އެމްޑީޕީން ރީރަޖިސްޓްރީ ކުރަން ހުށައެޅި ފޯމުތަކުގެ ތެރެއިން ދެހާހަށްވުރެ ގިނަ ފޯމުގެ ސްލިޕް ނުލިބޭ
2 އޯގަސްޓު 2018 | ބުރާސްފަތި 09:36ރީ-ރެޖިސްޓަރީ ކުރުމުގެ ފަހު ތާރީޚަކީ މި މަހުގެ 11 ވަނަ ދުވަސް
އިބްރާހިމް މުހައްމަދު ސޯލިހުގެ ސްޕޯކްސްޕާސަން މާރިޔާ އަހުމަދު ދީދީ. ސްލިޕް ނުލިބޭ ކަމުގައިވާނަމަ އަވަހަށް އަލުން ފޯމު ހުށައެޅުއްވުމަށް އިލްތިމާސް ކުރެއްވި
މިހާތަނަށް ރީރަޖިސްޓްރީ ކުރަން 18،000 އަށްވުރެ ގިނަ ފޯމް ހުށައަޅާފައިވާ ކަމަށާއި އޭގެތެރެއިން 2،000 ފޯމުގެ ރަޖިސްޓްރޭޝަން ސްލިޕް ލިބިފައިނުވާ ކަމަށް އެމްޑީޕީން ބުނެފިއެވެ.
އަންނަ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި އެމްޑީޕީން ވާދަކުރާ ކެނޑިޑޭޓް އިބްރާހިމް މުހައްމަދު ސޯލިހުގެ ސްޕޯކްސްޕާސަން މާރިޔާ އަހުމަދު ދީދީ ވިދާޅުވީ 2،000 ފޯމުގެ ސްލިޕް ނުލިބެނީ ފުލުހުން އެ ފޯމުތައް ވެރިފައި ކުރާތީ ކަމަށް އިލެކްޝަންސް ކޮމިޝަނުން ބުނެފައިވާކަމަށެވެ. އަދި އެކަމާ އެޕާޓީން ކަންބޮޑުވާކަމަށް މާރިޔާ ވިދާޅުވިއެވެ.
"އެ ދެހާސް ފޯމު ފުރުއްވި ބޭފުޅުންނަށް އެބަ އެނގެންޖެހޭ އެއީ އެބޭފުޅުން ފުރުއްވި ފޯމުތޯ ނުވަތަ ނޫންތޯ،. އެހެންނޫނީ 11 ވަނަ ދުވަސް ނިމިގެންދާއިރު ތި ވެރިފިކޭޝަނަކަށް ފޮނުއްވައިގެން ވެރިފައި ވެގެން އަނބުރާ ނައިސްގެން އެބޭފުޅުންނަށް ވޯޓުލުމުގެ ހައްގު ގެއްލިގެން ހިނގައިދާނެތީ އަޅުގަނޑުމެން ކަންބޮޑުވަނީ." މާރިޔާ ވިދާޅުވިއެވެ.
މާރިޔާ ވިދާޅުވީ ވޯޓުލުމަށް ރަޖިސްޓްރީވިކަމުގެ ސްލިޕް ނުލިބޭ ކަމުގައިވާނަމަ އަލުން ރީ ރަޖިސްޓްރީ ކުރުމަށް އިލްތިމާސްކުރައްވާކަމަށެވެ.
ރިޔާސީ އިންތިޚާބުގައި، ރަށްވެހި ވެފައިވާ ރަށް ނޫން އެހެން ރަށެއްގައި ވޯޓުލުމަށް މިހާތަނަށް ގާތްގަނޑަކަށް 24،000 މީހުން ރަޖިސްޓަރީ ކޮށްފައިވާ ކަމަށް އިލެކްޝަންސް ކޮމިޝަނުން ވަނީ ބުދަދުވަހު ބުނެފައެވެ. ރީ-ރެޖިސްޓަރީ ކުރުމުގެ ފަހު ތާރީޚަކީ މި މަހުގެ 11 ވަނަ ދުވަހެވެ. މި އަހަރުގެ ރިޔާސީ އިންތިޚާބުގައި ވޯޓުލުމުގެ ހައްގު 262،000 މީހުންނަށް ލިބެއެވެ. އަދި އިންތިޚާބުގައި ރާއްޖެ އަދި ބޭރުގެ ބައެއް ގައުމުތަކުގައި 490 އަށް ވުރެ ގިނަ ވޯޓު ފޮށި ބެހެއްޓުމަށް ވަނީ ނިންމާފައެވެ.
