ކުރިއަށް އޮތް ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ހެދުމަށްޓަކައި އިލެކްޝަންސް ކަމިޝަން (އީސީ) އާއި ގުޅިގެން ކުރިއަށް ދިއުމަށް ތައްޔާރަށް އޮތްކަމަށް އދ. އިން ބުނެފިއެވެ.

އިންތިހާބާ ގުޅިގެން މަޝްވަރާކުރުމަށް ޕޮލިޓިކަލް އެފެއާޒްގެ އެސިސްޓެންޓް ސެކްޓްރީ ޖެނަރަލް މިރޮސްލެވް ޖެންކާއާއި ޓީމް، ރާއްޖެއަށް މިހާރު ކުރައްވަމުންގެންދަވާ ދަތުރުފުޅާއި ބެހޭގޮތުން އދ.އިން ނެރެފައިވާ ބަޔާނުގައި ބުނެފައިވަނީ ކުރިއަށް އޮތް ރިޔާސީއިންތިހާބަކީ މިނިވަން އިންސާފުވެރި އިންތިޚާބަކަށް ހެދުމަށްޓަކައި ރާއްޖޭގެ އިލެކްޝަންސް ކޮމިޝަނާއި ގުޅިގެން މަސައްކަތް ކުރައްވަން އދ. އިން ތައްޔާރަށް އޮތްކަމަށެވެ.

ރައީސް ޔާމީންއާއި ސަރުކާރުގެ އިސް ބޭފުޅުންނާއެކު ބޭއްވި ބައްދަލުވުމުން އިންތިހާބުގެ ކަންކަން އިންސާފުވެރިވާނެ ކަމުގެ އުންމީދެއް ލިބިގެން ދިޔަ ކަމަށާއި އިންތިހާބާ ގުޅިގެން ސަރުކާރުން މިހާރު ކުރަމުންގެންދާ ކަންކަމުގެ މައުލޫމާތުވެސް އެބޭފުޅުން ހިއްސާކުރައްވާފައިވާކަމަށް ބަޔާނުގައި ބުުނެފައިވެއެވެ. އަދި މިފަހަރުގެ އިންތިޚާބަކީ ވެސް މިނިވަން، އިންސާފުވެރި އިންތިޚާބަކަށް ހެއްދެވުމަށް މަސައްކަތް ކުރައްވާނެ ކަމަށް ރައީސް ޔާމީންއާއި ސަރުކާރުގެ އިސް ބޭފުޅުންނާއެކު ބޭއްވި ބައްދަލުކުރެއްވުމުގައި އެ ބޭފުޅުން ވިދާޅުވިކަމަށްވެސް އދ. ގެ ބަޔާނުގައި ބުނެފައިވެއެވެ.

ރިޔާސީ އިންތިޚާބު ބާއްވަން ހަމަޖެހިފައިވަނީ ސެޕްޓެމްބަރު މަހުގެ 23 ވަނަ ދުވަހުއެވެ.