އެއްވެސް ފުލުހެއްގެ ވޯޓުލުމުގެ ހައްގު ގެއްލޭ ގޮތަށް މުއައްސަސާއިން އަމަލެއް ނުކުރާނެ: ޕޮލިސް

އެއްވެސް ފުލުހެއްގެ ވޯޓުލުމުގެ ހައްގު ގެއްލޭ ގޮތަށް ފުލުހުންގެ މުއައްސަސާއިން އެއްވެސް އަމަލެއް ނުހިންގާނެ ކަމަށް އެ މުއައްސަސާއިން ބުނެފިއެވެ.

ރާއްޖެގެ އެކި ރަށްތަކުގައި ތިބި ގިނަ އަދަދެއްގެ ފުލުހުން، އެކި ސަރަހައްދުތަކަށް ބަދަލު ކުރަމުންދާތީ އާއި އެ މީހުންގެ ވޯޓުލުމުގެ ހައްގު ގެއްލޭ ގޮތަށް ފުލުހުންގެ މުއައްސަސާ އިން އަމަލުކުރަމުންދާ ކަމުގެ އަޑުތައް ފެތުރިފައި ވާތީ "ރާއްޖެއެމްވީ" އިން ފުލުހުންގެ ތަރުޖަމާނު އަހުމަދު ޝިފާނުއަށް ހޮނިހިރު ދުވަހު ގުޅާލުމުން ވިދާޅުވީ އެއްވެސް ފުލުހަކަށް ވޯޓުލުމުގެ ހައްގު ގެއްލޭ ގޮތަށް އެ މުއައްސަސާއިން އަމަލު ނުކުރާނެ ކަމަށެވެ.

"ތިކަމުގައި އަޅުގަނޑުމެންގެ ކޮމެންޓަކީ އެއްވެސް ފުލުހަކަށް ވޯޓުލުމުގެ ހައްގު ގެއްލޭ ގޮތަށް މި މުއައްސަސާއިން އަމަލެއް ނުކުރާނަން،" ފުލުހުންގެ ތަރުޖަމާނު ޝިފާނު ވިދާޅުވިއެވެ.

ވޯޓު ލުމަށް އެމީހަކު ރައްވެހިވެފައިވާ ރަށް ނޫން ރަށެއްގައި ވޯޓުލާ ނަމަ، ރީ- ރެޖިސްޓްރީ ވުމުގެ މަރުހަލާ ނިމިފައިވަނިކޮށް، ބައެއް ރަށްތަކުގައި ތިބި ފުލުހުން މާލެ ގެނެސް އަދި އެކި ސަރަހައްދުތަކަށް ބަދަލުކުރަމުން ގެންދާ ކަމުގެ މައުލޫމާތު ވަނީ ލިބިފައެވެ.

އެފަދަ އިދާރީ ބައެއް ބަދަލުތައް ފުލުހުން ގެންނަމުންދިޔަ ނަމަވެސް އެއީ ފުލުހުން މީޑިއާތަކާ ހިއްސާކުރާ މައުލޫމާތެއް ނޫނެވެ. ނަމަވެސް އެކި ރަށްތަކުގައި ތިބި ފުލުހުން އެހެން ރަށްތަކަށް ބަދަލު ކުރަމުންދާ ވާހަކަތައް ފުލުހުން ދޮގެއް ނުކުރެއެވެ.

އަންނަ ސެޕްޓެމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިހާބުގެ ކެމްޕެއިން ހަރަކާތްތައް ކުރިއަށްދާއިރު، އިލެކްޝަންސް ކޮމިޝަނުގެ އިތުބާރު ވަނީ ވަރަށް ބޮޑަށް ގެއްލިފައެވެ. އަދި ފުލުހުންގެ އަމަލުތަކާއި ގުޅިގެން ވެސް ގުޅިފައިވާ ސިޔާސީ ޕާޓީތަކުން ދަނީ ތަކުރާރުކޮށް ކަންބޮޑުވުން ފާޅުކުރަމުންނެވެ.