ރިރެޖިސްޓްރީކުރަން 20000 ފޯމު ދެ ފަހަރަށް ހުށަހަޅާފައި

ސެޕްޓެމްބަރު 23 ގައި ބާއްވާ ރިޔާސީ އިންތިޚާބުގައި ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށް ގާތްގަނޑަކަށް 20،000 ފޯމް ދެ ފަހަރަށް ހުށަހަޅާފައިވާކަން އެނގިއްޖެ އެވެ.

ރާއްޖެއެމްވީއަށް އެނގިފައިވާ ގޮތުގައި ވޯޓް ރިރެޖިސްޓްރީކުރަން އިލެކްޝަންސް ކޮމިޝަނަށް ގާތްގަނޑަކަށް 95،000 ފޯމު ހުށަހަޅާފައިވެއެވެ. ނަމަވެސް ދެ ފަހަރަށް ހުށަހަޅާފައިވާ ފޯމްތައް އުނިކުރުމުން އެ އަދަދު ދަށްވެގެންދާނެ އެވެ.

އިލެކްޝަންސް ކޮމިޝަނުން ބުނީ، ރިރެޖިސްޓްރީ ކުރެވިފައިވާ އަދަދު އަންނަ ހަފްތާގައި އިއުލާނު ކުރާނެ ކަމަށެވެ. ސައްހަ ނޫން ފޯމުތަކެއްވެސް ވެސް ހުށަހަޅާފައިވާ ކަމަށާއި އެ މައްސަލައިގައި ފިޔަވަޅު އަޅާނެ ކަމަށް ވެސް އިލެކްޝަންސް ކޮމިޝަނުން ވަނީ ބުނެފަ އެވެ.

ރިރެޖިސްޓަރކުރުމުގައި މައްސަލަ ހުރި ފޯމުތައް ރަނގަޅު ކުރުމަށް ފުރުސަތު ދޭނެ ކަމަށް އީސީން ބުނެއެވެ.

އިލެކްޝަންސް ކޮމިޝަނުން މިކަން ހާމަކޮށްފައިވާއިރު ގއ. އަތޮޅުގެ ބައެއް މީހުން ދުރު ރަށްރަށާއި ރާއްޖެއިން ބޭރުގެ ގައުމުތަކުގައި ރަޖިސްޓްރީ ކޮށްފައިވާ މައްސަލަތަކެއް ވަނީ ފެންމަތިވެފައެވެ. މިކަންކަމާ ގުޅިގެން ގިނަ އަދަދެއްގެ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.