ވޯޓުގެ އަގު ބިލިއަން ޑޮލަރަށް ވުރެ ބޮޑު: ޑރ. ނާޒް
ވޯޓުލާން ވާނީ ދިވެހި ދިދަ އަށް އެންމެ ރަނގަޅު ވާނެ ގޮތަށް ކަމަށް ވިދާޅުވި
ޑރ. އައިޝަތު އަލީ ނާޒް - ވޯޓުލާންވާނީ ވަރަށް ވިސްނާފަކަމަށް ވިދާޅުވި
ވޯޓުގެ އަގު ބިލިއަން ޑޮލަރަށް ވުރެ ބޮޑުވާނެ ކަމަށް ނަފްސާނީ އިލްމް ވެރިޔާ ޑރ. އައިޝަތު އަލީ ނާޒް ވިދާޅުވެއްޖެ އެވެ.
ހޯމަ ދުވަހުގެ ރޭ ޑރ. ނާޒް ކުރައްވަފައިވާ ޓްވީޓްގައި ވިދާޅުވެފައިވަނީ ގަލަމުގެ ތުނޑުން ޖަހާ ފާހަގަ ބިލިއަން ޑޮލަރަށް ވުރެން ބާރު ގަދަވާނެ ކަމަށެވެ.
ގަލަން އޮތީ ރައްޔިތުންގެ އަތުގައި ކަމަށާއި ސެޕްޓޭމްބަރު 23 ގައި ބާއްވާ ރިޔާސީ އިންތިޚާބުގައި ވޯޓްލާންވާނީ ޖީބަށް ބައްލަފައި ނޫން ކަމަށް ޑރ. ނާޒް ވިދާޅުވި އެވެ. އަދި ވޯޓްލާންވާނީ ދިވެހި ދިދަ އަށް އެންމެ ރަނގަޅު ވާނެ ގޮތަކަށް ބައްލާފައިކަމަށްވެސް ޑރ. ނާޒް ވިދާޅުވި އެވެ.
އޭނާ ވިދާޅުވީ މީހުންގެ ބަހަށް ނުހެއްލި، ތިމާގެ މޮޅު ސިކުނޑި ބޭނުން ކޮށްގެން، ލާ ވޯޓަކީ ވަތަނުގެ ހައްގުގައި އަމާނާތްތެރި ވޯޓެއްކަށް ހަދަންޖެހޭނެކަމަށެވެ.
ޑރ. ނާޒް އެފަދައިން ވިދާޅުވިއިރު، މި އަހަރު ސެޕްޓެމްބަރު މަހުގެ 23 ވަނަ ދުވަހުގެ ވޯޓަކީ ވަރަށް މުހިންމު ވޯޓެއްކަމަށް ހުރިހާ ފަރާތްތަކަކުންވެސް ގެންދަނީ ބުނަމުންނެވެ. އެގޮތުން މިއީ އަނިޔާވެރިކަމާއި، ކޮރަޕްޝަނާއި، ވައްކަމާއި، ޤާނޫނު އަސާސީ ފުނޑާލުމާއި ދެކޮޅަށް ބަސްބުނަން ރައްޔިތުންނަށް ލިބޭނެ ފަހު ފުރުސަތުކަމަށް އިދިކޮޅު ފަރާތްތަކުންގެންދަނީ ބުނަމުންނެވެ. އަދި މި އިންތިހާބަކީ ރާއްޖޭގައި އަލުން އިންސާފު ޤާއިމްކޮށް، ހަމަހަމަކަން ޤާއިމްކޮށް، ރައްޔިތުން ތާހިރު ދިރިއުޅުމެއް ހޯދުމަށް ލިބޭ ފުރުސަތުކަމަށްވެސް އިދިކޮޅު ފަރާތްތަކުން ބުނެ އެވެ.
އޭއާއެކު ސަރުކާރަށް ތާއީދުކުރާ ފަރާތްތަކުން މި އިންތިހާބު ސިފަކުރަނީ ތަރައްޤީއަށްދޭ ވޯޓެއްގެ ގޮތުގަ އެވެ.
އަންނަ މަހުގެ 23 ވަނަ ދުވަހު ރައްޔިތުންނަށް ބަސް ބުނުމަށް ފުރުސަތު ލިބިފައިވާއިރު، އިންތިހާބުގައި ވާދަކުރައްވަނީ ދެ ކެނޑިޑޭޓެކެވެ. އެއީ ގުޅިފައިވާ ސިޔާސީ ޕާޓީތަކުގެ ކެނޑިޑޭޓް އިބްރާހިމް މުހައްމަދު ސޯލިހް (އިބޫ) އާއި، މިހާރުގެ ރައީސް އަބްދުﷲ ޔާމީން އެވެ.
