ރަށްވެހިވެފައިވާ ރަށް ނޫން ރަށެއްގައި ވޯޓުލުމަށް އެދި ރީ-ރަޖިސްޓްރޭޝަން ފޯމު ހުށަހަޅަފައިވާ ފޯމުގައި ނުވަތަ މިހާރު ރަޖިސްޓްރީވެފައި ވާތަނާ މެދު ޝަކުވާއެއް އޮތް ނަމަ ވީހާ ވެސް އަވަހަށް އިލެކްޝަންސް ކޮމިޝަނުގެ އިންތިހާބާ ބެހޭ މަރުކަޒަށް ގޮސް އެ މައްސަލައެއް ހައްލުކުރުމަށް އިލެކްޝަންސް ކޮމިޝަނުން އިލްތިމާސްކޮށްފިއެވެ.
އިލެކްޝަންސް ކޮމިޝަނުގެ އިންތިހާބާ ބެހޭ މަރުކަޒުގައި އާދިއްތަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ ރީ-ރަޖިސްޓްރޭޝަންގައި މައްސަލައެއް އުޅޭ ނަމަ އެ ކަމެއް ހައްލުކޮށްދިނުމަށް މަސައްކަތްކޮށްދެއްވާނެ ކަމަށާއި ނަމަވެސް ރީރެޖިސްޓްރީ ވުމަށް މިހާތަނަށް އެދިފައި ނުވާ ފަރާތަކަށް އަލަށް ރީ-ރަޖިސްޓްރީ ވުމަށް ފުރުސަތެއް ނެތް ކަމަށެވެ.
ޝަރީފް ވިދާޅުވީ މިހާރު ވޯޓާސް ލިސްޓާއި ރީރެޖިސްޓްރޭޝަން ލިސްޓް ފައިނަލް ކުރެވިފައިވާ ކަމަށެވެ. އަދި ހޯމަ ދުވަހުން ފެށިގެން ރީރެޖިސްޓްރޭޝަނާ ގުޅޭ ގޮތުން ޝަކުވާ ހުށަހެޅުމުގެ ފުރުސަތު ހުޅުވާލާނެ ކަމަށާއި އެ ފުރުސަތުގައި މިހާރު ރިޖެކްޓްކޮށްފައިވާ 5626 ފޯމް އަލުން ހުށަހެޅުމަށާއި އަދި ރީ-ރަޖިސްޓްރޭޝަނުގައި ޝަކުވާއެއް އޮތް ނަމަ ހުށަހެޅޭނެ ކަމަށެވެ.
ޝަރީފް ވިދާޅުވީ ރިޕީޓްކޮށް ވަރަށް ގިނަ ފޯމް އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ. އެގޮތުން 11000 އަށް ވުރެ ގިނަ ފޯމް ތަކުރާރުވެފައިވާ ކަމަށް ޝަރީފް ވިދާޅުވިއެވެ.
މިއަހަރުގެ ރިޔާސީ އިންތިހާބުގައި ވޯޓުލުމުގެ ހައްގު ލިބިގެން ވަނީ 262،135 މީހުންނަށެވެ. އޭގެ ތެރެއިން ރަށްވެހިވެފައިވާ ރަށް ނޫން ރަށެއްގައި ވޯޓުލާން އެދޭ ފަރާތްތަކުން ރީރެޖިސްޓްރީ ވުމަށް ފުރުސަތު ހުޅުވާލުމުން 95،739 ފޯމް އިލެކްޝަންސް ކޮމިޝަނަށް ހުށަހަޅާފައި ވެއެވެ. ރީ-ރެޖިސްޓްރީވުމަށް ހުށަހަޅާފައިވާ ފޯމުތަކުގެ ތެރެއިން ފޯމުތަކުގެ ސައްހަކަން ކަށަވަރުކުރުމަށް ފަހު، ރީރެޖިސްޓްރީ ކުރެވިފައި ވަނީ 78،964 ފޯމެވެ. އަދި 5،626 ފޯމް ސައްހަކަން ކަށަވަރުނުވާތީ އިލެކްޝަންސް ކޮމިޝަނުން ވަނީ ރިޖެކްޓްކޮށްފައެވެ. ނަމަވެސް އެ 5،626 ފޯމް ހުށަހެޅި ފަރާތްތަކަށް އެ ފޯމުތަކުގެ ސައްހަކަން ކަށަވަރުވާ ގޮތަށް އަލުން ހުށަހެޅުމުން ބަލައިގަންނާނެ ކަމަށް އިލެކްޝަންސް ކޮމިޝަނުން ބުނެއެވެ.
ރީ-ރަޖިސްޓްރީވުމަށް އިލެކްޝަންސް ކޮމިޝަނަށް 11،149 ފޯމް ތަކުރާރުވާ ގޮތަށް ހުށަހެޅިފައި ވަނީ ރީ-ރަޖިސްޓްރޭޝަނަށް ފޯމު ފުރުމުގެ މައްސައްކަތްތައް ސިޔާސީ ޕާޓީތަކުންނާއި ސަރުކާރުގެ އޮފީސްތަކުންނާއި އަމިއްލަ ބައެއް ފަރާތްތަކުން ކުރުމުގެ ސަބަބުންނާއި ރީ-ރަޖިސްޓްރީ ވުމުގައި ލަސްތަކެއް ދިމާވުމުގެ ސަބަބުންނެވެ.
