ގުޅިފައިވާ ޕާޓީތަކުގެ ޖަލްސާއާއި ދިމާކޮށް ބުރިޖުގެ ބަހުގެ ޚިދުމަތް މެދުކަނޑާލައިފި
8 ސެޕްޓެމްބަރު 2018 | ހޮނިހިރު 14:05މިއަދު ހަވީރު 4:00 އިން މިރޭ 12:00އާ ހަމައަށް ބަހުގެ ޚިދުމަތް ނުލިބޭނެ މައުލޫމަތު ލިބޭ
ބުރިޖުގެ މަތިން ބަހެއް ދަތުރުކުރަނީ
ގުޅިފައިވާ ޕާޓީތަކުގެ ޖަލްސާއާއި ދިމާކޮށް ހުޅުމާލެ-މާލެ ބުރިޖުގެ ބަހުގެ ޚިދުމަތް މެދުކަނޑާލައިފިއެވެ.
ރާއްޖެ.އެމްވީއަށް މައުލޫމާތު ދެއްވަމުން ބަހުގެ ޚިދުމަތްދޭ މޯލްޑިވްސް ޕޯރޓްސް ލިމިޓެޑް (އެމްޕީއެލް)ގެ އޮފިޝަލެއް ވިދާޅުވީ ބަހުގެ ޚިދުމަތް ރަސްމީކޮށް ނުފަށާ ކަމަށާއި، ހުކުރު ދުވަހު ބަހުގެ ޚިދުމަތް ދިނީ އާންމުކޮށް ބުރިޖު ހުޅުވާލި ފުރަތަމަ ދުވަހަށްވީމަ ކަމަށެވެ.
"އަސްލު ރަސްމިއްޔާތަކަށްފަހު ބަހުގެ ޚިދުމަތް ދިނުމަށް ހަމަޖެހިފައި އޮތީ. އިއްޔެ ބަހުގެ ޚިދުމަތް ދިނީ ފުރަތަމަ ދުވަސްވީމަ. އެއީ ރަސްމީކޮށް ނޫން،" އޮފިޝަލް ވިދާޅުވިއެވެ.
ބަހުގެ ޑްރައިވަރުން މައުލޫމާތުދޭ ގޮތުގައި މިއަދު ހަވީރު 4:00 އިން މިރޭ 12:00 އާހަމައަށް ބަހުގެ ޚިދުމަތް ނުލިބޭނެއެވެ.
ކޯލިޝަންގެ ޖަލްސާ ހޮނިހިރު ދުވަހުގެ ރޭ ކާނިވާ ސަރަހައްދުގައި ބޭއްވުމަށް ނިންމާއިފައިވާއިރު ޕީޕީއެމްގެ ޖަލްސާ ހުކުރު ދުވަހުގެ ރޭ ވަނީ ބާއްވާފައެވެ. އަދި މިޖަލްސާއަށް ހުޅުމާލެއިން މާލެއަށް އާންމުންގެ ގިނަ ބަޔަކު ބަހުގައި ވަނީ ގެނެސްދީފައެވެ.
އެމްޕީއެލުން ބަހުގެ ޚިދުމަތް ދިނުމަށް މާލެއަށް މިހާރު ނުވަ ބަސް ގެނެސްފައިވާއިރު، ބަހުގެ ދަތުރުގެ އަގުތަކާއި ޝެޑިއުލް އިއުލާން ކުރާނީ ރަސްމީކޮށް ދަތުރުތައް ފަށާ އިރުއެވެ. ޖުމްލަ 22 ބަސްމާލެ ގެނެއުމަށް ނިންމާފައެވެ.
ބަހުގެ ޚިދުމަތް މެދުކަނޑާލުމުގެ އިތުރުން ހަތަރު ފުރޮޅުލީ ވެހިކަލްތައްވެސް އެގަޑިތަކުގައި ދުއްވުން ވަނީ މަނާކޮށްފައެވެ.
