ޕީޕީއެމްގެ ޖަގަހަކަށް ގެއްލުންދިން ކަމުގެ ތުހުމަތުގައި ގއ. ކޮލަމާފުށިން ހައްޔަރުކުރި އެމްޑީޕީގެ އެކްޓިވިސްޓުންގެ ބަންދުގެ މުއްދަތު ގއ. ވިލިނގިލީ މެޖިސްޓްރޭޓް ކޯޓުން އިތުރުކޮށްފިއެވެ.

ދިދަ ދެމުމުގައި ދިމާވި މައްސަލައަކާ ގުޅިގެން ޕީޕީއެމްގެ ދިދަތަކަކާއި ޖަގަހައަކަށް ގެއްލުން ދިން ކަމުގެ ތުހުމަތުގައި އެމްޑީޕީގެ 18 އެކްޓިވިސްޓަކު ކޮލަމާފުށިން ހައްޔަރުކޮށްފައި ވަނީ މިދިޔަ މަހުގެ 30 ވަނަ ދުވަހުއެވެ. އެ މީހުންގެ ބަންދަށް ފުރަތަމަ ޖެހީ 15 ދުވަހެވެ.

އެ މީހުންގެ ބަންދަށް ފުރަތަމަ ޖެހި 15 ދުވަސް ހަމަވުމާއި ގުޅިގެން، ބަންދާ މެދު ގޮތެއް ނިންނުމަށް ހުކުރު ދުވަހުގެ ހަވީރު ވިލިނގިލީ މެޖިސްޓްރޭޓް ކޯޓަށް ހާޒިރުކުރުމުން، އޭގެ ތެރެއިން 17 މީހެއްގެ ބަންދަށް ވަނީ 15 ދުވަސް އިތުރުކޮށްފައެވެ. އަދި އެކަކުގެ ބަންދުގެ މުއްދަތު 12 ދުވަހަށް ވަނީ އިތުރުކޮށްފައެވެ.

ހަވީރު 4:30 ހާއިރު ބަންދާއި މެދު ގޮތެއް ނިންމުމަށް ފެށި މަޖިލިސް ނިންމާލާފައި ވަނީ ރޭގަނޑު 11:00 ހާއިރުއެވެ. ބަންދުގެ މުއްދަތުގެ މަޖިލިސް ކުރިއަށް ގެންގޮސްފައި ވަނީ ސިއްރުކޮށްގެންނެވެ.

ކޮލަމާފުށިން ހައްޔަރުކުރި 18 މީހުންގެ މައްޗަށް ވެސް ޓެރަރިޒަމުގެ ތުހުމަތު ކޮށްފައިވާއިރު، އެ މީހުންގެ ދިފާއުގައި ވަކީލުންގެ ބޮޑު ޓީމެއް ވަނީ ވިލިނގިއްޔަށް ވަޑައިގެންފައެވެ. ހައްޔަރުކުރި ކޮންމެ މީހަކަށް ވަކީލެއް ވަނީ ހަމަޖައްސާފައެވެ.

ހައްޔަރުކުރި މީހުންގެ ތެރެއިން ކޮންމެ މީހަކަށް ވަކި ވަކީލެއް އައްޔަންކޮށްފައި ވަނީ، އެއް ތުހުމަތެއްގައި ހިމެނޭ ދެ މީހަކަށް، އެއް ވަކީލެއް އައްޔަން ނުކުރެވޭނެ ކަމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައި ވާތީއެވެ.

ބަންދުގެ މަޖިލީހަށް ހާޒިރުވި ވަކީލުން ވިދާޅުވި ގޮތުގައި، ބަންދުގެ މުއްދަތު އިތުރުކޮށްފައި ވަނީ ގާނޫނީ ގޮތުން ފުރިހަމަ ވާންޖެހޭ އިޖުރާއަތު ފުރިހަމަ ވެފައިވޭތޯ ބެލުމެއް ނެތިއެވެ. އަދި ވަކީލުންގެ އިއުތިރާޒުތަކާ މެދު ގޮތެއް ނިންމުމެއް ވެސް ނެތިއެވެ.

ކޮލަމާފުށީގައި އެމްޑީޕީ އާއި ޕީޕީއެމްގެ ސަޕޯޓަރުންގެ މެދުގައި ހިނގި ހަމަނުޖެހުންތަކާ ގުޅިގެން ހަމައެކަނި އެމްޑީޕީގެ ސަޕޯޓަރުން ހައްޔަރުކޮށްފައި ވާތީ އެޕާޓީ އިން ދަނީ ކަންބޮޑުވުން ފާޅުކުރަމުންނެވެ.