މިމަހުގެ 6 ދުވަހަކަށް އާޓިފިޝަލް ބީޗް ހޯދުމަށް އެމްޑީޕީން އެދިއްޖެ
12 ސެޕްޓެމްބަރު 2018 | ބުދަ 10:27އަޓިފިޝަލް ހޯދުމަށް އެދިފައިވަނީ މިމަހުގެ 13 އިން 15 އަށް އަދި 20 އިން 22 އަށް
ގުޅިފައިވާ ޕާޓީތަކުން ކާނިވަލުގައި ބޭއްވި ބޮޑު ޖަލްސާގެ ތެރެއިން
ގުޅިފައިވާ ޕާޓީތަކުގެ ކެމްޕެއިން ހަރަކާތްތަކަށް މިމަހުގެ 6 ދުވަހަކަށް އާޓިފިޝަލް ބީޗް ހޯދުމަށް އިދިކޮޅު މައި ޕާޓީ މޯލްޑިވިއަން ޑިމޮކްރާޓީކް ޕާޓީ (އެމްޑީޕީ)އިން އެދެފިއެވެ.
އެމްޑީޕީން ހައުސިންގ މިނިސްޓްރީއަށް ފޮނުވި ސިޓީގައި ބުނެފައިވަނީ މިމަހުގެ 23 ވަނަ ދުވަހު އޮންނަ ރިޔާސީ އިންތިޚާބުގައި ވާދަކުރައްވާ އެމްޑީޕީ އަދި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހްގެ ކެންޑިޑެސީ ޖުލައި މަހުގެ 28 ވަނަ ދުވަހު ވަނީ އިލެކްޝަން ކޮމިޝަނުން ބަލައިގެންފައި ކަމަށެވެ.
އަދި ހުރިހާ ކެންޑިޑޭޓުންނަށްވެސް ހަމަހަމަކަމާއި އިންސާފުވެރިކަމާއެކު ކެމްޕޭން އަދި ސިޔާސީ ހަރަކާތް ހިންގުމުގެ ފުރުސަތު ލިބިގެންދާނެ ކަމުގެ ޔަގީންކަން ވަނީ ސަރުކާރުންނާ އިލެކްޝަންސް ކޮމިޝަނުން ދެއްވާފައި ކަމަށެވެ. އެހެންކަމުން މިމަހުގެ 13 އިން 15 އަށް އަދި 20 އިން 22 އަށް އާޓިފިޝަލް ބީޗް އެޕާޓީއަށް ދިނުމަށް އެދޭކަމަށް އެމްޑީޕީން ފޮނުވި ސިޓީގައި ބުނެފައިވެއެވެ.
އެމްޑީޕީން އެދިފައިވަނީ މި ހަދުވަހުގެ ހެދުނު 6 އިން މެންދަމު 12 އަށް އާޓިފިޝަލް ބީޗް ހޯދުމަށެވެ.
ވޭތުވެ ދިޔަ ތިން އަހަރަށްފަހު އިދިކޮޅު ފަރާތްތަކުން ޖަލްސާއެއް ބޭއްވުމަށް ކާނިވާ ސަރަހައްދު ދޫކޮށްފައިވަނީ މިމަހުގެ 8 ވަނަ ދުވަހުއެވެ. އެރޭ ގުޅިފައިވާ ޕާޓީތަކުން ބޭއްވި ޖަލްސާ ވެފައިވަނީ މިހާތަނަށް ކާނިވާ ސަރަހައްދަށް އެންމެ ގިނަ މީހުން ޖަމާވި ޖަލްސާއަށެވެ.
