ގުޅިފައިވާ ޕާޓީތަކުގެ ވެރިކަމެއްގައި ޓެކްސީ ބޯޑު ގަންނަން ނަގާ އަގު ކަނޑާލާނެ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.

ހދ. ކުޅުފުށީގައި ބޭއްވި ގުޅިފައިވާ ޕާޓީތަކުގެ ޖަލްސާގައި ވާހަކަފުޅު ދައްކަވަމުން އިބޫ ވިދާޅުވީ ޓެކްސީއަށް ދުއްވަން ބޭނުންވާ ނަމަ، ބޮޑު އަގުގައި ޓެކްސީ ބޯޑެއް ގަންނަންޖެހޭ ކަމަށެވެ. އެގޮތުން މާލެ އާއި އަތޮޅުތަކުގައި ޓެކްސީއެއް ދުއްވަން ބޭނުންނަމަ 50،000 ރުފިޔާ ދީގެން ޓެކްސީ ބޯޑު ގަންނަން ޖެހިފައިވާ ކަމަށާއި ނަމަވެސް ގުޅިފައިވާ ޕާޓީތަކުގެ ވެރިކަމެއްގައި އެ އަގު އެއްކޮށް ކަނޑާލާނެ ކަމަށް އިބޫ ވިދާޅުވިއެވެ.

"ޓެކްސީއެއް ދުއްވަން ބޭނުން ކަމަށްވަންޏާ، ޓެކްސީގެ އިތުރަށް އަދި މި ބޯޑު ގަތުމަށް 50،000 ރުފިޔާ ހަރަދު ކުރަން އެބަޖެހޭ. މިރޭ ތިބޭފުޅުންނަށް އަޅުގަނޑު ޔަގީންކޮށް މި އަރުވަނީ އިރާދަ ކުރެއްވިއްޔާ އަޅުގަނޑުމެންގެ ވެރިކަމެއްގައި މި ނަގާ ފީ މުޅިން ކަނޑާލާނަން،" އިބޫ ވިދާޅުވިއެވެ.