އިއްތިހާދުގެ ދީނީ މެނިފެސްޓޯއާ ގުޅޭ ގޮތުން ރައީސް ޔާމީން ދެއްކެވީ ދެކޮޅު ނުޖެހޭ ވާހަކަތަކެއް!
އިތުރުފުޅު ހެއްދެވީ ތިމަފުށީ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުން
ރައީސް ޔާމީން ތިމަރަފުށީގައި ވާހަކަ ދައްކަވަނީ
ގުޅިފައިވާ ޕާޓީތަކުގެ ދީނީ ސިޔާސަތު ވެގެންދާނީ މިހާތަނަށް ރިޔާސީ ކެންޑިޑޭޓަކު ނުނެރޭވަރުގެ ދީނީ ސިޔާސަތަކަށް ކަމަށް، ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް ވިދާޅުވެފައި ވަނިކޮށް، ދީނީ މެނިފެސްޓޯއާ ގުޅޭ ގޮތުން ދެކޮޅު ނުޖެހޭ ވާހަކަތަކެއް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ދައްކަވައިފި އެވެ.
ތިމަރަފުށީގެ ރައްޔިތުންނާއި މުޚާތަބުކުރައްވާ، އިދިކޮޅު ފަރާތްތަކުގެ މެނިފެސްޓޯގައި އިސްލާމްދީން ނޫން އެހެން ދީނަކަށް ރާއްޖޭއިން ފުރުސަތު ނުދޭނެ ވާހަކަ ލިޔެފައި ނެތްކަމަށް ކަމަށް ރައީސް ޔާމީން ވިދާޅުވިއިރު، މިހާރު ގުޅިފައިވާ ޕާޓީތަކުން ދަނީ މެނިފެސްޓޯ ތައްޔާރު ކުރުމުގެ މަސައްކަތް ކުރަމުންނެވެ.
ގުޅިފައިވާ ޕާޓީތަކުގެ ކެންޑިޑޭޓް މިހާރު ކުރައްވަމުން ގެންދަވާ ކެމްޕޭނުގެ މަސައްކަތްތަކުގައި މައިގަނޑު ގޮތެއްގައި ދައްކަވަނީ އެމްޑީޕީން އެކުލަވާލާފައިވާ މެނިފެސްޓޯގެ ވާހަކައެވެ.
ތިމަފުށީގެ ރައްޔިތުންނާއި މުޚާތަބު ކުރައްވާ ރައީސް ހޯމަ ދުވަހު ދީނީ މެނިސްފެސްޓޯއާ ގުޅޭ ގޮތުން ވާހަކަ ދެއްކެވިއިރު، މިމަހުގެ 11 ވަނަ ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަމުން ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުޙައްމަދު ސޯލިހް ވިދާޅުވީ ގުޅިފައިވާ ޕާޓީތަކުން ކުރާ ވެރިކަމެއްގައި ރާއްޖޭގައި އިސްލާމްދީން ނޫން އެހެން ދީނަކަށް ފުރުސަތެއް ނުދެއްވާނެ ކަމަށާއި ގުޅިފައިވާ ޕާޓީތަކުގެ ދީނީ ސިޔާސަތު ވެގެންދާނީ މިހާތަނަށް ރިޔާސީ ކެންޑިޑޭޓަކު ނުނެރުއްވާނެވަރުގެ ދީނީ ސިޔާސަތަކަށް ކަމަށެވެ.
"އަޅުގަނޑުމެންގެ ދީނީ ސިޔާސަތަކަށް ވާނީ ދިވެހިރާއްޖޭގައި ސައްތައިންސައްތަ މުސްލިމް ޤައުމެއްގެ ގޮތުގައި ދެމެހެއްޓުމަށް މަސައްކަތް ކުރުން. އެގޮތުން ސައްޙަ އިސްލާމީ އަޤީދާއެއްގެ މަތީގައި މުޖުތަމައެއް ބިނާކުރުމުގެ މަސައްކަތް ކުރާނަން. އެއީ އެކަން ވާން ޖެހޭނެ ގޮތަކީ. ރާއްޖޭގައި އެހެން ދީނަކަށް ފުރުސަތެއް ނުދެވޭނެ. އެއީ ރައްޔިތުން ޤަބޫލު ވެސް ކުރައްވާނެ ކަމެއް ނޫން. އަދި އަޅުގަނޑުމެން އެއްވެސް މީހަކު ވެސް ޤަބޫލުކުރާނެ ކަމެއް ނޫން، ރައްޔިތުން ޤަބޫލުކުރައްވާ ދީނީ ޢިލްމުވެރިންނާ މަޝްވަރާކޮށްގެން ދީނީ ސިޔާސަތުތައް އެކުލަވާލަމުން، ގުޅިފައިވާ ޕާޓީތަކުގެ އެއްބައިވެރިއަކީ އަދާލަތު ޕާޓީ. އަދާލަތު ޕާޓީއަކީ ވަރަށް ގިނަ ދީނީ އިލްމުވެރިން ހިމެނިވަޑައިގަންނަވާ ޕާޓީއެއް، އަދި އެބަހުންނެވި ރައީސް މައުމޫން ވެސް. ރާއްޖޭގައި ހުންނެވި ދީނީގޮތުން ކުރިއަރާފައިވާ އެއްބޭފުޅާ،" އިބޫ ވިދާޅުވިއެވެ.
