މޮޑޭ ފުއްގަނޑަކަށް ގާނޫނުއަސާސީ ހަދައިފި: ސުއޫދު
ގާނޫނުއަސާސީގެ ހުރުމަތް ވަނީ ކަނޑުވާލާފައި
މަޝްހޫރު ގާނޫނީ ވަކީލު ހުސްނުއް ސުއޫދު
ދިވެހި ޖުމްހޫރިއްޔާގެ ގާނޫނުއަސާސީ މިހާރު ވަނީ މޮޑޭ ފުއްގަނޑަށް ހަދައި، އޭގެ ހުރުމަތް ކަނޑާލާފަ ކަމަށް ކުރީގެ އެޓާރނީ ޖެނެރަލް އަދި މަޝްހޫރު ގާނޫނީ ވަކީލު ހުސްނުއް ސުއޫދު ވިދާޅުވެއްޖެއެވެ.
ސުއޫދު މިހެން ވިދާޅުވެ ކުރެއްވި ޓްވީޓެއްގައި ވަނީ ގާނޫނުއަސާސީ އަށް 10 އަހަރު ފުރުނުއިރު، ގާނޫނު އަސާސީ ވަނީ ދައުލަތުގެ މުއައްސަސާތަކުން ބޭނުންވާ ގޮތަކަށް މޮޑޭ ފުއްގަނޑަކަށް ހަދައި، އޭގެ ހުރުމަތް ކަނޑުވާލާފައި ކަމަށެވެ. ގާނޫނު އަސާސީއަކީ އެ މައްޗަށް އެންމެ އަމަލު ކުރަންޖެހޭ ލިޔުން ކަމަށް ވެސް ސުއޫދު ވިދާޅުވެފައި ވެއެވެ.
ސުއޫދު އެގޮތަށް ވިދާޅުވިއިރު، ރައީސް އަބްދުﷲ ޔާމީންގެ ސަރުކާރުން ވަނީ ގާނޫނުއަސާސީ އަށް އިސްލާހުތަކެއް ގެނެސްފައެވެ. އެގޮތުން ރާއްޖޭގެ ބިން މިލްކުކުރެވޭ ގޮތަށް ގާނޫނުއަސާސީއަށް ގެނެސްފައިވާ އިސްލާހު ފާހަގަ ކޮށްލެވެއެވެ.
ގާނޫނުއަސާސީ ވަނީ މޮޑޭ ފުއްގަނޑަކަށް ހަދާފައި ކަމަށް ސުއޫދު ވިދާޅުވިއިރު، ކުރީގެ އުއްތަމަ ފަނޑިޔާރު އަހުމަދު ފާއިޒު ހުސައިން ވިދާޅުވެފައި ވަނީ އާ ގާނޫނުއަސާސީގެ 10 އަހަރުގެ ތަޖުރިބާއަށް ބަލާއިރު، ގާނޫނު އަސާސީއަށް އިސްލާހުތަކެއް ބޭނުންވާ ކަމަށެވެ.
މިހާރު އަމަލު ކުރަމުންދާ ގާނޫނުއަސާސީ ތަސްދީގު ކުރައްވާފައި ވަނީ 2008 ވަނަ އަހަރުގެ އޮގަސްޓް މަހުގެ 7 ވަނަ ދުވަހު އެވެ. ތަސްދީގު ކޮށްދެއްވީ އޭރުގެ ރައީސް މައުމޫން އަބްދުލްގައްޔޫމެވެ.
