އިބޫގެ ބެނަރ ހަރުކުރުމަށް އެޗްޑީސީއާއި ފުލުހުން ހުރަސްއަޅައިފި
އެއްވެސް ކަހަލަ ރަސްމީ އެންގުމެއް އަންގާފައެއް ނުވޭ
ބެނަރތައް ހަރުކުރުމަށް ފުލުހުން ހުރަސް އަޅަނީ
އިދިކޮޅު ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) ގެ ކެމްޕެއިން ބެނަރތައް ހަރުކުރުމަށް ސަޕޯޓަރުން ހޯމަ ދުވަހުގެ ރޭ ހުޅުމާލޭގައި ހިންގި ހަރަކާތަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުރަސް އަޅައިފިއެވެ.
އެއަރޕޯޓަށް ދާ މަގާއި ގުޅިފައި އޮންނަ ހުޅުމާލޭގެ ނިރޮޅު މަގުގައި އެ ބެނަރތައް ނުދެމޭނެ ކަމަށް އެޗްޑިސީން ވަނީ ބުނެފައެވެ. އެޗްޑީސީގެ ތިން ސުޕަވައިޒަރަކު ދަންވާން ކައިރިވެފައި ވަނިކޮށް އެ ސަރަހައްދަށް ގޮސް ވަކި ޚާއްސަ ހުއްދައެއް، ބެނަރ ދަމަން ނަގަން ޖެހޭނެ ކަމަށް އަނގަ ބަހުން ވަނީ ބުނެފައެވެ. ނަމަވެސް އެ ހުއްދަ ނަގަން ޖެހެނީ ކޮން ގަވާއިދެއްގެ ދަށުން ކަމެއް ސާފުކޮށް ބުނެދީފައެއް ނުވެއެވެ.
އިދިކޮޅު މައި ޕާޓީ އެމްޑީޕީގެ ޑެޕިއުޓީ ޗެއަރޕާސަން އަލީ ނިޔާޒް ވިދާޅުވީ އެ އެންގުމާއި ގުޅިގެން ބެނަރ ދެމުމަށް ނަގަން ޖެހޭނީ ކޮން ހުއްދައެއްތޯ ބެލުމަށް އެޗްޑީސީއާ ގުޅުމަށް މަސައްކަތް ކުރަމުންދާ ކަމަށެވެ. ނަމަވެސް ރަސްމީކޮށް ރިޔާސީ ކެންޑިޑޭޓެއް ކަމަށް ކަނޑައަޅާފައިވާ އިބޫއަށް ކެމްޕެއިން ކުރުމުގެ ހުއްދަ އިލެކްޝަނުން ފުރިހަމައަށް ދީފައިވާއިރު އިތުރަށް ދެން ނަގަން ޖެހޭ ހުއްދައަކީ ކޮބައި ކަމާމެދު ސުވާލު އުފެދޭ ކަމަށް ނިޔާޒް ވިދާޅުވިއެވެ.
އެ ސަރަހައްދުގައި ހަރަކާތްތެރިވި އާންމު ރައްޔިތަކު ރާއްޖެ.އެމްވީއަށް މައުލޫމާތުދިން ގޮތުގައި އެތަނަށް އެޗްޑީސީގެ މުވައްޒަފުން ދިޔަތާ މާގިނައިރު ނުވެ، ދެ ވެހިކަލްގައި ފުލުހުން އައުމަށްފަހު ވަނީ އެ ހަރަކާތް ހުއްޓާލުމަށް އިންޒާރު ދީފައެވެ. އަދި އެޗްޑީސީގެ އެންގުމާއި އެއްގޮތުގެ މަތިން ކަންތައް ކުރުމަށް އަންގާފައިވާއިރު، ރަސްމީ ލިޔުމެއް ދައްކާފައެއް ނުވެއެވެ.
އިބޫގެ ސަޕޯޓަރުން ވަނީ އެޗްޑީސީގެ އެންގުމާއި ގުޅިގެން ކަންބޮޑުވުން ފާޅުކޮށްފައެވެ. އެމީހުން ބުނީ ދަނީ ކެމްޕެއިން ކުރުމުގެ ހުއްދަ އިލެކްޝަންސް ކޮމިޝަނުން ދީފައިވާއިރު، އެކަން ކުރުމަށް ހުރަސް އެޅުމަކީ އިދިކޮޅު ފަރާތްތަކުގެ ހައްގަށް އަރައިގަތުން ކަމަށެވެ.
