ޑިޓިއުންގެ "ނަށާލާ" ޗެލެންޖް: ބޭންޑާއެކު ސްޓޭޖް މައްޗަށް
"ނަށާލާ ކަވަރ ޗެލެންޖް" ކުރިއަށް ދާނީ 30 ސެޕްޓެމްބަރުގެ ނިޔަލަށް
ޑި ޓިއުން ބޭންޑްގެ މެމްބަރުން: ފާތިމަތު "ފެޒޫ" ފެޒްލީން، އަހްމަދު "ފުޖީ" ފުރްގާން، އަލީ "އައްޔަ" ޝާފިއު، ހަސަން "ފާތި" ފާތިހު އަދި އަހްމަދު "އައްމަޑޭ" އާސިފް
ޑިޓިއުން ބޭންޑްގެ ފުރަތަމަ އަލްބަމް "ވަން ޑައުން"ގެ ލަވައެއް ކަމަށްވާ "ނަށާލާ"އަކީ ގިނަ ބައެއްގެ ތަރުހީބު ލިބިގެން ދިޔަ ލަވައެކެވެ. ލަވައާ އެއްވަރަށް ލަވައިގެ ވީޑިއޯއަށް ވެސް އެހާމެ ތަރުހީބު ވަނީ ލިބިފައެވެ.
ޖުލައި 2015 ވަނަ އަހަރު ރިލީޒް ކޮށްފައިވާ މިލަވައިގެ ތަރުހީބު އަދިވެސް އެހާމެ ބޮޑެވެ. އެހެންކަމުން ޑިޓިއުން އިން ވަނީ ފޭނުންނާއި މިއުޒިކަށް ޝައުގު ހުންނަ ފަރާތްތަކަށް އަމާޒްކޮށް ވަރުގަދަ ޗެލެންޖެއް ކޮށްފައެވެ.
"ނަށާލާ ކަވަރ ޗެލެންޖް" ކިޔާ މި ޗެލެންޖްގައި ބައިވެރިވާން ބޭނުންވާ ފަރާތްތަކުން އަމިއްލަ ހިޔާލު ބޭނުން ކޮށްގެން ވީޑިއޯއެއް ތައްޔާރު ކުރުމަށް ފަހު ބޭންޑްގެ ފޭސްބުކް ޕޭޖަށް ޑައިރެކްޓް މެސެޖެއް ފޮނުވުމަށް ޑިޓިއުން އެދިފައިވެއެވެ.
އަދި ކަވަރ ފޮނުވާ ފަރާތްތަކުގެ ތެރެއިން ގަދަ ދޭއް ހޮވާނެ ކަމަށް ބޭންޑުން ބުންޏެވެ. އަދި ގަދަ ދޭކަށްދާ ކަވަރތައް ހުށަހެޅި ފަރާތްތަކަށް ބޭންޑާ އެކު، ރިސޯޓެއް އަދި މާލޭގައި، ސްޓޭޖް މަތީ ޕަރޕޯމް ކުރުމުގެ ފުރުސަތު ވެސް ލިބިގެންދާނެ ކަމަށް ޑިޓިއުންއިން ބުންޏެވެ.
އަދި "ވަން ޑައުން" އަލްބަމްގެ ސޮއި ކޮށްފައިވާ ކޮޕީއެއް ވެސް އެ ދެ ފަރާތަށް ލިބޭނެއެވެ.
"އެއްވެސް ކުއްޖަކު ފަސް ނުޖެހޭތި. އަވަހަށް ވީޑިއޯތައް ފޮނުވާ. މަޖާކޮށްލަން ވާނެ،" ޑިޓިއުން އިން ބުންޏެވެ.
"ނަށާލާ ކަވަރ ޗެލެންޖް" ކުރިއަށް ދާނީ 30 ސެޕްޓެމްބަރުގެ ނިޔަލަށެވެ.
