އިންތިޚާބުގެ އެކި ކަންކަމާ ގުޅިގެން މިހާތަނަށް 19 މީހަކު ހައްޔަރު ކޮށްފައިވާ ކަމަށް ފުލުހުން ބުނެފިއެވެ.

ފުލުހުން ކޮށްފައިވާ ޓްވީޓެއްގައި ބުނެފައި ވަނީ އޭގެ ތެރޭގައި ހިމެނެނީ ކޮލަމާފުށިން ހައްޔަރުކުރި 18 މީހުންނާއި ގދ. ގައްދޫ މަރިޔާދުގެ ރޯކޮށްލި މައްސަލައާ ގުޅިގެން ހައްޔަރުކޮށްފައިވާ މީހެއް ކަމަށެވެ. 

ޖަގަހައަށް ގެއްލުންދިން ކަމަށް ބުނެ ގއ. ކޮލަމާފުށިން 18 މީހުން ހައްޔަރު ކޮށްފައި ވަނީ މިދިޔަ މަހުގެ 18 ވަނަ ދުވަހުއެވެ.

ގއ. ވިލިނގިލި މެޖިސްޓްރޭޓް ކޯޓުން ނެރެފައިވާ ކޯޓު އަމުރެއްގައި ބުނެފައި ވަނީ އޯގަސްޓް 29 ވަނަ ދުވަހު ހަވީރު 06:00 ޖަހާކަން ހާއިރު ރަށުތެރޭގައި ހަމަނުޖެހުން ހިންގައި މުދަލަށް ގެއްލުންދީ މާރާމާރީ ހިންގާ މަސައްލައިގައި ބައިވެރިވެފައިވާ ކަމަށް ތުހުމަތު ކުރެވޭތީ މައްސަލައިގައި ހެކިބަސް ދިނުމަށް ތިބޭ މީހުންނަށް ނުފޫޒެއް ފޯރުވާފާނެ ކަމަށް ފެންނާތީ އާއި މުޖުމަތައުގެ ސަލާމަތާއި ރައްކާތެރިކަމަށްޓަކައި ހައްޔަރު ކުރަން ބޭނުންވާ ކަމަށެވެ.

ގދ. ގައްދޫ ބަނދަރުމަތީގައި ހަދާފައިވާ މަރިޔާދުގޭގައި ރޯކޮށްލި މައްސަލާގައި އޮގަސްޓް މަހުގެ 20 ވަނަ ދުވަހު ހައްޔަރު ކޮށްފައިވަނީ 41 އަހަރުގެ ފިރިހެނެކެވެ. ގައްދޫ ބަނދަރުމަތީގައި ހަދާފައިވާ މަރިޔާދުގެއަކީ ރައީސް ޔާމީން ހުވަދު އަތޮޅަށް ކުރެއްވި ދަތުރުފުޅުގައި އެމަނިކުފާނަށް މަރުހަބާ ދެންނެވުމަށް ހެދި ތަނެކެވެ. 

"އިންތިޚާބުގެ އެކި ކަންކަމާ ގުޅިގެން ގިނަ ޢަދަދެއްގެ ބަޔަކު ހައްޔަރުކޮށްފައިވާކަމަށް ބުނެ އެކި ފަރާތްތަކުންނާއި މީސްމީޑިއާގައި ފަތުރަމުންދާ މަޢުލޫމާތުތަކާ ގުޅިގެން ދަންނަވަމެވެ. އިންތިޚާބުގެ ކަންކަމާ ގުޅިގެން ފުލުހުންގެ ހައްޔަރުގައި ތިބީ 19 މީހުންނެވެ.

އިންތިޚާބާ ގުޅޭ މައްސަލަތަކުގައި މިހާތަނަށް 19 މީހުން ހައްޔަރުކޮށްފައިވާ އިރު މީގެ ތެރޭގައި ހިމެނެނީ ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހަށް ތާއީދުކުރާ ފަރާތްތަކެވެ. ނަމަވެސް ހުޅުމާލޭގައި އިބޫ އަށް ހަމަލާދޭން އުޅުނު މީހާ އާއި ގުޅިފައިވާ ޕާޓީތަކުގެ ކެމްޕެއިން މެޓީރިއަލްތަކަށް ގެއްލުން ދޭ މަންޒަރުތައް އާންމުވެފައިވާ އިރު އެ ފަރާތްތަކާ މެދު މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.