ބްރިޖް މަތީގައި ކުރާ ކައިވެނިތަކުގެ ޚަރަދުތައް ސަރުކާރުން ހިލޭ!
އަންހެން ކުއްޖާގެ ހެދުމަށް 15،000 ރުފިޔާ
ސިނަމާލެ ބްރިޖް
މާލެ ހުޅުލެ ބުރިޖް މަތީގައި ކައިވެނި ކުރާ ފަރާތްތަކުގެ ހުރިހާ ޚަރަދެއް ސަރުކަރުން ހިލޭ ދޭ ގޮތަށް ހަމަޖައްސައިފިއެވެ.
"ސިނަމާލެ ބްރިޖް"ގައި އަލަށް ކުރާ ކައިވެނިތަކުގައި އަންހެން ކުއްޖާގެ ހެދުމަށް 15،000 ރުފިޔާ އަދި ފިރިހެން ކުއްޖާގެ ހެދުމަށް 7000ރުފިޔާ ދެއެވެ.
ކައިވެނީގެ ހަފުލާގައި ބައިވެރިވެވެނީ ކޮންމެ ކައިވެންޏަކަށް ގިނަ ވެގެން 50 މީހުންނަށް ކަމަށާއި އެ އެންމެންގެ ކެއުމުގެ ހަރަދު ގެ އިތުރުން ވެސް ފޮޓޯ ނެގުމާ ވެސް ހަވާލުވެފައި ވަނީ ސަރުކާރުން ކަމަށް ހައުސިން މިނިސްޓްރީން މައުލޫމާތުދެއެވެ.
ބްރިޖް މަތީގައި ބާއްވާ ކައިވެނި ޕާޓީތައް ފަސް ތީމެއް ވަނީ ހައުސިން މިނިސްޓްރީން ވަނީ ކަނޑައަޅާފައެވެ. އޭގެ ތެރޭގައި "މޯލްޑިވިއަން"، "ޗައިނީޒް"، "ފްލޯރަލް"، "ސަންސެޓް"ގެ އިތުރުން "ވިންޓޭޖް" ތީމް ހިމެނެއެވެ. އަދި ޕާޓީ ބޭއްވުމަށް އެދި ހުށަހަޅާ ފޯމުގައި ދެ ތީމެއް ހިޔާރު ކުރެވޭނެއެވެ.
ބްރިޖް މަތީގައި ކުރާ ކައިވެނީގެ ޝަރުތު ތަކުގެ ތެރޭގައި މި ކައިވެންޏަކީ އަންހެން މީހާ އާއި ފިރިހެން މީހާގެ ވެސް އަލަތު ކައިވެންޏަށް ވާން ޖެހެ އެވެ.
ފޯމް ބަލައިގަތުމަށް ހަމަޖެހިފައި ވަނީ އާދިއްތަ ދުވަހުން ފެށިގެން، އަންނަ ހަފްތާގެ ހޯމަ ދުވަހާ ހަމައަށެވެ. އެ ފޯމާ އެކު ކައިވެނި ކުރުމަށް އެދި ހުށަހަޅާ ފޯމް ފުރުމަށްފަހު އެ ފޯމާއި ކައިވެންޏަށް ހޭލުންތެރި ކުރުމުގެ ޕްރޮގްރާމްގައި ބައިވެރިވި ކަމުގެ ލިޔުން ހުށަހަޅަން ޖެހެއެވެ.
