ނަދީމުގެ މައްޗަށް ކުރާ ޓެރަރިޒަމް ދައުވާގެ އަޑުއެހުމެއް މިއަދު!
7 އޯގަސްޓު 2018 | އަންގާރަ 06:16ތާވަލް ކޮށްފައި ވަނީ މިއަދު 13:30 ގައި
މުހައްމަދު ނަދީމު
ގާނޫނާ ހިލާފަށް ސަރުކާރު ވައްޓާލަން އުޅުނުކަމުގެ ތުހުމަތުގައި ޓެރަރިޒަމް ދައުވާ ކޮށްފައިވާ ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ޔުމްނާ މައުމޫންގެ ފިރިކަލުން މުހައްމަދު ނަދީމުގެ ޝަރީއަތުގެ އަޑުއެހުމެއް އަންގާރަ ދުވަހަށް ތާވަލްކޮށްފިއެވެ.
ނަދީމުގެ މައްޗަށް ކުރާ ޓެރަރިޒަމް ދައުވާގެ އަންގާރަ ދުވަހުގެ އަޑުއެހުން ކްރިމިނަލް ކޯޓުގައި ތާވަލް ކޮށްފައިވަނީ 13:30 އަށެވެ.
މިމައްސަލައިގެ އަޑު އެހުމެއް އެންމެފަހުން ބާއްވާފައި ވަނީ މިދިއަ ޖޫން މަހުގެ 24 ވަނަ ދުވަހު އެވެ. އެ އަޑުއެހުމުގައި ބަންދުގައި ބަހައްޓައިގެން ފުލުހުން ތަހުގީގު ހިންގިއިރު، ވަކީލަކު ނެތި ނަދީމްގެ ފިންގަރޕްރިންޓް ނެގި މައްސަލައެއް ވަނީ ފެންމަތި ވެފައިވެ އެވެ.
މީގެއިތުރުން، އެއަޑުއެހުމުގައި، ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމުގެ ފުރުސަތު ދައުލަތަށާއި ނަދީމަށް ވަނީ ދެއްވާފަ އެވެ.
އެގޮތުން ޝަރީއަތުގެ ކުރިން ހުށަހަޅާ ހުށަހެޅުންތަކުގެ ދަށުން ދައުލަތުން ވަނީ ތިން ހުށަހެޅުމެއް ހުށަހަޅާފަ އެވެ. ޝަރީއަތަށް ހުށަހަޅާފައިވާ ލިޔެކިޔުންތަކާއި މިމައްސަލާގައި ދައުލަތުން ދައުވާ ކޮށްފައިވާ ފަރާތްތަކުން ތަހުގީގަށް ދީފައިވާ ބަޔާންތައް ނަދީމަށް ފޯރުކޮށް ނުދިނުމަށާއި އަދި ހެކީންގެ ހެކިބަސް ސިއްރުން އަދި އަޑު ބަދަލުކޮށްގެން ނެގުމަށެވެ.
ނަދީމުގެ ފަރާތުން 26 ހުށަހެޅުމެއް ހުށަހެޅި އެވެ. އޭގެތެރެއިން ފުރަތަމަ ހަތަރު ހުށަހެޅުމަކީ، ހެއްކާބެހޭ ގާނޫނު އެކުލަވާލާފައި ނުވާތީ ނަދީމްގެ ޝަރީއަތް މެދުކަނޑާލުމަށް އެދި ހުށަހަޅާފައިވާ ހުށަހެޅުންތަކަކާއި، ހުށަހެޅި ގިނަ ހުށަހެޅުންތަކުގައި ވަނީ މިމައްސަލާގައި ފުލުހުން ތަހުގީގު ހިންގާފައިވާ ގޮތާއި ޕްރޮސެކިއުޓަރ ޖެނެރަލް، މިދައުވާއާމެދު އަމަލުކޮށްފައިވާ ގޮތުގެ މައްޗަށެވެ. އެގޮތުން މިމައްސަލައިގެ ތަހުގީގު ހިންގާފައިވަނީ ގާނޫނާ ހިލާފަށް ކަމަށާއި އަދި އެތަހުގީގުގެ މައްޗަށް ބިނާކޮށް މިދައުވާ ނުކުރެވޭނެ ކަމަށްބުނެ، އެ ދައުވާ ބާތިލް ކޮށްދިނުމަށް ނަދީމުގެ ފަރާތުން ހުށަހެޅި ހުށަހެޅުންތަކުގައި ބުނެފައި ވެއެވެ.
ނަމަވެސް އެ ހުށަހެޅުންތައް ބަލައި ނުގަތުމަށް ކްރިމިނަލް ކޯޓުގެ އިސްގާޒީ އަހުމަދު ހައިލަމް ވަނީ ނިންމަވާފައެވެ.
އެންމެފަހުން ބޭއްވި އަޑުއެހުމުގައި، ނަދީމްގެ ފަރާތުން ހުށަހަޅަން މަސައްކަތް ކުރެއްވި 26 ހުށަހެޅުމުގެ ތެރެއިން ހުށަހެޅިފައިވަނީ 10 ހުށަހެޅުމެކެވެ.
