ކޮރަޕްޝަންގެ މައުލޫމާތު އާއްމުކުރާ ފަރާތްތަކަށް ރައްކާތެރިކަން ހޯދައިދޭނަން: އިބޫ
20 އޯގަސްޓު 2018 | ހޯމަ 11:56ވިސްލް ބްލޯވަރ ޕްރޮޓެކްޝަން ޤާނޫނެއް އެކުލަވާލުމަށް މަޖިލީހަށް ފޮނުއްވާނެ
އިބޫ ކެމްޕޭން ދަތުރުފުޅެއްގައި ވާހަކަ ދައްކަވަނީ
ކޮރަޕްޝަންގެ އަމަލުތައް ހުއްޓުވުމަށް ކޮރަޕްޝަންގެ މައުލޫމާތު ހާމަކުރާ ފަރާތްތަކަށް ޤާނޫނީ ރައްކާތެރިކަން ގުޅިފައިވާ ޕާޓީތަކުގެ ވެރިކަމެއްގައި ފޯރުކޮށްދޭނެކަމަށް އިދިކޮޅު ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) ވިދާޅުވެއްޖެއެވެ.
އިންކަމް ޓެކްސް ނެގުމުގެ މަސައްކަތް ފައްޓަވާނެކަން ހާމަކުރެއްވުމަށް އިބޫ ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ކޮރަޕްޝަން ހުއްޓުވުމަކީ ގުޅިފައިވާ ޕާޓީތަކުގެ އެންމެ މުހިއްމު ސިޔާސަތުކަމަށެވެ. އަދި ކޮރަޕްޝަންގެ މައުލޫމާތު ހާމަކުރާ ވިސްލް ބްލޯވަރުންނަށް ރައްކާތެރިކަން ލިބިދެވޭނެ ވިސްލް ބްލޯވަރ ޕްރޮޓެކްޝަން ޤާނޫނެއް އެކުލަވާލުމަށް މަޖިލީހަށް ފޮނުއްވައި، މަޖިލީހުން ފާސްކުރައްވާނެކަމަށް އިބޫ ވިދާޅުވިއެވެ.
ނޫސްވެރިންގެ ބައްދަލުވުމުގައި އިބޫ ވަނީ އެމް.އެމް.ޕީ.އާރް.ސީގެ ޚިޔާނާތުގެ މައުލޫމާތު ހާމަކުރި ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފަށް ދިމާވިފަދަ ކަންކަން ދިމާނުވާނެފަދަ ގޮތަކަށް ނިޒާމް ބަދަލުކުރައްވާނެކަމަށް ވިދާޅުވެފައެވެ. އެމް.އެމް.ޕީ.އާރް.ސީގެ ޚިޔާނާތުގެ މައުލޫމާތު ހާމަކުރި ބީ.އެމް.އެލްގެ މުވައްޒަފަށް ވަނީ ޖަލު ހުކުމެއް ތަންފީޒުކުރަން ޖެހިފައެވެ.
ކޮރަޕްޝަންގެ މައުލޫމާތު ހާމަކުރާ ފަރާތްތަކަށް ޤާނޫނީ ޙިމާޔަތް ދިނުމަކީ ދުނިޔޭގެ ކޮރަޕްޝަން އެންމެ މަދު ޤައުމުތަކުގައި ޤާނޫނެއްގެ ދަށުން ކުރާ ކަމެކެވެ.
