ރިޔާސީ އިންތިޚާބުގެ މިނިވަންކަމާ މެދު ބައިނަލްއަޤްވާމީ މުޖްތަމައުއިން ސުވާލު އުފައްދާފައި ވަނިކޮށް، ސަރުކާރުގެ ދިފާއުގައި މަސައްކަތްކުރައްވާ އިނގިރޭސިވިލާތުގެ ގާނޫނު ހަދާ މަޖިލީހުގެ ދެ މެމްބަރަކު ރާއްޖެވަޑައިގެން އުޅުއްވަނީ އިލެކްޝަންސް ކޮމިޝަނުގެ ދައުލަވަތަކަށް ކަމަށް އެކޮމިޝަނުން ބުނެފިއެވެ.
އިލެކްޝަންސް ކޮމިޝަނުން އާދިއްތަ ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމުގައި "ރާއްޖެއެމްވީ" ކުރި ސުވާލަކާ ގުޅިގެން އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ ރިޔާސީ އިންތިހާބުގެ ކުރިން އިންތިހާބުގެ ކަންކަން ކުރިއަށްދާ ގޮތް އޮބްޒާވްކުރުމަށް ބޭނުންވާ ކަމަށް ވިދާޅުވެ ޔޫކޭ-މޯލްޑިވްސް ޕާލަމެންޓްރީ ގްރޫޕްގެ ދެ ބޭފުޅަކު ޝައުގުވެރިކަން ފާޅުކުރެއްވި ކަމަށެވެ. އެހެންކަމުން އެ ދެ ބޭފުޅުންގެ އެދިލެއްވުމުގެ މަތިން އެބޭފުޅުންނަށް ދައުވަތު ދެއްވި ކަމަށް ވެސް ޝަރީފް ވިދާޅުވިއެވެ.
"ޔޫކޭ-މޯލްސްޑިވްސް ޕާލަމެޓްރީ ގްރޫޕްގެ ދެ ބޭފުޅަކު އަޅުގަނޑުމެންނަށް ޕްރީ އިލެކްޝަން އޮބްޒާވް ކޮށްލަން ބޭނުންވާ ކަމަށް ރިކުއެސްޓް އައީ. އިލެކްޝަންސް ކޮމިޝަނުން އެ ރިކުއެސްޓް ގަބޫލުކޮށް، އިލެކްޝަންސް ކޮމިޝަނުން އިންވައިޓް ކޮށްގެން އައި ބައެއް އެއީ،" އިލެކްޝަންސް ކޮމިޝަނުގެ ރައީސް ޝަރީފް ވިދާޅުވި އެވެ.
ޝަރީފް ވިދާޅުވީ ރިޔާސީ އިންތިހާބާ ގުޅުން ހުރި އިދާރާތަކާ ބައްދަލުކުރުމަށް އިނގިރޭސި ގާނޫނު ހަދާ މަޖިލީހުގެ އެ ދެ ބޭފުޅުން އެދިވަޑައިގެންނެވުމުން، އެފުސަތު ދިނުމުގެ ގޮތުން ކަމާ ގުޅުން ހުރި ހުރިހާ މުއައްސަސާތަކަށް އެކަން ހިއްސާކުރެއްވި ކަމަށެވެ. އަދި ސިޔާސީ ޕާޓީތަކާ ބައްދަލު ކުރެއްވުމަށް ވެސް އެ ދެ ބޭފުޅުން އެދިވަޑައިގެންނެވި ކަމަށް ޝަރީފް ވިދާޅުވިއެވެ.
ނަމަވެސް ޝަރީފް ވިދާޅުވީ އާދިއްތަ ދުވަހުގެ ނިޔަލަށް އެ ދެ ބޭފުޅުންގެ މި ދަތުރުފުޅު ނިންމަވާ ލެއްވިއިރު އެމްޑީޕީ އާއި އެޕާޓީއާ ގުޅިފައިވާ ސިޔާސީ ޕާޓީތަކުން އެ ދެ ބޭފުޅުންނާ ބައްދަލު ކުރެވޭ ގޮތް ނުވާ ކަމަށެވެ.
ޝަރީފް ވިދާޅުވީ ވޯޓާސް ލިސްޓްގެ އަސާސަކީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ ލިސްޓް ކަމަށް ވާތީ އެ މުއައްސަސާއަށް އެ ދެ ބޭފުން ވަޑައިގެންނެވި ކަމަށާއި އެޓާރނީ ޖެނެރަލް އޮފީހަށް ވެސް ވަޑައިގެންނެވި ކަމަށެވެ.
އެ މުއައްސަސާތަކުގެ އިތުރުން ސަރުކާރުގެ އޮފީސްތައް ނެޓްވޯކަކުން ގުޅާލާފައިވާ ދައުލަތުގެ މައި އިދާރާ ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އަށް އެ ދެ ބޭފުޅުން ވަޑައިގަންނަވާފައި ވެއެވެ.
މައުލޫމާތު ލިބިފައިވާ ގޮތުގައި އިލެކްޝަންސް ކޮމިޝަނުން ދައުލަތު ދެއްވައިގެން ރާއްޖެ ގެންނަވާފައި ވަނީ 2016 ވަނަ އަހަރުގެ ކުރީކޮޅު ދިވެހި ސަރުކާރުން ބޮޑު ޚަރަދުކޮށްގެން ބިޒްނަސް ކްލާސް ޓިކެޓް ދީގެން ގެނައި އިނގިރޭސި ގާނޫނު ހަދާ މަޖިލީހުގެ މެމްބަރު ސަރ ޑޭވިޑް އޭމިސް އާއި އެހެން ބޭފުޅެކެވެ.
އެ ދެ ބޭފުޅުން މިފަހަރު ރާއްޖެ ވަޑައިގެންނެވީ އިލެކްޝަންސް ކޮމިޝަނުގެ ދައުވަތަކަށް ކަމެއް މީގެ ކުރިން އެނގިފައެއް ނުވެއެވެ. މީގެ ކުރިން އަޑުފެތުރިފައި ވަނީ އެ ދެ ބޭފުޅުން މި ފަހަރު ވެސް ރާއްޖެ ވަޑައިގެންނެވީ ސަރުކާރުގެ ދައުވަތަކަށް ކަމަށެވެ.
