ފަށާނެ ދުވަހެއް އިއުލާނު ނުކޮށް ކުރިއަށް އޮތް ފަސް އަހަރުގެ ތެރޭގައި 82000 ފްލެޓް އަޅާ "ހިޔާ އެކޮމްޕްލިޝްޑް" ގެ ނަމުގައި އަނެއްކާ ވެސް ބޯހިޔާވަހިކަމުގެ މަޝްރޫޢެއް ތައާރަފްކޮށްފިއެވެ.

ހައުސިންގ މިނިސްޓްރީގައި ބޭއްވި ރަސްމިއްޔާތުގައި ވާހަކަދައްކަވަމުން ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވީ، ހިޔާ އެކޮމްޕްލިޝްޑް މަޝްރޫއުއަކީ ރާއްޖޭގެ ބޯހިޔާވަހިކަމުގެ މައްސަލައަށް ދިމާވެފައިވާ ފުރިހަމަ ހައްލު ލިބިދޭނެ މަޝްރޫއުއެއް ކަމަށާއި މި މަޝްރޫއުގެ ދަށުން 07 އޯގަސްޓުގައި ފޯމު ދޫކުރަން ފަށާނެ ކަމަށެވެ. އަދި ފޯމަށް ހުށަހެޅުމުގެ ފުރުސަތު 15 އޯގަސްޓުގައި ހުޅުވާލާއިރު ފޯމު ހުށަހަޅާ ހުރިހާ ފަރާތްތަކަށް ފްލެޓް ކަށަވަރު ވެގެންދާނެ ކަމަށް މިނިސްޓަރ ވިދާޅުވިއެވެ. މި ފުރުސަތު ހަތަރު މަހަށް ވަނީ ހުޅުވާލާފައެވެ.

މިނިސްޓަރ ވިދާޅުވީ، ފްލެޓަށް އެދި ހުށަހަޅާ ފަރާތްތަކަކީ 18 އަހަރުން މަތީގެ މީހެއް ކަމުގައިވުމާއި 1،000 އަކަފޫޓުގެ ބިމެއް ނެތް ކޮންމެ މީހަކަށް ވެސް ފްލެޓް ޔަގީން ވެގެންދާނެ ކަމަށެވެ.

މިނިސްޓަރ ވިދާޅުވީ، ކޮންމެ މީހަކަށް ވެސް ދެ އޮޕްޝަން ލިބިގެންދާނެ ކަމަށާއި އެގޮތުން 1،000 އަކަފޫޓުގެ ފްލެޓަކަށް ކުރިމަތިލުން ނުވަތަ 1،000 އަކަފޫޓުގެ ބިމެއް ހޯދުމަށް ހުށަހެޅިދާނެ ކަމަށެވެ.

"ކުރިއަށް އޮތް ދައުރުގެ ތެރޭގައި މި މަޝްރޫއު ކުރިއަށްދާނެ. އަދި ފަސް އަހަރުގެ ތެރޭގައި ހުރިހާ ފްލެޓްތަކެއް ނިމިގެންދާއިރުގައި މިއީ ކުރިއަށް އޮތް 30 އަދި 40 އަހަރުގެ ތެރޭގެ ބޯހިޔާކަމުގެ މަޝްރޫއު އެއްކޮށް ހައްލުވެގެންދާނެ،" މިނިސްޓަރ މުއިއްޒު ވިދާޅުވިއެވެ.

ފްލެޓްތައް ތަރައްގީ ކުރުމަށް ހަމަޖެހިފައި ވަނީ ގުޅީފަޅުގައި ކަމަށާއި އެ ސަރަހައްދު އެއްކޮށް މި މަޝްރޫއުއަށް ހިއްކޭނެ ކަމަށް މިނިސްޓަރ ވިދާޅުވިއެވެ. މީގެ އިތުރުން ފުށިދިއްގަރު ފަޅު ހިއްކުމަށް ފަހު އެތަނުން ބިން ދޫކުރެވޭނެ ކަމަށް މިނިސްޓަރު ވިދާޅުވިއެވެ. މިހުރިހާ ސަރަހައްދެއް ވެސް ބްރިޖުން ގުޅާ ލެވޭނެ ކަމަށް މިނިސްޓަރ ވިދާޅުވިއެވެ.

" ހިޔާ އެކޮމްޕްލިޝްޑް މަޝްރޫއު ވަނީ ރައީސް އިއުލާނުކޮށްފައި. ގޯތި ބޭނުންވާ ފަރާތްތަކަށް ގޯތި ފްލެޓް ބޭނުންވާ ފަރާތްތަކަށް ފްލެޓް ލިބޭނެ،" މުއިއްޒު ވިދާޅުވިއެވެ.

