ރާއްޖެ ރެޕްރެޒެންޓް ކުރުމަށް ޑިޓިއުން ބޭންޑް އިނގިރޭސިވިލާތަށް ދިއުމަށް މާދަމާ ފުރާނެކަމަށް އެ ބޭންޑުން ބުނެފިއެވެ.
ޑިޓިއުން ބޭންޑްގައި ހިމެނޭ ހަމައެކަނި އަންހެން މެމްބަރު ފާތިމަތު ފެޒްލީން (ފެޒޫ) ބުނީ މާދަމާ އެ ބޭންޑު ޔޫކޭއަށް "ވަރަށް ސްޕެޝަލް އިވެންޓަކަށް" ފުރާނެކަމަށެވެ.
ފެޒޫ ބުނީ އެއީ އެބޭންޑަށް ލިބުނު ވަރަށްބޮޑު ކުރިއެރުމެއްކަމަށެވެ.
އެއް ހަފްތާއަށްފަހު އެނބުރި ރާއްޖެ އަންނަން ހަމަޖެހިފައިވާއިރު އެބޭންޑުގެ 12 ވަނަ އެނިވާސަރީ ފާހަގަ ކުރުމަށް ތައްޔާރީތައް ދަނީ ވަމުންނެވެ. ފެޒޫ ބުނީ އަންނަ ނޮވެމްބަރުގައި އެ ބޭންޑުގެ އެނިވާސަރީ ޝޯ ބޭއްވުމަށް ތައްޔާރު ވަމުން އަންނަ ކަމަށެވެ.
ކާމިޔާބު ލަވަތައް ނެރެމުން ވެސް އަންނަ އަދި ރާއްޖޭގެ މިއުޒިކް އިންޑަސްޓްރީގައި ބޮޑު މަޝްހޫރު ކަމެއް ހޯދަމުން އަންނަ ޑިޓިއުން ބޭންޑަކީ ދިވެހިންގެ ތެރޭގައި މަގުބޫލު ބޭންޑެކެވެ. ޑިޓިއުންއަކީ ފަސް މެމްބަރުން ހިމެނޭ ބޭންޑެކެވެ. ފެޒޫގެ އިތުރުން އެ ބޭންޑުގައި ދެން ހިމެނޭ މެމްބަރުންނަކީ ލީޑް ވޯކަލިސްޓް އަހުމަދު ފުރުގާން (ފުޖީ) އާއި ހަސަން ފާތިހް (ފާތި)، އަލީ ޝާފިއު (އައްޔަ) އަދި އަހުމަދު އާސިފް (އައްމަޑޭ) އެވެ.
