ނެށުމުގެ ފަރިތަކުރުންތައް ވީޑިއޯކުރަންދިޔަ ރާއްޖެޓީވީގެ ނޫސްވެރިންނަށް ހުރަސްއަޅައިފި
14 މާރިޗު 2017 | އަންގާރަ 22:19ރާއްޖެޓީވީގެ ކެމެރާމަން ނުކުތުމަށް މަޖުބޫރުކުރި
އެޑިއުކޭޝަންގެ އޮފިޝަލް ރާއްޖެޓީވީއަށް ހުރަސްއަޅަނީ
އެޗްވަންއެންވަން ވައިރަސް ފެތުރެމުންދާތީވެ ސުކޫލުތައް ބަންދުކުރުމަށްފަހު، އަދި މީހުން ގިނައިން އެއްވާ ތަންތަނަށް ކުޑަކުދިން ނުގެންދިއުމަށް ހެލްތު މިނިސްޓްރީން ލަފާދީފައިވަނިކޮށް، ސައުދީ ރަސްގެފާނު ސަލްމާން ބިން އަބްދުލް އަޒީޒް ރާއްޖެ ވަޑައިގަންނަވާއިރު މަރުހަބާ ދެންނެވުމަށް ބާއްވާ ނެށުމުގެ ހަރަކާތަކަށް ސްކޫލް ކުދިން އެއްކޮށްގެން ފަރިތަކުރުންތައް ވީޑިއޯކުރަންދިޔަ ރާއްޖެޓީވީގެ ނޫސްވެރިންނަށް ހުރަސްއަޅައިފި އެވެ.
އެޗްވަންއެންވަން ވައިރަސް ހަލުވިކަމާއެކު މާލެޔާއި، ރައްޖޭގައި ފެތުރެމުންދާއިރު ސްކޫލްތަކުގެ ކިޔެވުން ބަންދުކޮށްފައިވީ ނަމަވެސް ސައުދީ ރަސްގެފާނު ރާއްޖެ ވަޑައިގަންނަވާތީވެ، މަރުހަބާ ދެންނެވުމަށް ބާއްވާ ނެށުމުގެ ފަރިތަކުރުންތައް ކެންސަލް ކޮށްފައެއް ނުވެއެވެ.
އެގޮތުން ގިނަ ސުކޫލް ކުދިންތައް އެއްކޮށް، ނެށުމުގެ ފަރިތަކުރުންތައް ކުރިއަށްގެންދަނީ ހިރިޔާ ސްކޫލުގައެވެ. ހިރިޔާ ސްކޫލް ހުންނަނީ، އައިޖީއެމްއެޗްގެ "ފްލޫ ކްލިނިކް" ޤާއުމްކޮށްފައި ހުންނަ ތާޖުއްދީން ސުކޫލާއި އިންވެގެންނެވެ.
ނެށުމުގެ ފަރިތަކުރުންތަކުގެ މަންޒަރު ނެގުމަށް ރާއްޖެޓީވީގެ ޓީމުން ހިރިޔާ ސުކޫލަށް ދިޔުމާއެކު، އެ ސްކޫލްގައި ހުރި އޮފިޝަލަކު ވަނީ ރާއްޖެޓީވީގެ ކެމެރާ މަތީގައި އަތް އަޅާފަ އެވެ. އަދި އެއަށްފަހު، ރާއްޖެޓީވީގެ ޓީމުން ވަނީ އެތަނުން ނިކުތުމަށް މަޖުބޫރުކޮށް، ނެރެފައެވެ.
ޕްރެކްޓިސް އަށް ގެންދަނީ ބައެއް ސްކޫލްތަކުގެ ގްރޭޑް 6 އަދި 7 ގެ ދަރިވަރުންނެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ކޮންމެ ރެޔަކު 8:00 ން 10:00 ށް ނެށުމުގެ ޕްރެކްޓިސް ބޭއްވުމަށް ވަނީ ހަމަޖެހިފައެވެ.
ސްކޫލްތަކުން ބައިވެރިވާ މި ނެށުމުގައި 100 އެއްހާ ކުދިން ބައިވެރިވާ ކަމުގެ މައުލޫމާތުވެސް ރާއްޖެ އެމްވީއަށް ވަނީ ލިބިފައެވެ.
