އެއް ކޮޓަރީގެ ފްލެޓެއް 8 ލައްކަ ރުފިޔާއަށް ވިއްކާގޮތަށް އެމްޓީސީސީގެ ހިޔާ މަޝްރޫއު ރަސްމީކޮށް އިފްތިތާހްކޮށްފި
ހަދަން ނިންމާފައިވަނީ 14 ބުރީގެ ދެ ޓަވަރު
އެމްޓީސީސީގެ ޗީފް އެގްޒެކްޓިވް އޮފިސަރ އިބްރާހީމް ޒިޔަތު ރަސްމިއްޔާތުގައި ވާހަކަ ދައްކަވަނީ
ހުޅުމާލެ ދެވަނަ ފިޔަވަހީގައި ތަރައްޤީ ކުރާ އެމްޓީސީސީ ހިޔާ މަޝްރޫއު ރަސްމީކޮށް އިފްތިތާހް ކޮށްފިއެވެ.
ހޮޓެލް ޖެންގައި އަންގާރަ ދުވަހުގެ ރޭ ބޭއްވި ރަސްމިއްޔާތުގައި އެމްޓީސީސީ ހިޔާ މަޝްރުއޫ ރަސްމީކޮށް އިފްތިތާހް ކޮށްދެއްވީ އެ ކުންފުނީގެ ޗެއަރމަން އަހްމަދު ނިޔާޒް އާއި ކުންފުނީގެ ޗީފް އެގްޒެކްޓިވް އޮފިސަރ އިބްރާހީމް ޒިޔަތުއެވެ.
ހުޅުމާލޭގެ ދެވަނަ ފިޔަވަހީގައި ހަދަން ނިންމާފައިވަނީ 14 ބުރީގެ ދެ ޓަވަރުގައި ޖުމްލަ 400 ފްލެޓް ތަރައްޤީ ކުރާނެ ކަމަށް އެމްޓީސީސީން ބުނެއެވެ. އަދި އެ ދެ ޓަވަރުގައި އެއްކޮޓަރީގެ 160 ޔުނިޓާއި 2 ކޮޓަރީގެ 80 ޔުނިޓާއި ދެ ކޮޓަރިޔާއި މެއިޑްރޫމް ހިމެނޭ 160 ޔުނިޓް ހުންނާނެ ކަމަށް ވެސް އެ ކުންފުނިން ބުންޏެވެ.
އެއްކޮޓަރީގެ ޔުނިޓް 7 ލައްކަ އާއި 8 ލައްކަ ރުފިޔާއަށް ދެ ކޮޓަރީގެ ޔުނިޓެއް 1.2 އަދި 1.3 މިލިއަން ރިފިޔާއަށް އަދި ދެ ކޮޓަރިޔާއި މެއިޑްރޫމް ހިމެނޭ ޔުނިޓް 1.4 އަދި 1.7 މިލިއަން ރުފިޔާއަށް ލިބޭނެ ކަމަށް އެމްޓީސީސީން ބުންޏެވެ.
"މި އަގުތަކަކީ މިއަދުގެ ރިއަލް އެސްޓޭޓް ބާޒާރުގެ އަގުތަކަށް ބަލާއިރު ގާތްގަނޑަކަށް 50 ޕަސަންޓް ހެޔޮ އަގެއް. މުވައްޒަފުންނަށް 24 މަހަށް ބަހާލައިގެން ފަސޭހައިން ޑައުން ޕޭމަންޓް ދެއްކޭނެ އިންތިޒާމް ވެސް ހަމަޖެހިގެންދާނެ ކަމަށް މި ފުރުސަތުގައި ފާހަގަކޮށްލަން" ޒިޔަތު ވިދާޅުވިއެވެ.
އެ ކުންފުނީގެ މުވައްޒަފުންނަށް ފްލެޓްގެ ޑައުން ޕޭމަންޓް 24 މަހަށް ބަހާލައިގެން ދެއްކޭނެ ކަމަށް ޒިޔަތު ވިދާޅުވި އެވެ. ނަމަވެސް ޑައުން ޕޭމަންޓަށް ދައްކަން ޖެހޭ އަދަދު ހާމައެއް ނުކުރައްވައެވެ.
ތަރައްޤީ ކުރާ 400 ފްލެޓްގެ ތެރެއިން މުވައްޒަފުންނަށް 330 ފްލެޓް ހާއްސަ ކުރާއިރު، ބާކީ 70 ފްލެޓް ދޫކުރާނީ އާންމުންނަށް ކަމަށް ވެސް އެކުންފުނިން ހާމަކުރިއެވެ. އަދި މުއައްޒަފުންނަށް ހާއްސަ ކުރާ 330 ފްލެޓްގެ ތެރެއިން ކުންފުނީ ގައި މަސައްކަތްކުރާ ހާއްސަ އެހީއަށް ބޭނުންވާ މުވައްޒަފުންނަށް 10 ފްލެޓް ރިޒާވް ކުރެވޭނެ ކަމަށް ވެސް އެ ކުންފުނިން ބުނެއެވެ.
މީގެ އިތުރުން ކުންފުނީގެ ދާއިމީ ހުރިހާ މުވައްޒަފުންނަށް ފްލެޓަށް ކުރިމަތިލުމުގެ ފުރުސަތު ހުޅުވާލާފައިވާއިރު ކުރިއަށް އޮތް ހަފްތާގެ ތެރޭގައި ފްލެޓަށް އެދޭ ފޯމް ކުންފުނިން ދޫކުރަން ފަށާނެ ކަމަށާއި ސެޕްޓެމްބަރު މަހުގެ ނިޔަލަށް ފްލެޓަށް ކުރިމަތިލުމުގެ ފުރުސަތު އޮންނާނެ ކަމަށް އެމްޓީސީސީން ބުންޏެވެ.
ކުރިއަށް އޮތް 2 އަހަރު ތެރޭގައި ފްލެޓްގެ މަސައްކަތް ނިންމާލެވޭނެ ކަމަށާއި އެ މަޝްރޫއަށް އެއްކޮށް ނިންމާލުމަށް 439 މިލިއަން ރުފިޔާ ޚަރަދުވާނެ ކަމަށް އެ ކުންފުނިން ވަނީ ހާމަކޮށްފައެވެ.
