ފޭސް ރެކޮގްނިޝަން ޓެކްނޮލޮޖީ، ނޫސްވެރިންނަށް ދައްކާލައިފި، އެމްޑީޕީން ބުނީ ޑަބަލް ވޯޓުލުމުގެ ފުރުސަތު ކުޑަވެގެންދާނެ ކަމަށް!
14 ސެޕްޓެމްބަރު 2018 | ހުކުރު 17:51ފޭސް ރެކޮގްނިޝަން ޓެކްނޮލޮޖީ ނޫސްވެރިންނަށް ދައްކާލައިފައިވަނީ މެލޭޝިޔާގައި ކުރިއަށްގެންދިޔަ ކެމްޕޭން ހަރަކާތަށްފަހު
ފޭސް ރެކޮގްނިޝަން ޓެކްނޮލޮޖީ މަސައްކަތްކުރާގޮތް ނޫސްވެރިންނަށް ދަައްކާލަނީ
ކުރިއަށް އޮތް ރިޔާސީ އިންތިހާބާއި ދިމާކޮށް، އެމްޑީޕީ ބޭނުންކުރާނެކަން އިއުލާންކުރި އިންސާނާގެ ސޫރައިން އޭނާގެ ވަނަވަރު ދެނެގަންނާނެ ގޮތް ނުވަތަ ފޭސް ރެކޮގްނިޝަން ޓެކްނޮލޮޖީ ނޫސްވެރިންނަށް ދައްކާލައިފި އެވެ.
ކުރިއަށް އޮތް ރިޔާސީ އިންތިހާބަށް ހާއްސަކޮށްގެން އެމްޑީޕީން ތައްޔާރުކުރި ފޭސް ރެކޮގްނިޝަން ޓެކްނޮލޮޖީ ނޫސްވެރިންނަށް ދައްކާލައިފައިވަނީ މެލޭޝިޔާގައި ކުރިއަށްގެންދިޔަ ކެމްޕޭން ހަރަކާތަށްފަހު އެވެ. އެ ޓެކްނޮލޮޖީ މަސައްކަތްކުރާގޮތަށް ބަލާއިރު، އިންތިހާބަށް ވޯޓުލުމަށް ކިއޫގައި ތިބޭއިރު، އެއީ ކޮން ބަޔެއްކަން ދަނެގަނެ އެވެ. އަދި އެއް މީހަކު ދެ ފަހަރަށް ވޯޓުލާކަމުގައިވާނަމަ އެކަން ބުނެދެ އެވެ.
ފޭސް ރެކޮގްނިޝަން ޓެކްނޮލޮޖީ ނޫސްވެރިންނަށް ދައްކާލުމަށްފަހު ނޫސްވެރިންނަށް މައުލޫމާތުދެއްވަމުން އެމްޑީޕީގެ ޗެއަރޕާސަންގެ ހަސަން ލަތީފް ވިދާޅުވީ އެ ޓެކްނޮލަޖީއާއެކު ވޯޓުލާ މަރުކަޒުތަކުގައި މީހުން މޫނު އެ ބޭފުޅުންނަށް ޑިޑެކްޓްކުރެވޭނެ ކަމަށެވެ. އަދި އެއާއެކު ޑަބަލް ވޯޓުލުމުގެ ފުރުސަތު ވަރަށް ބޮޑަށް ކުޑަވެގެންދާނެ ކަމަށާއި، އެ ޓެކްނޮލަޖީ ބޭނުންކުރުމަށް އެންމެ ފަހުގެ ތައްޔާރީތައްވަމުން އަންނަ ކަމަށެވެ.
ހަސަން ލަތީފް ވިދާޅުވީ ކުރިއަށް އޮތް ރިޔާސީ އިންތިހާބުގައި ވޯޓު ފޮށި ބަހައްޓާ ކޮންމެ މަރުކަޒެއްގައިވެސް އެމްޑީޕީން އެ ޓެކްނޮލޮޖީ ބޭނުންކުރާނެ ކަމަށެވެ. ނަމަވެސް އެކަން ކުރާނެގޮތާއި ގުޅޭގޮތުން މަޝްވަރާތައް ކުރިއަށްގެންދަވާކަމަށް ހަސަން ލަތީފް ވިދާޅުވި އެވެ.
"އަބަދުވެސް ކުރާ ޝަކުވާއެއް އަދި އޮންނަ ތުހުމަތެއް އެއީ އެކަކު ދެ ވޯޓު ފޮށްޓައް ވޯޓުލާކަމުގެ ވާހަކަ. ޝަކުވާ. ދެން އަބަދުވެސް އެ ތުހހުމަތުވެސް އޮވޭ ސަރުކާރަށް. އެހެންވީމަ އިރާދަކުރެއްވިޔާ އަޅުގަނޑުމެންނަށް މި ސިސްޓަމް ބޭނުންކުރަން ފެށީމަ ެކަން ކުރމުގެ ފުރުސަތު ވަރަށް ބޮދާށް ހަނިވެގެންދާނެ"
ފޭސް ރެކޮގްނިޝަން ޓެކްނޮލޮޖީ އެމްޑީޕީން ބޭނުންކުރަން ފަށާއިރު ސަރުކާރުގެ އިދާރާއަކުން އެފަދަ ޓެކްނޮލޮޖީއެއްގެ ބޭނުން ކުރަން ފަށާފައެއް ނުވެ އެވެ. އޭޝިއާ ސަރަހައްދުގައި ވެސް އެ ޓެކްނޮލޮޖީ ބޭނުން ކުރަނީ މަދު ގައުމަކުންނެވެ. މަގުތަކާއި މީހުން އެއްވެ އުޅޭ ތަންތަނުގައި ފޭސް ރެކޮގްނިޝަން ކެމެރާ ހަރުކޮށްގެން، މޮނީޓާ ކުރަމުންދާ އޭޝިއާގެ ގައުމުތަކަކީ ސިންގަޕޫރާއި މެލޭޝިއާގެ އިތުރުން ޗައިނާއެވެ.
