޔާ އަތު ނުވާ ހިސާބުގައި" ކަމަށާއި މިއީ ދިވެހިރާއްޖެ ސަލާމަތްކުރަން ރައްޔިތުނަނަށް ލިބޭނެ ފަހު ފުރުސަތު ކަމަށް ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހުސެއިން މުހައްމަދު ވިދާޅުވެއްޖެއެވެ.
ގުޅިފައިވާ ޕާޓީތަކުން ޅ. ހިންނަވަރުގައި ބޭއްވި ޖަލްސާގައި ވާހަކަ ދައްކަވަމުން ހުސައިން މުހައްމަދު ވިދާޅުވީ ރާއްޖޭގައި މިހާރު ޑިމޮކްރަސީ ނެތްކަމަށާއި އެ ޑިމޮކްރަސީ އަނބުރާ ހޯދުމަށް 23 ވަނަ ދުވަހު ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު(އިބޫ)އަށް ވޯޓްލާންޖެހޭ ކަމަށެވެ. އަދި ރައްޔިތުންގެ އަތުން ގެއްލިފައިވާ ހައްގުތައް އަނބުރާ ހޯދުމަށް ވެސް އިބޫއަށް ވޯޓުލުމަށް އޭނާ އެދިވަޑައިގަތެވެ.
"ރާއްޖޭގައި ޑިމޮކްރަސީއެއް ނެތް. ރާއްޖޭގެ ގާނޫނު ހަދާ މަޖިލީހުގެ ބާރެއް ނަމަކަށް އޮތީ. ޝަރުއީ ދާއިރާ އޮތީ އެ ހާލުގައި. މިނިވަން މުއައްސަސާއެއް ނެތް. [އެހެންވެ] ހުދުމުހުތާރުކަމުގެ ސިފަތައް ގެންނަ ގާނޫނުތައް އިބޫ އުވާލައްވާނެ. ގެއްލުނު ޑިމޮކްރަސީ އަނބުރާ ގެނެސްދޭނެ." ހުސެއިން މުހައްމަދު ވިދާޅުވިއެވެ.
އޭނާ ވިދާޅުވީ އެހެން ރަށްރަށުން ނުކުރާ ވަރަށް ފާދިއްޕޮޅާއި ހިންނަވަރުން އިބޫ ހޮވުމަށް މަސައްކަތް ކުރަންޖެހޭކަމަށެވެ. ހިންނަވަރަށް ކުރިމަތިވެފައި އޮތީ ބޮޑު ނަސީބެއްކަމަށާއި ރާއްޖޭގެ އެންމެ ޝަރަފުވެރި މަގާމު ގެނައުމަށް ހިންނަވަރުގެ ހުރިހާ ރައްޔިތުން އަތުގުޅާލުމަށް އޭނާ ވަނީ ގޮވާލައްވާފައެވެ. އިބޫ ހޮވުމަށް ކުރާ މަސައްކަތް ދެގުނައަށް އިތުރު ކުރަންޖެހޭކަމަށް އޭނާ ވިދާޅުވިއެވެ.
