ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނާއި ރަނިން މޭޓުންގެ މެދުގައި ބޭއްވުމަށް ރާއްޖެޓީވީން އިންތިޒާމުކުރާ ބަހުސްގެ ދައުވަތު ރައީސް އަބްދުﷲ ޔާމީނަށް ދެ ވަނަ ފަހަރަށް ފޮނުވައިފިއެވެ.

އެ ބަހުސްގައި ބައިވެރިވެ ވަޑައިގަތުމަށް އެދި ދެ ވަނަ ދައުވަތު ރައީސް އަބްދުﷲ ޔާމީންނަށް ރާއްޖެ ޓީވީން ފޮނުވީ އާދީއްތަ ދުވަހުއެވެ. ފުރަތަމަ ދައުވަތު ފޮނުވީ ޖުލައި 9 ވަނަ ދުވަހުއެވެ. ޑރ. ޝަހީމަށް ދައުވަތު ފޮނުވީ ޖުލައި 17 ވަނަ ދުވަހުއެވެ.

އެ ދައުވަތު ރައީސް ޔާމީނާއި ޑރ. ޝަހީމް އަދި ގަބޫލު ނުކުރެއްވި ނަމަވެސް، ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހާއި އެ މަނިކުފާނުގެ ރަނިން މޭޓް ފައިސަލް ނަސީމް ވަނީ ދައުވަތު ގަބޫލުކުރައްވައިފައެވެ. 

ރާއްޖެ ޓީވީގެ ޗީފް އޮޕަރޭޓިން އޮފިސަރު ހުސައިން ފިޔާޒު މޫސާ ވިދާޅުވި ގޮތުގައި ބަހުސް ބާއްވާނެ ތާރީޚަކާއި ތަނަކާއި އަދި ބަހުސްގެ ދާއިރާތައް ކަނޑައަޅާ ބަހުސް ކުރިއަށް ގެންދާނެ ފޯމެޓް ކަނޑައަޅާނީ، ކެންޑިޑޭޓުންނާއި ރަނިން މޭޓުންގެ ފަރާތްޕުޅުން ހިޔާލު ހޯއްދެވުމަށް ފަހު ކަމަށެވެ.

ސެޕްޓެމްބަރު 23 ގައި ބާއްވާ ރިޔާސީ އިންތިޚާބުގައި ވާދަ ކުރައްވާނީ ރައީސް އަބްދުﷲ ޔާމީނާއި ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް އެކަންޏެވެ.