ށ. މަރޮށި އެއްކޮށް އަނދިރީގައި، ކަރަންޓް ލިބޭނެ އިރެއް ނޭނގޭ!

ރަށުގައި ކަރަންޓް ދޭން ހުރި ތިން ޖަނަރޭޓަރުގެ ތެރެއިން ދެ ޖަނަރޭޓަރު ހަލާކު ވުމުގެ ސަބަބުން ހުކުރު ދުވަހުގެ ރޭ 9:30 އިން މުޅި ރަށުން ކަރަންޓް ކެނޑިފައިވާކަމަށް ށ. މަރޮށީ ކައުންސިލަރ ހަފީޒުﷲ ވިދާޅުވެއްޖެ އެވެ.

ރާއްޖެ.އެމްވީއަށް މައުލޫމާތުދެއްވަމުން ހަފީޒުﷲ ވިދާޅުވީ މަރޮށީގެ ރައްޔިތުން ތިބީ ކަރަންޓް ނެތުމުގެ ސަބަބުން ކަނު އަނދިރީގައި ކަމަށާއި ކަރަންޓް ދިނުން ހުއްޓާލީ އެންމެ ޖަނަރޭޓަރަކުން ކަރަންޓް ދޭން ޖެހޭތީކަމަށެވެ.

Advertisement

އެރަށުގައި ކަރަންޓް ދިނުމަށް ބޭނުން ކުރަނީ ތިން ޖަނަރޭޓަރެވެ.

ހަފީޒުﷲ ވިދާޅުވީ ހުކުރު ދުވަހުގެ ހެނދުނު 10:00 އިން ފެށިގެން އޭގެ ތެރެއިން އެއް އިންޖީނު ހަލާކު ވެފައިވާކަމަށެވެ. އެހެން ކަމުން އެރަށަށް ހުކުރު ދުވަހުގެރޭ 09:00 ޖެހުމާއި ހަމައަށް ކަރަންޓް ދެމުން އައީ ދެ ޖަނަރޭޓަރު ބޭނުންކޮށްގެން ކަމަށްވާއިރު އެއްކޮށް ކަރަންޓް ދިނުން ހުއްޓާލީ އޭގެއިން އެއް ޖަނަރޭޓަރު ލޯޑު ބޮޑުވެ ހަލާކުވުމުންނެވެ.

"މިހާރު ރަށުގައި އެއްވެސް ގޮތަކަށް ކަރަންޓެއް ނެތް. ކަރަންޓް ނެތުމުން އެންމެންނަށް ވަރަށް އުނދަގޫ. އެއް ޖަނަރޭޓަރުން ކަރަންޓް ނުދޭންވިގެން ކަރަންޓް މުޅި ރަށުން ކަނޑާލީ. އެއްކޮށް ކަރަންޓް ދެވޭނީ 3 ޖަނަރޭޓަރުން." ހަފީޒުﷲ ވިދާޅުވިއެވެ.

މަރޮއްޓަށްވެސް ކަރަންޓް ދެނީ ފެނަކައިންނެވެ. ހަފީޒު ވިދާޅުވީ ކަރަންޓުގެ މައްސަލަ ހައްލު ކުރުމަށް ފެނަކައާއި މަޝްވަރާތައް ކުރެވުނުކަމަށާއި ފެނަކައިގެ އެމްޑީގެ ޖަވާބަކީ ކުރިން އެރަށަށް ގެންދަން އުޅުނު "ބާ އިންޖީނު" އެރަށަށް ނޭރުވުމުގެ ސަބަބުން ކަރަންޓުގެ ހިދުމަތް ރަނގަޅުކުރެވިފައި ނެތުން ކަމަށެވެ.

"ފެނަކައިގެ އެމްޑީ ވިދާޅުވި އެ ނޭރުވި މައްސަލައިގައި އެކަމުގެ ސަބަބުންނޭ މައްސަލަ ހައްލު ނުކޮށްދޭން އުޅެނީ. މަރޮއްޓަށް ގެނައި ބާ އިންޖީނެއް ވީމަ ރައްޔިތުން ބޭނުން ވީ އާ އިންޖީނެއް އެފަހަރު." ހަފީޒުﷲ ވިދާޅުވިއެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި މަރޮށީ ރައްޔިތުން މުޒާހަރާކޮށްފައިވަނީ ހއ. އުތީމުން ބާ ޖަނަރޭޓަރެއް އެ ރަށަށް ގެންދިއުމުންނެވެ. އެ ޖަނަރޭޓަރ ވަނީ އަނބުރާ އުތީމަށް ފޮނުވާލާފައެވެ. މަރޮށިން އެއްކޮށް ކަރަންޓް ކެނޑުމުގެ ކުރިން ބައެއް ގަޑިތަކުގައި ޖަނަރޭޓަރުގެ ލޯޑް ބޮޑުވުމުގެ ސަބަބުން އެ ރަށުން ކަރަންޓު ކެނޑޭތާ އެތައް ދުވަހެއް ވެފައިވާކަމަށް ވެސް ހަފީޒުﷲ ވިދާޅުވިއެވެ.