ސަރުކާރުން ކިތައްމެ ޖެއްސުމެއް ކުރިޔަސް ވޯޓުން ރައީސް ޔާމީން ބަލި ކުރާނަން: ރޮޒައިނާ
ޖަގަހަ ބަންދުކުރިޔަސް، ޕޯސްޓަރުތައް އިރާލިޔަސް، ރައީސް ޔާމީން ބަލި ކުރައްވާނެ ކަމަށް ވިދާޅުވި
ގުޅިފައިވާ ޕާޓީތަކުގެ ކެންޑިޑޭޓާއެކު ރޮޒައިނާ އައްޑޫގައި
ގުޅިފައިވާ ސިޔާސީ ޕާޓީތަކުން ހިންގާ ސިޔާސީ ހަރަކާތްތަކަށް ސަރުކާރުން ކިތައްމެ ޖެއްސުމެއް ކުރިޔަސް ރިޔާސީ އިންތިހާބުގެ ވޯޓުން ރައީސް އަބްދުﷲ ޔާމީން ބަލި ކުރައްވާނެ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރޮޒައިނާ މިހެން ވިދާޅުވީ ހުޅުމާލޭގައި ހިންގާ އެމްޑީޕީގެ ޖަގަހަ، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އެންގުމާއެކު ބަންދު ކުރުމާ ގުޅިގެން ކުރެއްވި ޓްވީޓެއްގަ އެވެ.
ރޮޒައިނާ ވިދާޅުވީ، ޖަގަހަ ބަންދުކުރިޔަސް، ޕޯސްޓަރުތައް އިރާލިޔަސް، ޖަލްސާ ބާއްވާނެ ތަނެއް ނުދިނަސް، ވޯޓް ކަރުދާސް ކޮޅު އަތަށް އަރައިފިއްޔާ ރައީސް ޔާމީން ބަލި ކުރައްވާނެ ކަމަށެވެ.
ރޮޒައިނާ އެގޮތަށް ވިދާޅުވިއިރު، މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިހާބުގެ ކެމްޕެއިން ހަރަކާތް ގުޅިފައިވާ ސިޔާސީ ޕާޓީތަކުން ވަރަށް ފޯރިއާއެކު ދަނީ ކުރިއަށް ގެންދަމުން ނެވެ. ނަމަވެސް އިދިކޮޅު ފަރާތްތަކުން ސިޔާސީ ހަރަކާތް ހިންގުމަށް ބޮޑެތި ހުރަސްތައް ސަރުކާރުން ދަނީ ކުރިމަތި ކުރުވަމުން ނެވެ.
އެގޮތުން ގުޅިފައިވާ ސިޔާސީ ޕާޓީތަކުގެ ޕޯސްޓަރުތަށް ހަރުކުރާއިރަށް ނެއްޓުމާއި ދަމާ ދިދަ އަދި ބެނާ ފަދަ ތަކެތި ނެގުންފަދަ ކަންކަން ރާއްޖޭގެ އެކި ހިސާބުތަކުން ސަރުކާރަށް ތާއީދުކުރާ ފަރާތްތަކުންނާއި ފުލުހުން މެދުވެރިކޮށް ގެންވެސް ކުރަމުންދެ އެވެ.
ސަރުކާރު ހިންގާ ޕީޕީއެމަށް ކެމްޕެއިން ކުރުމުގައި އެއްވެސް ދަތިކަމެއްނެތި، ފަހި ފުރުސަތުތަކެއް ލިބިފައިވީ ނަމަވެސް މާބޮޑު ކެމްޕެއިން ހަރަކާތްތަކެއް ހިންގާ ތަނެއް ނުފެނެ އެވެ.
