ދިވެހި ފުލުހުންގެ މުވައްސަސާއަކީ 100 ޕަސެންޓް އިތުބާރު ކުރާ ތަނަކަށް ހަދާ ދިނުމަކީ އެންމެ ބޮޑު އެއް ވައުދުކަމަށް އިދިކޮޅު ކޯލިޝަނުގެ ކެންޑިޑޭޓްގެ ރަނިންމޭޓް ފައިސަލް ނަސީމް ވިދާޅުވެއްޖެ އެވެ.
ސެޕްޓެމްބަރު 23 ގައި ބާއްވާ ރިޔާސީ އިންތިހާބުގައި ވޯޓުލުމަށްޓަކައި ރީ ރަޖިސްޓްރީ ކުރެއްވުމަށްފަހު ފައިސަލް ވިދާޅުވީ މީހުން ހައްޔަރުކޮށް ކެމްޕެއިން ޕޯސްޓަރުތައް ނެއްޓުމުގެ މަސައްކަތް ދިވެހި ފުލުހުން ދޫކޮށްލައި، ތަހުޒީބު މުޖުތަމައުތަކުގައި ވެސް ފުލުހުން އުޅެމުންދާ ގޮތަށް ދިވެހި ފުލުހުން މަސައްކަތް ކުރުމަށް ގޮވާލައްވާފަ އެވެ.
"ފުލުހުނަށްދޭން ބޭނުންވާ ޔަގީންކަމަކީ ގުޅިފައިވާ އިއްތިހާދުގެ ސަރުކާރެއްގައި ހަޑިހުތުރު ކަންތައްތައް ކުރުމަށް އެ ބޭފުޅުންނަށް އަޅުގަނޑުމެން ހަވާލެއް ނުކުރާނަމޭ. ގާނޫނާ އެއްގޮތްވާ ގޮތުގެ މަތިން އިއްޒަތާއި ކަރާމަތްތެރިކަމާއެކު މަސައްކަތް ކުރެވޭ ތަނަކަށް ބަދަލުކޮށް ދިވެހި ފުލުހުންގެ މުވައްސަސާއަކީ ދިވެހި ރައްޔިތުންގެ 100 ޕަސެންޓް އިތުބާރު ހުރިތަނަކަށް ހަދާ ދިނުމަކީ އަޅުގަނޑުމެންގެ އެންމެ ބޮޑު އެއްވައުދު" ފައިސަލް ވިދާޅުވި އެވެ.
އިންތިހާބަށް ކެމްޕެއިން ކުރުމަށް ހުރިހާ ފަރާތްތަކަށް ހަމަހަމަ ފުރުސަތެއް ދޭން ޖެހޭ ކަމަށާއި އެހެން ނަމަވެސް މިހާރު ފެނިގެން ދަނީ ވަރަށް "ހަޑި މަންޒަރުތައް" ކަމަށް އޭނާ ވިދާޅުވި އެވެ.
"އަޅުގަނޑުމެނަށް ފެނިގެން މިދަނީ އަޅުގަނޑުމެންގެ ފަރާތުން ކެމްޕެއިންކުރާ ފަރާތްތައް ހައްޔަރުކުރެވިގެންދާ ތަން. ފޮތިތައް ނެއްޓިގެންދާ ތަން. ޕޯސްޓަރުތައް ނައްޓާ ތަން. މިއީ ވަރަށް ހަޑިހުތުރުކަންތައް، މިއަދު ވެސް އަޅުގަނޑު ފުލުހުންނަށް ދަންނަވާލަން ބޭނުންވަނީ ވަކި ފަރާތެއް ރުއްސުމަށްޓަކައި، ވަކި ފަރާތެއް ހިތްހަމަ ޖެއްސުމަށްޓަކައި އެއްވެސް ހާލެއްގައި ގާނޫނު އަސާސީއާ ގާނޫނުން ހުއްދަ ނުކުރާ އެއްވެސް ކަމެއް ނުކުރައްވާށޭ،" ފައިސަލް ވިދާޅުވި އެވެ.
މީގެ އިތުރުން ފައިސަލް ވިދާޅުވީ ދައުލަތުގެ މުވައްސަސާތަކުގައި ތިބި މުވައްޒަފުންނަށް ބިރުދައްކައިގެން ކުރުވާ އެއްވެސް ކަމަކު ކާމިޔާބެއް ނޯންނާނެ ކަމަށެވެ. އަދި ވިދާޅުވީ ސިވިލް ސާވީސްގެ ގިނަ މުވައްޒަފުން އެދެމުންދަނީ އެމީހުނަށް އޮތް ފިއްތުންތަކުން ސަލާމަތްކޮށް ދެއްވުމަށެވެ.
ފައިސަލް ވިދާޅުވީ މިއަދުގެ ސަރުކާރު ބަދަލު ކުރަން ރައްޔިތުން ބޭނުންވެފައިވާ މިންވަރު މ.އަތޮޅާއި ވ.އަތޮޅަށް ކުރެއްވި ދަތުރުގައި އެނގިގެން ހިނގައްޖެ ކަމަށެވެ. ކޮންމެ ރަށެއްގައި ވެސް ބޮޑެތި މައްސަލަތަކެއް ހުރިކަން ފާހަގަ ކުރެވުނު ކަމަށް ފާހަގަ ކުރައްވައި ފައިސަލް ވިދާޅުވީ "ދަށު ދަރަޖައަކަށް" ގޮސްފައިވާ ސިއްހީ މައްސަލަތައް ހަމައަކަށް އަޅުއްވާނެ ކަމަށެވެ. ސަރުކާރުން ކޮށްދޭން ޖެހޭ ކަމެއް ނުކޮށްދެވިގެން ސަލާންޖަހަން ނުޖެހޭނެ ކަމަށް ތަކުރާރުކޮށް ވިދާޅުވި އެވެ. ރީރަޖިސްޓްރީ ކުރުމަށް ފަހު އަލުން ޗެކް ކުރުމަށާއި ވޯޓުލުމަށް ގެންދަން ޖެހޭ ކާކުކަން އަންގައިދޭ ލިޔުން ރައްކާތެރިކޮށް ބޭއްވުމަށް ހާއްސަ ސަމާލު ކަމެއް ދިނުމަށް ފައިސަލް އިލްތިމާސްކުރެއްވި އެވެ.
