ރީ ރަޖިސްޓަރކޮށްފައިވާ މީހެއްގެ ފޯމް ބާތިލެއް ނުކުރެވޭނެ:ހިސާން
26 އޯގަސްޓު 2018 | އާދީއްތަ 13:49ރީ ރަޖިސްޓްރީވިކަމަށް ކަނޑައަޅަނީ ވަރަށް ގިނަ ކަންކަމަށް ބެލުމަށްފަހު
ހިސާން ރާއްޖެ ޓީވީ ފަލަ ސުރުޚީ ޕްރޮގްރާމްގައި
ރަށްވެހިވެފައި ރަށް ނޫން އެހެން ރަށެއްގައި ވޯޓުލާ ނަމަ ރީރެޖިސްޓްރީކުރުމަށް ހުޅުވާލާ ފުރުސަތުގައި ރެޖިސްޓްރީ ވެފައިވާ ކަމަށް ނިންމާފައިވާ މީހެއްގެ ފޯމް އިލެކްޝަންސް ކޮމިޝަނަށް ބާތިލެއް ނުކުރެވޭނެ ކަމަށް ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ގެ ކެމްޕެއިން އެޖެންޓް ހިސާން ހުސައިން ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ހޮނިހިރު ދުވަހުގެ ރޭ ވާހަކަ ދައްކަވަމުން ޤާނޫނީ ވަކީލް ހިސާން ވިދާޅުވީ ރީރެޖިސްޓްރީ ކުރުން އިލެކްޝަންސް ކޮމިޝަނުން ކުރިއަށް ގެންދިޔައީ ދެ މަރުހަލާއަކަށް ބަހާލައިގެން ކަމަށާއި ރީރެޖިސްޓްރީ ކުރުމަށް ހުށަހެޅުމުން ފުރަތަމަ މަރުހަލާގައި އެމީހަކު ރީރެޖިސްޓްރީ ވުމަށް ހުށަހަޅާފައިވާ ކަމަށް މެސެޖެއް ފޮނުވާ ކަމަށެވެ. ދެ ވަނަ މަރުހަލާއަކީ ވެރިފައި ކުރުމަށް 1414 ނަންބަރަށް މެސްޖް ކުރުމުން އަންނަ މެސެޖްގައި ރީރެޖިސްޓްރީކުރެވިފައިވާ ކަމަށް ކަނޑައެޅުން ކަމަށެވެ.
ހިސާން ވިދާޅުވީ އެ ދެމަރުހަލާ ނިމުމުންވެސް 5000 މީހުންގެ ފޯމް ބާތިލް ކޮށްފައިވާ ކަމަށާއި އެއީ އިލެކްޝަންސް ކޮމިޝަނަށް ކުރެވޭނެ ކަމެއް ނޫން ކަމަށް ހިސާން ވިދާޅުވިއެވެ.
އޭނާ ވިދާޅުވި ގޮތުގައި ރީރެޖިސްޓްރީ ވެއްޖެ ކަމަށް އިލެކްޝަންސް ކޮމިޝަނުން ކަނޑައަޅަނީ ވަރަށް ގިނަ ކަންކަމަށް ބެލުމަށް ފަހު އެވެ. އެހެންވެ، ރީރެޖިސްޓްރީކުރެވިފައިވާ މީހެއްގެ ފޯމު އިލެކްޝަންސް ކޮމިޝަނަށްވެސް ބާތިލް ކުރެވޭނީ ފޯމް ހުށަހެޅި މީހާ އެދިގެން ކަމަށް ހިސާން ވިދާޅުވި އެވެ.
"އިލެކްޝަންސް ކޮމިޝަނުން މީހެއްގެ ނަން ރީރެޖިސްޓްރީ ކުރުމަށްފަހު ދެން އެމީހެއްގެ ނަން އެ ލިސްޓުން އުނިކުރެވޭނީ އެމީހާ އެކަމާ ގުޅިގެން ޝަކުވާއެއް ހުށަހަޅައިފިނަމަ. އެއްވެސް ޝަކުވާއެއް ނެތި ބެލުމެއް ނެތި އެގޮތަށް ބާތިލެއް ނުކުރެވޭނެ،" ހިސާން ވިދާޅުވިއެވެ.
ހިސާން ވިދާޅުވީ ގުޅިފައިވާ ޕާޓީތަކުން ހުށަހެޅި ބައެއް ފޯމުތައް ރިޖެކްޓްކޮށް އަނެއް ބައި މީހުންގެ ފޯމް ހުށަނާޅަނީސް މުޅިން އެހެން ތަންތަނަށް ރެޖިސްޓްރި ވެފައިވާ ކަމަށެވެ. އެކަމުގެ ބޭނުމަކީ ގުޅިފައިވާ ޕާޓީތަކަށް ތާއީދު ކުރާ މީހުންނަށް ވޯޓުލުމަށް އިލެކްޝަންސް ކޮމިޝަނުން އުނދަގޫ ކުރުން ކަމަށް ހިސާން ވިދާޅުވި އެވެ.
އިންތިޚާބުގެ ކަންކަމުގައި ބޭނުންކުރަން އުޅޭ ޓެބްލެޓަށް އިޝާރާތް ކުރައްވާ ހިސާން ވިދާޅުވީ ވޯޓުލާ މަރުކަޒުގައި ނަތީޖާ އިއުލާންކޮށްފައި ނޫނީ އިލެކްޝަންސް ކޮމިޝަނަށް ވެސް އެނަތީޖާ ނުފޮނުވޭނެ ކަމަށެވެ. އެހެން ކަމުން ޤާނޫނުގައި އޮތް ގޮތުންނަމަ ނަތީޖާ އިއުލާންކޮށް އެ ނަތީޖާ އެތަނުގައި ތަތްކޮށްފައި ނޫނީ ޓެބްލެޓަކުންވެސް އިލެކްޝަންސް ކޮމިޝަނަށް ނަތީޖާ ނުފޮނުވޭނޭކަމަށް ހިސާން ވިދާޅުވިއެވެ.
" ޤާނޫނުގައި އޮންނަ ގޮތުން ވޯޓު ގުނުމަށްފަހު އެތަނުގައި އިއުލާން ކުރަން ޖެހޭ. ދެވަނަ ކަމަކަށް ކުރަން ޖެހޭ ކަމަކީ ނަތީޖާ ޝީޓުގައި ނަތީޖާ ލިއުމަށްފަހުގައި ސޮއިކޮށްފައި ޢާއްމުކޮށް ފެންނަ ގޮތަށް ވޯޓުލާ މަރުކަޒުގައި ބެހެއްޓުން. ތިންވަނަ ކަމަކަށް ކުރަން ޖެހެނީ އެނަތީޖާ އިލެކްޝަނާ ބެހޭ މައި އިދާރާއަށް ފޮނުވުން" ހިސާން ވިދާޅުވިއެވެ.
