އީޕީއޭއަށް ފުރިހަމަ ޤާނޫނީ ބާރު އަބުރާ ދޭނަން: އިބޫ
ނާޒުކު ރަށްތައް ހިމާޔަތްކޮށްދެއްވާނެ ކަމަށް ވިދާޅުވި
އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހް
އިދިކޮޅު ކޯލިޝަންގެ ސަރުކާރެއްގައި އެންވަޔަރުމަންޓަލް ޕްރޮޓެކްޝަން އެޖެންސީ (އީޕީއޭ) އަށް ފުރިހަމަ ޤާނޫނީ ބާރު އަބުރާ ދޭނެ ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހް (އިބޫ) ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އިބޫ ވިދާޅުވީ ތިމާވެއްޓާއި ބެހޭ ޤާނޫނުގެ ބާރު މި ސަރުކާރުން ކަނޑުވާލާފައި އޮތް ނަމަވެސް އެ ބާރު އަލުން އަބުރާ ހޯދަ ދެއްވާނެ ކަމަށެވެ.
ކްލައިމެޓް ޗޭންޖަކީ ހަގީގަތެއް ކަމަށް ގަބޫލު ކުރަން ޖެހޭ ކަމަށާއި ދުނިޔެ ހޫނު ވުމާއި ގުޅިގެން ކަނޑުގެ ލޮނުގަނޑު އުފުލި ޖަޒީރާ ގައުމު ތަކަށް ލިބެމުންދާ ގެއްލުންތައް ގަބޫލު ކުރަން ޖެހޭ ކަމަށް އިބޫ ވިދާޅުވިއެވެ. ތިމާވެށީގެ ވަރަށް ނާޒުކު ރަށްރަށް ރާއްޖޭގައި އެބަހުރި ކަމަށާއި ކޯލިޝަން ސަރުކާރެއްގައި އެ ރަށްތައް ހިމާޔަތްކޮށް ރައްކާތެރި ކުރައްވާނެ ކަމަށް އިބޫ ވިދާޅުވިއެވެ.
ރާއްޖޭގެ އިގްތިސާދު ބިނާވެފައި އޮތީ ނޫ އިގްސާދެއްގެ މައްޗަށް ކަން ފާހަގަ ކުރައްވާ އިބޫ ވިދާޅުވީ ރާއްޖޭގެ އިގްތިސާދުގެ މައިބަދަ އަކީ ތިމާވެށި ކަމަށެވެ. އެމްޑީޕީގެ ވެރިކަމުގައި ވަނީ ކްލައިމެޓް ޗޭންޖް ދުނިޔޭގެ ސަމާލު ކަމަށް ގެނެސްފައި ކަމަށާއި ނަމަވެސް މިއަދު މި ވަނީ އެ ހާލަތު ބަދަލު ތިމާވެއްޓާއި ބެހޭ ޤާނޫނުވެސް ވަނީ ބައިބައި ކުރެވިފައި ކަމަށް އިބޫ ވިދާޅުވިއެވެ.
ދެހާސްފަނަރަ ވަނަ އަހަރު އީޕީއޭ އަށް ލިބިފައިވާ ބާރުތައް ޓުއަރިޒަމް މިނިސްޓްރީގެ ދަށަށް ބަދަލު ކުރުމަށް ފަތުރުވެރިކަމާއި ބެހޭ ޤާނޫނަށް އިސްލާހެއް ހުށަހެޅުމުން އެކަމާއި ކަންބޮޑުވުން ފާޅުކޮށް މޯލްޑިވްސް އީކޯ ކެއާ އިން ނެރުނު ނޫސް ބަޔާނުގައި ބުނެފައި ވަނީ ރާއްޖޭގެ ތިމާވެށި ހިމާޔަތް ކުރުމާއި ތިމާވެއްޓާއި ގުޅުންހުރި މަސައްކަތްތައް ކުރުމާއި، އެންވަޔަރަންމަންޓަލް އިމްޕެކްޓް އެސެސްމަންޓް ނުވަތަ (އީއައިއޭ) ހެދުން ފަދަ ކަންކަން ކުރިއަށް ދާންޖެހޭނީ ތިމާވެއްޓާއި ހަކަތަކާއި ބެހޭ ވުޒާރާއިން ނުވަތަ އެ ވުޒާރާގެ ދަށުން ހިންގާ އީޕީއޭގެ ބެލުމުގެ ދަށުން ކަމަށެވެ. ބަޔާނުގައި ބުނެފައިވަނީ އެ އިސްލާހަކީ ތިމާވެށި ރައްކާތެރިކުރުމާއި ހިމާޔަތްކުރުމާއި ބެހޭ ގާނޫނުގެ ބައެއް މާއްދާތަކާއި ވެސް ފުށުއަރާ އިސްލާހެއް ކަމަށް ބުނެފައެވެ. ބަޔާނުގައި އިތުރަށް ބުނެފައި ވަނީ ރިސޯޓުތަކުގެ ތިމާވެށީގެ ކަންތައްތައް ޓޫރިޒަމް މިނިސްޓްރީގެ ދަށަށް ބަދަލުކޮށްފިނަމަ ކޮރަޕްޝަނަށް މަގުފަހި ވެގެން ހިނގައިދާނެ ކަމުގެ ބިރު އެބައޮތް ކަމަށްވެސް ބަޔާނުގައިވެއެވެ.
