ޤާސިމްގެ އަނބިކަނބަލުން އައިޝާގެ ގެއަށް ކަޅުތެޔޮ ޖަހައިފި
26 އޯގަސްޓު 2018 | އާދީއްތަ 03:33ކަޅުތެޔޮޖެހީ ހޮނިހިރު ދުވަހުގެރޭ 10:30 ހާއިރު
ހޯރަފުށީގައި ހުންނަ އައިޝާގެ ގެއަށް ކަޅުތެޔޮ ޖަހާފައި
ޖޫމްހޫރީ ޕާޓީގެ ލީޑަރ ޤާސިމް އިބްރާހީމްގެ އަނބިކަނބަލުން އަދި އެޕާޓީގެ ކައުންސިލް މެމްބަރު އައިޝަތު ނަހުލާގެ ގެއަށް ބަޔަކު ހޮނިހިރު ދުވަހުގެރޭ ކަޅުތެޔޮ ޖަހައިފިއެވެ.
ހއ ހޯރަފުށީގައި ހުންނަ އައިޝާގެ "ހެތި" ނަމަކަށް ކިޔާ ގެއަށް ކަޅުތެޔޮ ޖަހާފައިވަނީ ހޮނިހިރު ދުވަހުގެރޭގެ 10:30 ހާއިރުއެވެ.
އައިޝާގެ ޢާއިލާގެ މީހަކު ރާއްޖެ އެމްވީއަށް މައުލޫމަތު ދެމުން ބުނީ އެގެއަކީ ފަޅަށް ހުންނަ ގެއެއް ކަމަށާއި ހޮނިހިރު ދުވަހު އެރަށަށް ގޮސް އެގެއަށް ވަނީ މެންދުރު 2 ޖަހާކަށްހާއިރު ކަމަށެވެ.
ކަޅުތެޔޮ ޖަހާފައިވަނީ ހޮނިހިރު ދުވަހުގެރޭ އެރަށުގައި އޮތް ސްޓޭޖް ޝޯވްއެއް ބަލާފައި އައިސް ގެއަށް އައިތާ ކުޑައިރުކޮޅެއްގެ ތެރޭގައި ކަމަށް އެގޭގައި މިވަގުތު އުޅެމުންދާ އައިޝާގެ އާއިލާގެ އެމީހާ ބުންޏެވެ.
"ގޭތެރޭގައި އުޅެނިކޮށް މީހަކު ގޮވާލާފައި ބުނީ މުޅިގެއަށް މިއޮތީ ކަޅުތެޔޮ ޖަހާފައި ނޫންހޭ. ދެން ނުކުމެ ބަލާލިއިރު ގޭގެ ދޮރަށާއި ފާރަށް ވަނީ ކަޅުތެޔޮ ޖަހާފައި. ގޭތެރެއަކަށް ނުޖެހޭ" އޭނާ ބުންޏެވެ.
އައިޝާގެ އާއިލާގެ އެމީހާ ބުނީ އެކަން ފުލުހުންނަށް އަންގާފައިވާ ކަމަށާއި އެމީހުންވެސް އައިސް ބަލާފައިވާ ކަމަށެވެ.
ޖަލަށް ހުކުމް ކުރެއްވިފަހުން ބޭސްފަރުވާއަކަށް ވަޑައިގެންނެވި ޤާސިމް އިބްރާހީމް ބޭރުގައި ހުންނަވާއިރު އެމަނިކުފާނުގެ އަނބިކަނބަލުން އައިޝަތު ނަހުލާ ގެންދަވަނީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓަށާއި ރަނިންގ މޭޓަށް ތާއީދު ހޯއްދެވުމަށް މަސައްކަތް ކުރައްވަމުންނެވެ. އެގޮތުން ރަށްރަށަށްވެސް އައިޝާ ގެންދަވަނީ ވަޑައިގަންނަވަމުންނެވެ.
