ޝާހިދު ކަޕޫރާއި މީރާއަށް ފިރިހެން ކުއްޖެއް ލިބިއްޖެ
6 ސެޕްޓެމްބަރު 2018 | ބުރާސްފަތި 04:10އެދެމީހުންނަށް ދަރިއަކު ލިބިފައިވަނީ އިއްޔެ
ޝާހިދާއި މީރާ، އެ ދެ މީހުންގެ ފުރަތަމަ ދަރިފުޅު މީޝާ ގޮވައިގެން
ފިލްމީ ތަރި ޝާހިދު ކަޕޫރާއި އޭނާގެ އަންހެނުން މީރާ އަށް ފިރިހެން ދަރިއަކު ލިބިއްޖެއެވެ.
އިންޑިއާގެ ނޫސްތަކުން ބުނެފައިވާ ގޮތުގައި މީރާ ވިހާފައިވަނީ މުމްބާއީގެ ހޮސްޕިޓަލެއް ކަމަށްވާ ހިންދޫޖާ ހޮސްޕިޓަލުގައި ބުދަ ދުވަހު (5 ސެޕްޓެމްބަރ)ގައި ކަމަށެވެ.
ޝާހިދާއި މީރާއަށް މީގެ ކުރިން ވަނީ އަންހެން ކުއްޖަކު ލިބިފައެވެ. އެކުއްޖާއަށް ކިޔާފައިވަނީ މީޝާއެވެ. މީޝާ ކަޕޫރު އުފަންވީ 2016 ވަނަ އަހަރުގެ އޮގަސްޓު މަހުގެ 26 ގައެވެ. ބޭނުންވަނީ ކޮންކަހަލަ ކުއްޖެއްތޯ އިންސްޓަގްރާމުގައި މީގެ ކުރިން މީރާގެ ކައިރިން ވަނީ އަހާފައެވެ. މީރާ ބުނެފައިވަނީ ކޮންމެ ކަހަލަ ކުއްޖެއްވިއަސް އޭނާއަށް ރަނގަޅު ކަމަށާއި ބޭނުންވަނީ ސިއްހަތު ރަނގަޅު ދަރިއެއްކމަަށެވެ.
ޝާހިދަށް ވުރެ 13 އަހަރު މީރާ ހަގެވެ. އެ ދެ މީހުން ކައިވެނިކޮށްފައި ވަނީ 2015 ވަނަ އަހަރުއެވެ.
ކާމިޔާބު ފިލްމުތައް ގެނެސްދީފައިވާ ޝާހިދު ކަޕޫރުގެ ކުރިއަށް އޮތް ފިލްމަކީ އަންނަ އޮކްޓޯބަރގައި ޝޫޓިން ފަށާ އަރުޖުން ރެޑީގެ ރިމޭކިންއެވެ. އެ ފިލްމުގެ ޝޫޓިންއަށް ޝާހިދު ދާން ހަމަޖެހިފައި ވަނީ މީރާ އާއި ދެ ދަރިން ގޮވައިގެން ކަމަށް ރިޕޯޓްތައް ބުނެއެވެ.
އިއްޔެ އުފަންވި ކުއްޖާއަށް ދޭނެ ނަމަކާއި ބެހޭ ގޮތުން ޝާހިދާއި މީރާގެ ފޭނުން ސޯޝަލް މީޑިއާގައި ދަނީ އެކި ނަންތައް ކިޔަމުންނެވެ.
