މަހުލޫފުގެ އިސްތިއުނާފުގެ އަޑުއެހުން ކެންސަލް ކޮށްފި
އިސްތިއުނާފު އަޑުއެހުން ތާވަލް ކޮށްފައިވަނީ މިއަދު ހެނދުނު 10:00 އަށް
އަހުމަދު މަހުލޫފު
ކުއްލި ހާލަތުގެ ދަށުން ފެބްރުއަރީ 22 ގައި ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް ހައްޔަރު ކުރި މައްސަލައިގެ އިސްތިއުނާފު އަޑުއެހުން މިއަދަށް ތާވަލް ކުރުމަށްފަހު ކެންސަލް ކޮށްފިއެވެ.
ހައިކޯޓުން އެމައްސަލައިގެ އިސްތިއުނާފު އަޑުއެހުން ތާވަލް ކޮށްފައިވަނީ މިއަދު ހެނދުނު 10:00 އަށެވެ.
ހައި ކޯޓަށް މިދިޔަ މާޗް މަހުގެ 20 ވަނަ ދުވަހު ހުށައަޅާފައިވާ އިސްތިއުނާފުގެ މައްސަލާގައި ބުނެފައި ވަނީ މަހުލޫފް ހައްޔަރުކޮށްފައިވަނީ ރައްޔިތުން މަޖިލީހުގެ އިމްތިޔާޒުތަކާއި ބާރުތަކުގެ ގާނޫނާ ހިލާފަށް ކަމަށެވެ. މަހުލޫފު އެފަހަރު ހައްޔަރު ކޮށްފައިވަނީ ގުޅިފައިވާ ސިޔާސީ ޕާޓީތަކުން ކުރި މުޒާހަރާއެއްގެ ތެރެއިންނެވެ.
މީގެކުރިން ފުލުހުންގެ ދައުރު އަދާކުރަން ހުރަސް އެޅިކަމުގެ ދެ ދައުވާއެއް ސާބިތުވެ މަހުލޫފް ވަނީ 10 މަހާއި 24 ދުވަހުގެ ޖަލު ހުކުމެއް ތަންފީޒު ކުރައްވައިފަ އެވެ.