ހިޔާ އެކޮމްޕްލިޝްޑް މަޝްރޫއު ފަށާނެ ކަން ސަރުކާރުން އިއުލާނުކޮށްފައިވާ އިރު ސަރުކާރުން ދަނީ ހިޔާ މަޝްރޫއުގެ ދަށުން 7000 ފްލެޓަށް އެދޭ ފޯމު ބަލައިގަންނަމުންނެވެ. އެހެން ނަމަވެސް ހިޔާ މަޝްރޫއު އަށް ފޯމު ހުށަހަޅާ ފަރާތްތަކަށް ހިޔާ އެކޮމްޕްލިޝްޑް މަޝްރޫއުގައި ބައިވެރިނުވެވޭނެއެވެ. މިނިސްޓަރު ވިދާޅުވީ މިހާރު ހިޔާ މަޝްރޫއަށް ކުރިމަތިލާފައިވާ ފަރާތްތަކުން ހިޔާ އެކޮމްޕްލިޝްޑް މަޝްރޫއަށް ކުރިމަތިލެވޭނީ އެ ފޯމް ކެންސަލްކުރުމަށް ފަހު ކަމަށެވެ.

މިނިސްޓަރ ވިދާޅުވީ ވިލިމާލެ 2 ގެ ނަމުގައި ގުޅިފަޅު ތަރައްގީ ކުރާއިރު ރެޒިޑެންޝަލް ސަރަހައްދު އެއްކޮށް ހިއްކުމަށް ހަމަޖެހިފައިވާ ކަމަށެވެ.

"ފުށިދިއްގަރު ފަޅު ހިއްކާއިރު ގޯއްޗަށް އެދި ކުރިމަތިލާ ފަރާތްތައް ބެލުމަށްފަހު ހިއްކާނެ ސަރަހައްދު ބެލޭނެ. ގުޅީފަޅު އަދި ފުށިދިއްގަރު ފަޅުވެސް އެއްކޮށް ހިއްކަން ފެށޭނެ. ގުޅީފަޅުގައި މައިގަނޑު ގޮތެއްގައި އިމާރާތް ކުރެވޭނީ ސޯޝަލް ހައުސިންގ.އަދި އޭގެ އިތުރަށް މެދުފަންތީގެ ފްލެޓްވެސް އިމާރާތް ކުރެވޭނެ. އެފޯޑަބަލް ހައުސިންގ އާއި ސޯޝަލް ހައުސިންގ ވެސް އިމާރާތް ކުރެވޭނެ." މުއިއްޒު ވިދާޅުވިއެވެ.

މިނިސްޓަރާއި ވިދާޅުވީ، ބިން ހިއްކުމުގެ މަޝްރޫއު ކުރިއަށްދާނީ އެމްޓީސީސީގެ ޑްރެޖަރ ބޭނުންކޮށްގެން ކަމަށާއި މަޝްރޫއު ކުރިއަށްދާނީ ބޭރުގެ އެންމެ ބޮޑެތި ކުންފުނިތަކާ ގުޅިގެން ކަމަށެވެ. މީގެ އިތުރުން ތޮށިލުމާއި މަގު ހެދުމާއި އެނޫން މަސައްކަތްތައް ވެސް ކުރެވޭނެ ކަމަށް މިނިސްޓަރ ވިދާޅުވިއެވެ.

މިނިސްޓަރ މިހެން ވިދާޅުވި ނަމަވެސް މި މަޝްރޫއު ފަށާނެ ތާރީހެއް ހާމައެއްނުކުރައްވައެވެ. އަދި އެކަމަށް ޚަރަދުކުރާނެ ގޮތާއި ބަޖެޓާ ގުޅޭ ގޮތުން ނޫސްވެރިން ތަކުރާރުކޮށް ސުވާލުކުރުމުން ވެސް މިނިސްޓަރު ސާފު ޖަވާބު ދެއްވާފައެއް ނުވެއެވެ.

މިނިސްޓަރ ވިދާޅުވީ މި މަޝްރޫއު ވެސް ކުރިއަށްދާނީ، ސަރުކާރުގެ ބަޖެޓުންނާއި އެކި އެގްޒިމް ބޭންކްތަކުގެ ލުއި ލޯނު އެހީގައި ކަމަށެވެ. ނުވަތަ ބޭރުގެ ކުންފުނިތައް އަމިއްލަ ފައިސާ ހިފައިގެން އައިސް މަޝްރޫއުތައް ކުރިއަށްދާ ގޮތަށް ވެސް ފްލެޓް އިމާރާތް ކުރެވޭނެ ކަމަށް މިނިސްޓަރ ވިދާޅުވިއެވެ. މިނިސްޓަރ މިހެން ވިދާޅުވިއިރު ތަކުރާރުކޮށް މަޝްރޫއުއަށް ހަރަދުވާނެ ކަމަށް އަންދާޒާ ކުރާ މިންވަރު މިނިސްޓަރ ހާމައެއް ނުކުރެއެވެ.

މިނިސްޓަރ ވިދާޅުވީ، ރަށްތައް ތަރައްގީ ކުރަމުން މާލެ ސަރަހައްދު ތިން ލައްކަ މީހުންގެ އާބާދީއަކަށް ތަރައްގީ ކުރުމަކީ ދެކޮޅު ޖެހޭ ސިޔާސަތެއް ކަމަށާއި އެހެން ނަމަވެސް "ވިސްނުން ނޭފަތު ކުރިއާ ހަމައިގެން ހުރެގެން" ދެކޮޅެއް ނުޖެހޭނެ ކަމަށް މިނިސްޓަރ ވިދާޅުވިއެވެ