ތިމަރަފުށީގައި ރައީސް ޔާމީން ވިދާޅުވީ ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިޙާބުގައި ވާދަކުރައްވާ ކެންޑިޑޭޓުގެ މެނިފެސްޓޯގައި، ރާއްޖޭގައި އޮންނާނީ ސައްތައިން ސައްތަ އިސްލާމް ދީންކަމާއި އަދި ރާއްޖޭގައި ޤިޞާޞް ހިފުމާ ބެހޭ އެއްވެސް ވާހަކައެއް ބަޔާންކޮށްފައި ނެތްކަމަށެވެ.
"އަޅުގަނޑާ އިދިކޮޅަށް ވާދަ ކުރައްވާ އެމްޑީޕީ އާ ގުޅިފައި އޮތް ކޯލިޝަންގެ މެނިފެސްޓޯ އިން ތިބޭފުޅުން ބައްލަވާލައްވާ. ދިވެހިރާއްޖޭގައި އޮންނާނީ ސައްތައިން ސައްތަ އިސްލާމީ ދައުލަތެއްތޯ ލިޔެފައި އޮތް ލަފްޒު އޮތްތޯ ބައްލަވާ. އެވާހަކައެއް ނޯންނާނެ. އެވާހަކައެއް އެބޭފުޅުންގެ މެނިފެސްޓޯއަކު ނޯންނާނެ. މަރުގެ ޙުކުމް ތަންފީޛު ކުރާ ވާހަކައެއް، އެބޭފުޅުންގެ މެނިފެސްޓޯއަކު ނޯންނާނެ." ރައީސް ޔާމީން ވިދާޅުވިއެވެ.
އިދިކޮޅު ފަރާތްތަކުގެ މެނިފެސްޓޯގައި އިސްލާމްދީން ނޫން އެހެން ދީނަކަށް ރާއްޖޭއިން ފުރުސަތު ނުދޭނެ ވާހަކަ ލިޔެފައި ނެތް ކަމަށް ރައީސް ވިދާޅުވި އިރު، ޤާނޫނު އަސާސީގައި ރާއްޖޭގައި އޮންނާނީ އިސްލާމްދީންކަން ސާފުކޮށް އޮޅުމެއް ނާރާނެ ވަރަށް އޮތީ ބަޔާންކޮށްފައެވެ.
ޤާނޫނު އަސާސީގެ ފުރަތަމަ ބާބުގެ 10 ވަނަ މާއްދާގެ (ހ) ގައި ދިވެހި ދައުލަތުގެ ދީނަކީ އިސްލާމްދީން ކަމަށާއި އަދި އިސްލާމްދީނަކީ ދިވެހިރާއްޖޭގެ ޤާނޫނުގެ މައިގަނޑު މަސްދަރުކަމަށް ބަޔާންކޮށްފައިވެއެވެ. އެ މާއްދާގެ (ށ) ގައި ދިވެހިރާއްޖޭގައި އިސްލާމްދީނުގެ އަސްލަކާ ޚިލާފު އެއްވެސް ޤާނޫނެއް ނުހެދޭނެ ކަމަށް ބަޔާންކޮށްފައިވެއެވެ.
މީގެ ގުޅިފައިވާ ސިޔާސީ ޕާޓީތަކުގެ މެނިފެސްޓޯގައި މަރުގެ ހުކުމް ތަންފީޒުކުރާނެ ވާހަކަނެތް ކަމަށް ތަކުރާރުކޮށް ރައީސް ޔާމީން ވިދާޅުވަމުން ގެންދަވާއިރު، ޤިޞޯސް ހިފުން ފިޔަވައި، އިސްލާމީ ޝަރީއަތުގައި ހައްދު ކަނޑައެޅިފައިވާ އެހެން ހުކުމެއްގެ ވާހަކަ މިހާތަނަށް ރައީސް ޔާމީން ވިދާޅުވެފައެއް ނުވެއެވެ.
މަރަށް މަރު ހިފަން ގުޅިފައިވާ ޕާޓީތަކަށް ނުކުރޭނެ ވާހަކަ ރައީސް ޔާމީން ތަކުރާރުކޮށް ވިދާޅުވާއިރު، އިސްލާމީ ޝަރީއަތުގައި ކަނޑައަޅާފައިވާ މި ހުކުމް އަދި ތަންފީޒު ކުރާނެ ކަމަށް ތަކުރާރުކޮށް އެ މަނިކުފާނު ވިދާޅުވަމުން ގެންދެވި ނަމަވެސް، އެ ހުކުމެއް ތަންފީޒެއް ނުކުރެ އެވެ.
