ޒުވާނުންގެ ގިނަ ސުވާލުތަކަށް އިބޫގެ ޖަވާބު ލިބިއްޖެ
2 އޯގަސްޓު 2018 | ބުރާސްފަތި 18:34ބައެއް ސިޔާސަތުތައް ހާމަ ކުރެއްވި
ގެޓް ޓު ނޯ އިބޫ
ޒުވާނުންގެ ހިތުގައި އުފެދިފައި ހުރި ގިނަ ސުވާލުތަކަށް ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް ޖަވާބު ދެއްވައިފި އެވެ.
"ގެޓް ޓު ނޯ އިބޫ"ގެ ނަމުގައި ޒުވާނުންތަކަކާއެކު އިދިކޮޅު ކޯލިޝަނުން ބުރާސްފަތި ދުވަހުގެ ރޭ ބޭއްވި އިވެންޓްގައި ޒުވާނުން ވަނީ އެކި ދާއިރާތަކުން އިބްރާހިމް މުހައްމަދު ސޯލިހާ ސުވާލު އަމާޒު ކުރައްވާފަ އެވެ. އަދި އެމަނިކުފާނުގެ ވެރިކަމެއްގައި ކޮށްދޭނެ ކަންކަމާ ގުޅޭ ގޮތުން ޒުވާނުންގެ ހިތުގައި އުފެދިފައި ހުރި ސުވާލުތަައް އެމަނިކުފާނު އަމާޒު ކުރެއްވި އެވެ.
މި ގޮތުން ސަރުކާރުން މިހާރު ސްކޮލަޝިޕް ދޭ އުސޫލުތައް ބަދަލުކޮށް ގިނަ ކުދިންނަށް ކިޔަންވަން ފުރުސަތު ދެވިދާނެ ތޯ އެމަނިކުފާނާ ބައެއް ޒުވާނުން ސުވާލު ކުރުމުން ވިދާޅުވެފައިވަނީ މިހާރަށް ވުރެ ގިނަ ކުދިނަށް ތައުލީމީ ސްކޮލަޝިޕް ދެވިދާނެ ކަމަށް ގަބޫލުފުޅު ކުރައްވާ ކަމަށެވެ.
އަދި ދަރިން ބަލަން ޖެހުމުގެ ސަބަބުން ވަޒީފާތަކަށް ނުދެވިފައި ތިބި މައިންނަށް އެމަނިކުފާގެ ސަރުކާރުގައި އޮތް ފުރުސަތުތަކަކީ ކޮބައިތޯ ކުރި ސުވާލު ތަކަށް ވެސް އެމަނިކުފާނު ޖަވާބު އެރުއްވި އެވެ.
ހަމަ އެހެންމެ މަސްވެރިކަމުގެ ދާއިރާގައި މަސްވެރިންނަށް ހުރި ގޮން ޖެހުންތަކަކީ ކޮބައިކަން ހާމަ ކޮށްދެއްވާ މަސްވެރިން ބާނާ މަހުގެ ހަމަ އަގު ހޯދާދެއްވާނެ ކަމަށް އިބޫ ވަނީ ވިދާޅުވެފަ އެވެ.
އަދި ސަރުކާރުން މިހާރު ހިންގަމުންދާ ޕްރޮޖެކްޓްތަކާއިމެދު އެމަނިކުފާނުގެ ސަރުކާރުގައި އަމަލުކުރާނެ ގޮތަކީ ކޮބައިކަން ވެސް ހާމަ ކުރެއްވި އެވެ. މީގެ އިތުރުން ވެސް އަމިއްލަ ދިރިއުޅުމާ ބެހޭ ގޮތުން ވެސް އެމަނިކުފާނު ބައެއް ކަންކަން ހިއްސާ ކުރައްވާފައިވެ އެވެ. އެގޮތުން ސިޔާސީ މައިދާނަށް އެމަނިކުފާނަށް ނިކުންނެވުނު ގޮތާއި އަދި ތައުލީމީ ހަޔާތާ ގުޅޭ ގޮތުން ބައެއް މައުލޫމާތު އެމަނިކުފާނު ޒުވާނުންނާ ހިއްސާ ކުރެއްވި އެވެ.
އިބޫއާ ޓުވިޓާ މެދުވެރިކޮށް ވެސް ބައެއް ސުވާލުތައް އެމަނިކުފާނު އަމާޒު ކުރެއްވި އެވެ. އެ ސުވާލުތަކަށް ވެސް އެމަނިކުފާނު ވަނީ ޖަވާބު ދެއްވާފަ އެވެ.
