ދެ އަހަރަށް ފަހު ގާޒީ ހަސަން ސައީދުގެ ސަސްޕެންޝަން އުވާލައިފި
ސަސްޕެންޑް ކުރީ 2016 ވަނަ އަހަރުގެ ފެބްރުއަރީ 22 ގައި
ގާޒީ ހަސަން ސައީދު
ފެމިލީ ކޯޓުގެ އިސް ގާޒީ ކަމުގައި މަގާމުގައި ހުންނަވަނިކޮށް މުއްދަތެއް ނެތް ގޮތަށް މީގެ ދެ އަހަރު ކުރިން ސަސްޕެންޑްކޮށްފައިވާ، ގާޒީ ހަސަން ސައީދުގެ ސަސްޕެންޝަން ޖުޑިޝަލް ސާވިސް ކޮމިޝަން (ޖޭއެސްސީ) އިން އުވާލައިފިއެވެ.
ސުލޫކީ މައްސަލައެއް ޖޭއެސްސީން ބަލަމުންދާތީ އެ މައްސަލަ ނިމެންދެން ކަމަށް ބުނެ ގާޒީ ހަސަން ސައީދު ސަސްޕެންޑްކޮށްފައި ވަނީ 2016 ވަނަ އަހަރުގެ ފެބްރުއަރީ މަހުގެ 22 ވަނަ ދުވަހުއެވެ. ގާޒީ ހަސަން ސައީދުގެ ސަސްޕެންޝަން އުވާލާފައި މިވަނީ 2 އަހަރާއި 5 މަސް ދުވަސް ފަހުންނެވެ.
ގާޒީ ހަސަންގެ ސަސްޕެންޝަން އުވާލުމަށް ނިންމާފައިވާ ކަން ޖޭއެސްސީގެ ޑިރެކްޓަރު ހަސަން ޒަހީން ވަނީ ބައެއް މީޑިޔާތަކަށް ކަށަވަރުކޮށް ދެއްވާފައެވެ. އޭނާ ވިދާޅުވެފައިވާ ގޮތުގައި ސަސްޕެންޝަން އުވާލީ، ހަސަންގެ މައްސަލަ ނުބަލަން ނިންމާފައިވާތީއެވެ.
އައްޑޫއަށް ނިސްބަތްވާ ގާޒީ ހަސަން ސަސްޕެންޑް ކުރަން ޖޭއެސްސީން ނިންމި ނިންމުން ބާތިލްކުރަން އޭނާ ސިވިލް ކޯޓަށް ހުށަހެޅި ނަމަވެސް ފަހުން ވަނީ މައްސަލަ އަނބުރާ ގެންދަވާފައެވެ.
ގާޒީ ހަސަންގެ ސުލޫކީ މައްސަލައެއް ޖޭއެސްސީން ބަލަން ފެށީ، ފެމިލީ ކޯޓުގެ ސީނިއާ މެނޭޖްމަންޓާ އެކު ބޭއްވި ބައްދަލުވުމެއްގައި، ހައިކޯޓުގެ ދެ ފަނޑިޔާރުންނަކީ ދުނިޔޭގައި ތިބި އެންމެ ކޮރަޕްޓު ފަނޑިޔާރުން ކަމާއި، އެމީހުން އެ ހުރިހާ ކަމެއް ކުރަނީ ހިޔާބޮޑު ގަހެއްގެ ދަށުގައި ތިބެގެން ކަމަށް ދޭހަވާ ގޮތަށް ވާހަކަ ދެއްކެވި ކަމަށް ބުނެއެވެ.
