މަޝްރޫއުތަކުގެ އަގު ބޮޑުވަނީ ކުރު މުއްދަތުގައި މަސައްކަތް ނިންމާތީ ކަމަށް ރައީސް ވިދާޅުވެއްޖެ
ހުޅުމާލެ ފުރަތަމަ ފިޔަވަހި ނިންމީ 9 އަހަރުން، އެކަމަކު މިސަރުކާރުން ހުޅުމާލެ ދެވަނަ ފިޔަވަހި ހެދީ 9 ހަފްތާއިން ކަމަށް ރައީސް ވިދާޅުވި
ރައީސް ޔާމީން
ސަރުކާރުން ހިންގާ މަޝްރޫއުތަކުގެ އަގު ބޮޑުވެގެންދަނީ ކުރު މުއްދަތުގައި މަސައްކަތްތައް ނިންމާތީކަމަށް ރައީސުލް ޖުމްހޫރިއްޔާ އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ.
ރައީސް ޔާމީން މިހާރު ހުވަދު އަތޮޅުގެ ބައެއް ރަށްތަކަށް ވަޑައިގެން ކުރައްވަމުންގެންދަވާ ދަތުރުފުޅުގައި ގއ. ކޮނޑޭ ރައްޔިތުންނާ ބައްދަލު ކުރައްވައި ރައީސް ޔާމީން ވިދާޅުވީ މަޝްރޫއުތަކުގެ އަގު ބޮޑުވެގެންދަނީ ކުރު މުއްދަތެއްގެ ތެރޭގައި މަސައްކަތް ނިންމާތީ އާއި ފެންވަރު ރަނގަޅު ބޭރުގެ ފަރާތްތަކާއި ހަވާލުކޮށްގެން ކުރަމުންގެންދާތީ ކަމަށެވެ.
ރައީސް ޔާމީން މިމޭރުމުން ވާހަކަފުޅު ދައްކަވާފައި މިވަނީ ރައީސް ޔާމީންގެ ސަރުކާރުން ކުރިއަށްގެންދާ މަޝްރޫއުތަކުގެ އަގު ބޮޑުވެ އެމަޝްރޫއުތަކުގައި ކޮރަޕްޝަން ހިމެނޭކަމަށް އިދިކޮޅު ފަރާތްތަކުން ބުނަމުން ގެންދާ ދަނޑިވަޅެއްގައި އެވެ.
"ހުޅުމާލޭގެ ފުރަތަމަ ފިޔަވަހި ނިމިފައި އެއޮތީ 9 އަހަރުން. ކީއްވެގެންކަން ހަރަދު ބޮޑުވަނީ އަޅުގަނޑު މިދަންނަވާލަނީ، އެ ނުވަ އަހަރުން ނިންމި ހުޅުމާލެއަށް ވުރެ ބޮޑު ހުޅުމާލޭގެ ދެވަނަ ފިޔަވައްސެއް އަޅުގަނޑު ހަދައިފީމު. އެތަން ހަދަން އަޅުގަނޑުމެން ނެގީ 9 ހަފުތާ." ރައީސް ވިދާޅުވި އެވެ.
އެހެންވީމަ ނުވަ އަހަރުން ކުރި ކަމެއް 9 ހަފުތާ ތެރޭގައި ކުރާއިރު ހަރަދުތަކެއް އިތުރުވާނެ ކަމަށާއި ހުޅުމާލޭގެ ދެވަނަ ފިޔަވަހި ހަދަން އެމަނިކުފާނުވެސް ނުވަ އަހަރު ނެގި ނަމަ ހަރަދުކުޑަވީސް ކަމަށް ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ ވެލާނާ އިންޓަރނޭޝަނަލް އެއާޕޯޓްގެ ކޮންސަލްޓަންސީ މަސައްކަތް ކުރުމަށް ހަވާލުކޮށްފައިވަނީ ސިންގަޕޫރުގެ ޗަންގީ އެއާރޕޯޓް ހެދި ކުންފުޏާ ކަމަށާއި އެފަދަ ފަރާތްތައް މަސައްކަތް ކުރާނީ ބޮޑެތި އަގުގަ ކަމަށެވެ.
ރައީސް ޔާމީން އިތުރަށް ވިދާޅުވީ، މާބޮޑު ހަރަދެއް ކުރާ ކަމަށް އެންމެ ގިނައިން ދެކެވެނީ ދަރުމަވަންތަ ހޮސްޕިޓަލާއި ގުޅިގެން ކަމަށާއި އެހެންނަމަވެސް އެހޮސްޕިޓަލަކީ މުޅި އޭޝިއާ ޕެސިފިކް ރީޖަންގައި މިއަހަރު ތަރައްގީކޮށްފައިވާ އެންމެ ވަރުގަދަ އިމާރާތުގެ ގޮތުގައި ރޭންކުކޮށްފައިވާ ކަމަށެވެ. އެހެންކަމުން އެތަނަށް ބޮޑު ޚަރަދު ދާނެކަމަށް ވެސް ރައީސް ޔާމީން ވިދާޅުވި އެވެ.
