މޭޑޭ ޤައިދީއަކު ޙާލު ސީިރިއަސްވެގެން ހޮސްޕިޓަލުގައި ފަރުވާދެނީ
18 އޯގަސްޓު 2018 | ހޮނިހިރު 16:05ފަރުވާ ދެމުންދަނީ ގ. ފްރެޝްލައިޓް އިބްރާހިމް ރަޝީދަށް
މޭޑޭ މުޒާހަރާގެ ތެރެއިން
2015 ވަނަ އަހަރުގެ މެއި މަހުގެ ފުރަތަމަ ދުވަހު އިދިކޮޅު ފަރާތްތަކުން ބޭއްވި ބޮޑު މުޒާހަރާގައި ފުލުހަަކަށް އަނިޔާކުރިކަމަށް ބުނެ ހައްޔަރުކޮށް، ޖަލަށްލީ ޒުވާނެއްގެ ޙާލު ސީރިއަސްވެ، އޭނާއަށް ހޮސްޕިޓަލުގައި ފަރުވާދެމުން އެބަދެއެވެ.
ގ. ފްރެޝް ލައިޓް އުމުރުން 26 އަހަރު އިބްރާހިމް ރަޝީދަށް ހޮސްޕިޓަލުގައި ފަރުވާދެމުންދާއިރު، އޭނާ ހޮސްޕިޓަލުގައި އެޑްމިޓްކޮށްފައި އޮތީ އެހެން މީހުންނާއި ވަކިން އައިސޮލޭޝަންގައިކަމަށް އާއިލާއިން ރާއްޖެ.އެމްވީއަށް މައުލޫމާތު ދިނެވެ. އާއިލާއިން ބުނީ އޭނާގެ ގައިގައި ފޮޅުނަގައި، ޙާލު ދެރަކަމަށް ފެނުނުކަމަށެވެ. އެހެންނަމަވެސް ޑޮކްޓަރާއި ބައްދަލު ނުކުރެވޭތީ އޭނާއަށް ވީ ސީދާ ކިހިނެއްކަމެއް ސާފުނުވާކަމަށް އާއިލާއިން ބުންޏެވެ. މީގެ އިތުރުން އިބްރާހިމް ރަޝީދުގެ ކައިރީގައި ހޮސްޕިޓަލުގައި އާއިލާ މީހަކަށް ހުރެވޭނެތޯ ސުވާލުކުރުމުން، އޭނާގެ ކައިރީގައި އާއިލާ މީހަކަށް ހުރެވޭނީ ޢީދު ބަންދަށްފަހު، ސަރުކާރުން ހުޅުވުމުން މެޑިކަލް ބޯޑުން ގޮތެއް ނިންމުމަށްފަހުކަމަށް ކަރެކްޝަންސް އިން ބުނިކަމަށް އާއިލާއިން ބުންޏެވެ.
އިބްރާހިމް ރަޝީދުގެ މައްޗަށް މޭޑޭގެ މައްސަލައިގައި ހައްޔަރުކޮށް ދައުވާ އުފުލީ އޭނާގެ އަތުގައި އޮތް ފޯނަކުން މަގުމައްޗަށް ވެއްޓުނު ފުލުސް މީހެއްގެ ގައިގައި ޖެހިކަަމަށް ބުނެއެވެ.
މޭޑޭގެ މައްސަލައިގައި ޖަލަށް ލާފައިވާ މީހެއްގެ ޙާލު ސީރިއަސްވެ، ހޮސްޕިޓަލުގައި ފަރުވާ ދެމުންދާއިރު، މީގެ ކުރިންވެސް މޭޑޭގެ މައްސަލައިގައި ހައްޔަރުކުރި މީހަކަށް ފަރުވާ ދިނުން ލަސްވެ، އޭނާ ހޮސްޕިޓަލުގައި މަރުވެފައިވެއެވެ. އެޙާދިސާގައި މަރުވެފައިވަނީ އުމުރުން 51 އަހަރުގެ އަބްދުﷲ ރަޝީދެވެ.
