ދެކޮރެއާ ދެމެދުގައި 1950-1953 އަށް ކުރެވުނު ހަނގުރާމައިގައި މަރުވި އެމެރިކާ ސިފައިންގެ ހަށިތައް އުތުރު ކޮރެއާ އިން އެމެރިކާއާ ހަވާލުކުރުމާ ގުޅިގެން އެމެރިކާ ރައީސް ޑޮނަލްޑް ޓްރަމްޕް، އުުތުރު ކޮރެއާގެ ލީޑަރު ކިމް ޖޮން އުން އަށް މަރުހަބާ ވިދާޅުވެއްޖެއެވެ. 

ބުރާސްފަތި ދުވަހު ޓްވިޓާ މެދުވެރިކޮށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އުުތުރު ކޮރެއާގެ ލީޑަރު ވެވަޑައިގަންނަވާފައިވާ ވައުދުފުޅާ އެއްގޮތަށް، އެމެރިކާގެ ސިފައިންގެ ހަށިތައް ގައުމަށް ފޮނުވަން ފެށުމާ ގުޅިގެން ޝުކުރު ދަންނަވާ ކަމަށާއި "އަވަސް ފުރުސަތެއްގައި މަނިކުފާނާ ބައްދަލުވުމަށް އެދިވަޑައިގަންނަވާ" ކަމަށެވެ. 

އެމެރިކާގެ ރައީސް ޑޮނަލްޑް ޓްރަމްޕް އާއި އުތުރު ކޮރެއާގެ ލީޑަރު ކިމް ޖޮން އުން މިދިޔަ ޖޫން މަހު ތާރީޚީ ބައްދަލުވުމެއް ބާއްވާފައިވާ އިރު އެ ބައްދަލުވުން ބޭއްވި މައިގަނޑު ސަބަބަކީ އުތުރު ކޮރެއާ އިން ނިއުކްލިއާ ހަތިޔާރު ގެންގުޅުމާ ބޭނުން ކުރުން ހުއްޓާލުމަށް ގޮވާލުމެވެ. އެ ބައްދަލުވުމުގައި އުުުތުރު ކޮރެއާގެ ލީޑަރު ވަނީ ނިއުކްލިއާ ހަތިޔާރު ގެންގުޅުމުން ހުއްޓާލުމަށް ވައުދުވެވަޑައިގެންފައެވެ. މީގެ އުތުރު ކޮރެއާގެ ލީޑަރު ވަނީ ކޮރެއާ ހަނގުރާމައިގައި މަރުވި އެމެރިކާ ސިފައިންގެ ހަށިތައް އެމެރިކާ އަށް ރައްދުކޮށްދެއްވާނެ ކަމަށް ވެސް ވައުދުވެ ވަޑައިގެންފައެވެ. 

ކޮރެއާ ހަނގުރާމައިގައި ބައިވެރިވި 7700 އެމެރިކާ ސިފައިނަށް ވަނީ ވީނުވީއެއް ނޭނގިފައެވެ. އޭގެ ތެރެއިން 5300 މީހުންނަށް ވީނުވީއެއް ނޭނގި ގެއްލިފައި ވަނީ މިހާރުގެ އުތުުރު ކޮރެއާގައެވެ.