މަގޫދޫގައި އާ މިސްކިތެއް އަޅައިދީ، ބަނދަރު ފުންކޮށްދޭނަން: އިބޫ
ތަރައްގީ ގެނައުމަށް އާބާދީގެ ކުޑަ ބޮޑު މިނަށް ނުބައްލަވާނެ ކަމަށް ވިދާޅުވި
މަގޫދޫ އަށް މިއަދު ވަޑައިގެން އެރަށުގެ ކައުންސިލަރުންނާ އެކު ބަނދަރުމަތީގައި ހުރި ޖޯލިފައްޗެއްގައި: ފޮޓޯ-ރާއްޖެއެމްވީ
ގުޅިފައިވާ ޕާޓީތަކުގެ ސަރުކާރެއްގައި ނ. މަގޫދޫގައި އާ މިސްކިތެއް އަޅައިދޭނެ ކަމަށް ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް ވައުދު ވެވަޑައިގެންފިއެވެ.
ބުދަ ދުވަހުގެ މެންދުރު ފަހު މަގޫދޫއަށް ވަޑައިގެން އެރަށުގައި ތިބި ސަޕޯޓަރުންނާ ބައްދަލުކުރައްވައި އިބޫ ވިދާޅުވީ މަގޫދޫގައި ހުރީ މީގެ 35 އަހަރު ކުރިން އަޅާފައި ހުރި މިސްކިތެއް ކަމަށާއި އެ މިސްކިތް މަރާމާތުކޮށްފައި ވަނީ ވެސް އެމްޑީޕީގެ ސަރުކާރުގައި ކަމަށެވެ. އަދި އެމަނިކުފާނުގެ ސަރުކާރުގައި ތަރައްގީގެ މަޝްރޫއުތައް ހިންގޭއިރު މަގޫދޫގައި ވެސް މިސްކިތެއް ބިނާކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
މަގޫދޫއަށް އިބޫ ވަޑައިގަތުމުން އެރަށުން އެމަނިކުފާނަށް މަރުހަބާ ކިޔަނީ: ފޮޓޯ-ރާއްޖެއެމްވީ
މަގޫދޫގައި ބަނދަރު ހަދައިދީފައި ވަނީ އެމްޑީޕީގެ ސަރުކާރުގައިކަން ފާހަގަ ކުރައްވައި އިބޫ ވިދާޅުވީ ގުޅިފައިވާ ޕާޓީތަކުގެ ސަރުކާރެއްގައި، މިހާރު ބަނދަރު ބޭނުން ކުރުމުގައި ހުރި ދަތިތައް ހައްލުކޮށްދޭނެ ކަމަށެވެ. އެގޮތުން އެމަނިކުފާނުގެ ވެރިކަމުގައި ބަނދަރު ފުންކޮށްދެއްވާނެ ކަމަށް ވައުދު ވެވަޑައިގެންނެވިއެވެ.
ތަފާތު ވިސްނުމުގެ މީހުނަށް އެމަނިކުފާނުގެ ސަރުކާރުގައި ފުރުސަތު އޮންނާނެ ކަން ފާހަގަކުރައްވައި ވިދާޅުވީ ތަރައްގީގެ މަޝްރޫއުތައް ހިންގާނީ އާބާދީގެ ކުޑަ ބޮޑު މިނެއް ބެލުމެއް ނެތި ކަމަށެވެ.
މަގޫދޫގެ ގިނަ ރައްޔިތުން ތިބީ އެމަނިކުފާނާ އެކު ކަމަށާއި އެ އިންތިހާބު ކާމިޔާބު ކުރެއްވުމަށް ފަހު ފެށިގެންދާނީ ރައްޔިތުންގެ ވެރިކަމެއް ކަމަށް ވެސް އިބޫ ވިދާޅުވިއެވެ.
