ގެމަނަފުށީގެ ގިނަ ޒުވާނުންނާއެކު ގއ. އަތޮޅު ކައުންސިލްގެ ނައިބު ރައީސް އެމްޑީޕީއަށް
އިބޫއަށް ގެމަނަފުށިން ވަނީ ހޫނު މަރުހަބާއެއް ކިޔާފައި
ގެމަނަފުށިން އެމްޑީޕީއާ ގުޅުނު ޒުވާނުން އިބޫއާ ސަލާމް ކުރައްވަނީ
ގެމަނަފުށީގެ ގިނަ އަދަދެއްގެ ޒުވާނުންނާ އެކު، ގއ. އަތޮޅު ކައުންސިލްގެ ނައިބު އަހުމަދު ނަޒްމީން އެމްޑީޕީއަށް ސޮއި ކުރައްވައިފިއެވެ.
ގއ. އަތޮޅު ކައުންސިލްގެ ނައިބު ރައީސް އަހުމަދު ނަޒްމީން އެމްޑީޕީއަށް ސޮއި ކުރެއްވީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގއ. ގެމަނަފުށްޓަށް ވަޑައިގަތުމުން އެ ރަށުގައި ބޭއްވި ޖަލްސާއެއްގައެވެ.
އަމިއްލަ ގޮތުން ގއ. އަތޮޅު ކައުންސިލަށް އިންތިހާބުވެވަޑައިގެންނެވި ނަޒްމީން ހޮނިހިރު ދުވަހު އެމްޑީޕީއާ ގުޅިވަޑައިގެންނެވި ހަފްލާގައި ގެމަނަފުށީގެ ގިނަ އަދަދެއްގެ ޒުވާނުން ވެސް ވަނީ އެމްޑީޕީއަށް ސޮއިކޮށްފައެވެ. ނަޒްމީންއަކީ ގެމަނަފުށްޓަށް ނިސްބަތްވެވަޑައިގަންނަވާ، އެ ދާއިރާ އަތޮޅު ކައުންސިލްގައި ތަމްސީލު ކުރައްވާ މެމްބަރެކެވެ.
ނަޒްމީން އެމްޑީޕީއާ ގުޅިވަޑައިގެންނެވީ ގެމަނަފުށީގައި ބޭއްވި ގުޅިފައިވާ ޕާޓީތަކުގެ ޖަލްސާގައި
ހޮނިހިރު ދުވަހު އިބޫ ގެމަނަފުއްޓަށް ވަޑައިގަތުމުން އެ ރަށުގެ ގިނަ ބަޔަކު ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ. މީގެ ކުރިން ޕީޕީއެމަށް ތާއިދު ބޮޑު، ގެމަނަފުށީގައި މިހާރު އަގުލަބިއްޔަތު އޮތީ ގުޅިފައިވާ ޕާޓީތަކަށެވެ. އެގޮތުން އެ ރަށު ކައުންސިލްގެ މެޖޯރިޓީ ވެސް އޮތީ އެމްޑީޕީއަށެވެ.
