ހެއްލިވަޑައިނުގެން ރައްކާތެރިކަން ހޯއްދެވުމަށް ސަން ސިޔާމަށް ޑރ. ޖަމީލު ގޮވާލައްވައިފި
29 އޯގަސްޓު 2018 | ބުދަ 06:47ރައީސް ޔާމީންގެ ކެމްޕެއިން ކުރައްވަމުން ގެންދަވާއިރު، ސިޔާމުގެ ބައިވެރިވުން ނުފެނޭ
ސަން ސިޔާމު: ރައީސް ޔާމީންގެ އަނބިކަނބަލުން ފާތުމަތު އިބްރާހީމްދީދީ ހިންގެވި ހަރަކާތެއްގެ ތެރެއިން
ރައީސް އަބްދުﷲ ޔާމީން އަށް ހެއްލިވަޑައިނުގެންނެވުމަށާއި ވަގުތު އޮއްވައި އަވަހަށް ރައްކާތެރިކަން ހޯއްދެވުމަށް މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ)ގެ ލީޑަރު އަދި މަހްޖަނު އަހުމަދު ސިޔާމު މުހައްމަދަށް، ރައީސް ޔާމީން ސަރުކާރުގެ ފުރަތަމަ ނާއިބު ޑރ. މުހައްމަދު ޖަމީލު އަހުމަދު ގޮވާލައްވައިފިއެވެ.
ޑރ. ޖަމީލު ކުރެއްވި ޓްވީޓެއްގައި ވިދާޅުވީ ރައީސް ޔާމީންގެ އޮޑި ދަނީ ފެތެމުން ކަމަށާއި އަދިވެސް އަމިއްލަ ނަފުސާއި ވިޔަފާރި ސަލާމަތްކުރުމުގެ ފުރުސަތު އެބަ އޮތް ކަމަށެވެ.
ސިޔާމަށް ހެޔޮ ނަސޭހަތެއް ދެއްވުމުގެ ގޮތުން ޖަމީލު ވިދާޅުވީ ރައީސް ޔާމީނަށް ހެއްލިވަޑައިގެން، މުޅި އުމުރުގައި ކުރެއްވި މަސައްކަތް ދޫކޮށް ނުލެއްވުމަށެވެ. އަދި އީޔޫ އާއި ދުނިޔޭގެ އެހެނިހެން ފަރާތްތަކުން ވެސް ތިބީ ކުރިއަށް އޮތް އިންތިހާބު މިނިވަން އިންސާފުވެރި އިންތިހާބަކަށް ހަދަން ކުރެވެން އޮތް ހުރިހާ ކަމަކަށް ތައްޔާރަށް ކަމަށެވެ. އެހެންކަމުން އަވަހަށް ރައްކާތެރިކަން ހޯއްދެވުމަށް ގޮވާލައްވާ ކަމަށް ޖަމީލު ވިދާޅުވެފައި ވެއެވެ.
ވިޔަފާރިވެރިޔާ ސިޔާމް އުފެއްދެވި އެމްޑީއޭ އާއި ޕީޕީއެމްއާ ދެމެދު ވެފައިވާ އެއްބަސްވުމަށް ގޮތެއް ނުނިންމައި، އެ ޕާޓީ ވަގުތީ ގޮތުން ހިންގެވުން ނާއިބު ލީޑަރު އަދި ކެނދިކުޅުދޫ ދާއިރާގެ މެމްބަރު އަލީ މައުރޫފާ ޙަވާލުކުރަން އެމްޑީއޭގެ ކައުންސިލުން އަންގާރަ ދުވަހު ވަނީ ނިންމާފައެވެ.
ރައީސް ޔާމީން ކެމްޕެއިން ހަރަކާތްތައް ކުރިއަށް ގެންދަވާއިރު، ސިޔާމުގެ ބައިވެރިވުމެއް ނުފެނެއެވެ. އަދި އެމްޑީއޭގެ އިސް ބޭފުޅުން ފެންނަލެއް ވެސް މަދުކަން ވަނީ ފާހަގަ ކުރެވިފައެވެ. ޕީޕީއެމް އާއި އެމްޑީއޭއާ ދެމެދު 2013 ވަނަ އަަހަރުގެ ރިޔާސީ އިންތިހާބަށް ހެދި އެއްބަސްވުން އާކުރުމާ މެދު ދެ ޕާޓީގެ މެދުގައި ވަރަށް ބޮޑަށް ހިޔާލު ތަފާތުވެފައިވާ ކަމަށް ރިޕޯޓްތައް ބުނެއެވެ.
