ވައުދު ނުފުއްދައިގެން އަންގޮޅިތީމްގެ ރައްޔިތުން މުޒާހަރާއަށް
6 އޯގަސްޓު 2018 | ހޯމަ 14:25ފުޓްސަލް ދަނޑަށް ވީނުވީއެއް ނޭނގެ
އަންގޮޅިތީމްގައި ކުރިއަށްދާ މުޒާހަރާގައި ބައެއް ޒުވާނުން ސައިކަލުގައި އިހްތިޖާޖު ކުރަނީ
މި ސަރުކާރުން ވެފައިވާ ވައުދުތައް ނުފުއްދާތީވެ، ރ. އަނގޮޅިތީމު ރައްޔިތުން މަގުތަކަށް ނިކުމެ މުޒާހަރާކޮށްފި އެވެ.
އަންގޮޅިތީމު ކައުންސިލްގެ މެމްބަރަކު ރާއްޖެ.އެމްވީއަށް މައުލޫމާތުދެމުން ވިދާޅުވީ ރައީސް އަބްދުﷲ ޔާމީންގެ ސަރުކާރުން އަންގޮޅިތީމުގައި ފުޓްސަލް ދަނޑެއް އަޅާދޭނެކަމަށް ވައުދުވި ކަމަށެވެ. ނަމަވެސް ފުޓްސަލް ދަނޑަށް ވީނުވީއެއް ނޭނގޭ ކަމަށާއި، ދަނޑު އެޅުމަށް ފާސްކޮށްފައިވާ ބަޖެޓްވީގޮތެއް ހޯދުމަށް ކައުންސިލުން މިހާތަނަށް ކުރި މަސައްކަތްވެސް ކާމިޔާބުވެފައިނުވާކަމަށް ކައުންސިލް މެމްބަރު ވިދާޅުވި އެވެ.
އޭނާ ވިދާޅުވީ، ކައިރީގައި އޮތް ރަސްގަތީމުގައި އިތުރު ފުޓްސަލް ދަނޑެއް އަޅާ ދިނުމަށް ސަރުކާރުން އުޅޭ ކަމުގެ މައުލޫމާތުތަކެއް ލިބިފައިވާކަމަށާއި، އެކަމާއި ގުޅިގެން ރަށުގެ ޒުވާނުންގެ ވަރަށް ބޮޑެތި ކަންބޮޑުވުންތަކެއް ހުރި ކަމަށެވެ. އަދި ވިދަޅުވީ، ޔޫތު މިނިސްޓަރ އިރްތިޝާމް އާދަމްއާ ބައްދަލުކުރަށްވާ ރައްޔިތުންގެ ކަންބޮޑުވުންތައް ހިއްސާ ކުރެއްވި ކަމަށެވެ. ނަމަވެސް ދެއްވީ ބީރު ކަންފަތެއް ކަމަށް އޭނާ ވިދާޅުވި އެވެ.
މީހުން ދިރި އުޅޭ ފަނަރައަށް ވުރެ ގިނަ ރަށް އޮންނަ ރ އަތޮޅުގައި ފުޓްސަލް ދަނޑެއް ނެތް ހަމައެކަނި ރަށަކީ އަންގޮޅިތީމްއެވެ. ރައީސް ޔާމީން ވެރިކަމަށް ވަޑައިގެންނެވިއްސުރެ އެ ރަށުގައި ފުޓްސަލް ދަޑެއް އޮންނާނެ ކަމަށް ދެކެމުން އައި ހުވަފެން ބިލާހަކަށް ވުމާއެކު އެ ރަށު ރައްޔިތުން ވަނީ ހޯމަ ދުވަހުގެ ހަވީރު މަގުތަކަށް ނިކުމެ މުޒާހަރާ ކޮށްފައެވެ.
މުޒާހަރާގައި ރައްޔިތުން ވަނީ ފުޓްސެލް ދަޑު އެޅުމަށް ބަޖެޓްްގައި ހިމެނި 1.5 މިލިއަން ރުފިޔާއަށްވީ ގޮތަކާއި މެދު ސުވާލް އުފައްދައިފަ އެވެ. އަދި ފުޓްސެލް ދަޑު އަޅައިނުދީފިނަމަ ކުރިއަށް އޮތް ރިޔާސީ އިންތިޚާބުގައި ރައީސް އަބްދުﷲ ޔާމީނަށް ލިބެން ހުރި ވޯޓްތައް ވެސް ގެއްލިގެންދާނެކަމަށް އެ ރަށު ރައްޔިތުން ބުނެފައިވެއެވެ.
