ރި-ރަޖިސްޓްރޭޝަން ފޯމްގެ ސައްހަކަން ކަށަވަރު ކުރުމަށް ފުލުހުންގެ އެހީ ހޯދަނީ!
31 ޖުލައި 2018 | އަންގާރަ 08:39އޮޅުވާލުގެ ޝަކުވާތައް ލިބެމުންދޭ
އިލެކްޝަންސް ކޮމިޝަނުން ފުލުހުންނާއެކު ބޭއްވި ބައްދަލުވުމުގެ ތެރެއިން
އަންނަ ސެޕްޓެމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިހާބުގައި ވޯޓުލުމަށްޓަކައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓު ލުމަށް ރީ-ރަޖިސްޓާ ކުރާ ފަރާތްތަކުން ހުށަހަޅާ ފޯމްތަކުގެ ސައްހަކަން ކަށަވަރު ކުރުމާއި ގުޅޭގޮތުން އިލެކްޝަންސް ކޮމިޝަން (އީސީ) އިން ފުލުހުންނާއި މަޝްވަރާކޮށްފި އެވެ.
އިލެކްޝަންސް ކޮމިޝަނުން ފުލުހުންނާއެކު ބޭއްވި މަޝްވަރާ ބައްދަލުވުމުގައި ރީ-ރެޖިސްޓްރީ ކުރުމާ ގުޅޭގޮތުންނާއި ރިޔާސީ އިންތިހާބުގައި ފުލުހުންގެ ދައުރާ ގުޅޭގޮތުން މަޝްވަރާކޮށްފައި ވެއެވެ. އެ ބައްދަލުވުމުގައި ކޮމިޝަނަރު އޮފް ޕޮލިސް އަބްދުﷲ ނަވާޒު އާއި ފުލުހުންގެ އެހެނިހެން އިސް ބޭފުޅުން ބައިވެރިވެވަޑައިގެންނެވި އެވެ. އަދި އީސީގެ ފަރާތުން އެ ކޮމިޝަންގެ ރައީސް އަހުމަދު ޝަރީފު ވެސް ބައިވެރިވެ ވަޑައިގެންނެވި އެވެ.
އިލެކްޝަންސް ކޮމިޝަނުން ފުލުހުންނާއެކު ބޭއްވި ބައްދަލުވުމުގެ ތެރެއިން
އިލެކްޝަނުން ބުނީ ރީ-ރެޖިސްޓްރޭޝަން ފޯމް ހުށައެޅުމުގައި އޮޅުވާލުންތަށް ހުރިކަމުގެ ޝަކުވާ ލިބެމުންދާ ކަމަށެވެ. އެހެންނަމަވެސް އެ ކޮމިޝަނަށް ހުށައެޅޭ ހުރިހާ ފޯމެއްގެ ސައްހަކަން ކަށަވަރު ކުރާނެ ކަމުގެ ފުރިހަމަ ޔަގީންކަން އަރުވާ ކަމަށްވެސް އެކޮމިޝަނުން ބުނެފައި ވެއެވެ.
އިލެކްޝަންސް ކޮމިޝަނުން ބުނީ ރީ-ރެޖިސްޓްރީ ކުރުންފަދަ ކަންކަމުގައި އުޅުވާލުމުގެ ޝަކުވާތައް އެކޮމިޝަނުން ލިބެމުންދާތީ، އެފަދަ ކަންކަމަށް ހުރިހާ ރައްޔިތުންވެސް ސަމާލު ވުމަށް އިލްތިމާސް ކުރާ ކަމަށެވެ.
ރީ-ރަޖިސްޓަރ ކުރުމުގެ އެންމެ ފަހު ތާރީހަކީ އަންނަ އޮގަސްޓް މަހުގެ 11 ވަނަ ދުވަހެވެ.
